Chapter 14: Yeh Kahani Phir Sahi

140 28 209

~bohat kam waqt lagta hai
umer ke dhalne me
chahaton ke khatam hone me
bohat kum waqt~

aksar insaan bohat bebas hojata hai, halat ke agaye bebas, naseeb ke haathon har jata hai, zindagi se thak jata hai! Humein lagta hai ke kisi insaan se dur hona asaan hai, woh shaqs jo kisi ko chorta hai woh be-his hai, per koi us shaqs ke bare me nahi sochta sab uski berukhi ko dekhte hai koi yeh nahi sochta ke yeh uski zaat ke liye kitna iziyaat bhara dor hai koi yeh nahi sochta ke woh kis dard se guzarta hai, woh kis liye yeh karta hai koi nahi samjhta, sab ko nazar ata hai toh apna dare! Kabhi kabhi behtari ke liye raste alag karne parte hai!

__

Aaj unka woh dhai saal ka safar khatam hone wala tha! Emaan ki aaj convocation thi aur kal Alyaan ki company ki opening. Jiske liye unhe aaj shaam lahore ke liye nikalna tha. Alyaan khush tha, bohat khush aur dosri taraf Emaan har din jeeney aur marne ka faisla karrahi thi. Allah se himmat maang rahi thi ke woh apne shohar aur apni mohabbat ki hifazat kar sake! Kisi tarha woh aane wale toofan ko rok le. Ussey musalsal phone per koi tang karraha tha.

"maine tujhe kaha tha ke alyaan se dur reh aur tu utna hi uske qareeb jaa rahi hai! Kuch bhi kar bas aaj ussey lahore jaanay se rok" Woh shaqs ussey phone per dhamka raha tha aur Emaan baiawaaz ansuon ke saath ro rahi thi. Woh dari huwi thi, woh kese apne hi haath se apne shohar ki khushiyaan cheen le? woh janti thi ke Alyaan ne din raat ek kardiya tha take woh us company ko chala sake aur ab jab woh kamyaab hogaya tha toh woh ussey uske khuwab cheen le. Woh itni sakh dil toh nahi thi, Woh itni behis toh nahi thi, Uski mohabbat jhoot toh nahi thi!

"sun rahi hai main kiya keh raha hun? Aaj dophar 3 baje tak ka waqt hai tere pass!" Yeh keh ker us shaqs ne phone kaat diya tha aur emaan chup chaap wahin khari rahi.

"Ya Allah mujhe himmat de ke main apne shohar ki hifazat kar sakun" Usne dil me dua ki. Usko kuch samjh nahi araha tha. Woh bas roye ja rahi thi. Agar usne us shaqs ki baat puri nahi ki toh woh Alyaan ko khatam kardega aur agar usne us ki baat puri kardi toh woh apne haathon se apna ghar ujaar legi! Woh ussey khona nahi chahti thi.

"Emaan" Alyaan ki awaaz thi, woh aur maheen living room me the jahan Nimrah Saif Alizay aur Ifrah bhi aye huwe the! Emaan ne apne ansu saaf kiye aur jaldi se khaari huwi. Khud ko compose karte neeche chali gayi.

_________

2 baj rahe the. Maheen Emaan ke kamre me aye thi, Emaan ke saath alizay bhi wahin thi.

"emaan bachay main ajaun?" Maheen darwaze per khari thi. Emaan usko dekh ker muskurai aur apne sar asbat me hilaya.

"kesi hai meri guriya?" Itne din hogaye the, woh dono ek dosre se baat nahi kar pa rahi thi.

"main theek hun ammi" muktasir sa jawab ya shayad jhoot! Maheen ne uske sar per haath phera

"kuch huwa hai bacha? main tumhari maa hun tum mujhse bol sakti ho" Emaan ne apna jhuka sar utha ker alizay ko dekha tha jo wahin sofay per tik ker bheti thi.

"sab ko chorne ka gham hai" Emaan ki aankhein nam huwi thi, woh apne hawas me nahi thi. Bina soche samjhe bol gayi. maheen uski baat kuch samjh nahi payi thi.

"jinke dil saath jure ho, woh bichar ke bhi juda nahi hote!" Maheen ne uske sar per haath rekha tha. Woh uth ker bhaar nikli thi, seeriyon ke pass hi phonchi thi jab usko peeche se dhaka laga aur woh neeche gir gayi. Uske sar se khoon beh raha tha. Emaan uper khari thi uske bilkul saath me Alizay thi. Emaan pathar ki ban gayi thi.

Tu Shab Main SubhaWhere stories live. Discover now