Chapter 18

133 18 72

Zindagi kiya hai? yeh teen ilfaz insaan ke dimagh per bohat asar dalte hai. Zindagi kiya hai, yeh toh aaj tak koi samjh hee nahi paya. Kisiko paana, kisiko khona, kabhi khushi toh kabhi udaasi, Zindagi ek toofan hai, jahan kabhi dhukon ki baarish ati hai toh kabhi khushiyon ka saya, kabhi insaan sakoon me rehta hai toh kabhi pareshaniyon ki sakht dhoop me. zindagi woh daariya hai jissey agar insaan par kar le toh sirf roshni hi roshni, per issey par kerne me kitni dushwariyan hai, woh dushwariya humare tests hai, jo ke Allah ki taraf se ate hai. Quran me ata hai ke

وَاللّهُ خَيْرُ الْمَاكِرِينَ

"Allah is the best planner"

is duniya me 8 Billion log hai per agar hum gor karein toh kisi ek shaqs ki bhi kahani dosre se nahi milegi, Allah ne sab ki kahaniyan alag banayi hai, sab ki zindagi alag banayi hai. sab ki azmaishein alag banayi hai toh agar azmaishein hai toh saath me uske inaam bhi hai. Kyunke woh rab bohat raheem hai woh aala hai woh behtreen faisla karne wala hai! Phir sab ki zindagiyon ko behtreen banaya hai, agar dukh hai toh sukh bhi hai, dard hai toh marham bhi hai, Allah tala insaano se 70 maon se zayada pyaar karte hai woh insaan ko agar andhero me dalta hai toh unko nikalna bhi janta hai. Ek insaan jisne zindagi me hazaaron dukh jhale ho, yahan tak ke akhir per woh khush hone se darne lage toh Allah uski zindagi me kuch ayse farishte dalta hai jo usko aandheron se wapis lata hai jo uske zakhmo per marham lagata hai, shuru me us marham se bohat takleef hoti hai per phir ahista ahista woh marham us takleef ko dur kardeta hai, woh dobara zindagi ki taraf ajata hai, usko rang ache lagne lagte hai, usko phool ache lagne lagte hai, Allah ne dukho ke saath marham bhi banaya hai, mushkil ke saath asaaniyan bhi banayi hai. Aur isi tarha woh rab apne aala aur bartar hone ka saboot deta hai. Insaan jitni bar girta hai Allah utni bar ussey uthata hai.
Yeh zindagi ek jalwa gaah hai, insaan jese hi iske husn se mustasir hota hai woh iski raangiyon me kho jata hai, aur is sab me woh apna is duniya me aane ka maqsad bhool jata hai. insaan ashraf al makhlooqat zaroor hai per uske saath hi besabra bhi hai. Mushkil toh har insaan per ati hai, per hum insaan is hadd tk besabre hai ke mushkil ke ate hi Allah se shikwe shuru kardete hai. Phir hasil aur la-hasil ke darmayaan zindagi itni kho se gayi hai ke jo hasil ho jaye us ki qadar nahi uska shukar nahi aur jo lahasil ho uske peeche bhagte reh jate hai, insaan ki hasrate kabhi khatam hee nahi hoti. Woh yeh tak bhool jata hai ke agar Allah chaye toh lahasil ko hasil bana sakta hai.
Yeh zindagi ek bazaar hai, jahan insaan bohat kuch khareedne ki koshish karta hai, per woh maal woh nahi jiske liye Allah ne ussey banaya tha. Woh is duniya ke bazaar me khali haath hai.
Zindagi ek uljha sawal hai! Yeh ek ajeeb sheh hai!

_______

Waqt bhi bara ajeeb hai sitam karne per ata hai toh rukta hee nahi. 2 hafte aur phir Alyaan humesha ke liye Alizay ka hojayega, 2 hafte aur phir Alyaan aur Emaan ke raste humesha ke liye ek dosre se juda hojayege! Woh sab lamhat, woh sab ehsaasat, woh sab jazbaat, woh ishq, woh bas ek yaad ban kar reh jayenge, khoobsurat yaad? ya shayad woh yaad jo humesha sirf unko dukh phonchayegi, mohabbat bhi aysi ajeeb hoti hai, jab woh dur jaana chahte the tab unke qareeb chali aayi aur jab woh qareeb hona chahte hai toh dur chali ja rahi hai.

Us ghar me shehnayi ki awaazein gonj rahi thi, per kiya wahan koi waqai khush tha? Maheen shaadi ki tyaariyon me itna khoyi huwi thi ke kisi aur cheez ka khayal hee nahi rehta tha, Alyaan office me khud ko band rektha tha per woh toh wahan bhi sahi se sans nahi le pata tha. Woh kis mushkil me aa ker phasa tha, uski zindagi me uljhanein kab khatam hogi? Kab woh khush hoga?

"hello" Alizay Alyaan ke office ayi thi aur uske darwaaze per khari dastak dete huwe ander chali ayi thi. Alyaan ne usko dekha, uske chehre per koi tasurat nahi the jab ke Alizay ussey dekh ker muskura rahi thi.

Tu Shab Main SubhaWhere stories live. Discover now