الجزء 26

20.2K 474 58
                                                  

#كوبرا
طلعت من المحكمة و كان حمزه في قمة غضبه .. بس ما تكلم و لا كلمة الا لما وصلنا الحوش ..
قالي نقدر نفهم ليش درتي هكي ؟؟؟
قتله نعرف إنك متضايق .. و ما اتوقعتش مني ندير هكي ..
بس حتى في القانون المُحرض لازم يتعاقب .. و أنت ما تعرف شي حمزه ..
صلاح ما دارش فيا خير .. بطلت من قرايتي .. تزوجت غصب و أنا صغيره .. و خدا مني بنتي .. و رجعني لي زوجي غصب ..
بس هو ما يعرفش إنه ظالم .. هو مش حاس بروحه غالط في حقنا لا ..
أمي هكي رباته .. رباته لازم تسيطر على خوتك البنات لأنك راجل الحوش .. رباته على مبدأ إنت الكبير و الكبير الله ..
تعرف لما كنت نقول لي أمي نبي نكمل قرايتي و كلمي صلاح شن كانت تقولي !! تقولي فكينا منه قالك ما فيش قرايه ما فيش قرايه خلاص ..
صلاح مصاب في الكبد حمزه .. يعني ح يموت .. هادي بروحها تكفي .. أمي كانت تعرف انه يشرب و ما نهاته .. كانت تعرف بيه عنده علاقات و ما عاركاته .. كانت تعرف إنه يجيب في البنات و كانت ساكته ..
عاى منو اللوم ؟؟ إذا صلاح مُلام .. أمي مُلامه الضعف ..
حمزه أنا مش قادره ننسى نظرة عيونه و هو بيضربني بالسكين .. كان يبكي يا حمزه ..
تعرف ليش ضربني !! لأن نارمين قالتله إن نور أختك علاقة مع الضابط الي حبسك و طلعت و أجرت حوش بروحها ..
يعني صلاح بيلوم نفسه مليون مره .. إن الضابط الي داهم الحوش و حبسني مداير علاقه مع اختي .. و انت تعرف احنا الليبيين كيف نفكروا ..
ليش صلاح بس يدفع الثمن ؟؟ حتى أمي تدفعه .. و نارمين تدفعه ..
بينما احنا العكس .. نضحكوا في وجه أمي و نارمين و عازمينهم ع العشاء و كلنا نبوا نعاقبوا صلاح ..
تعرف حمزه ..
يوم الي صلاح أعطى وعد لي أهل سراج تعرف أمي شن قالتله ؟؟
قالتله سلم ولدي و ربي يحفظك لي وخياتك و يدومك فوق راسهم ..
يعني أمه صفقتله 👏🏻👏🏻 و أنا رقدت ليلتي يعلم الله بيها .. في الوقت نفسه أمي تبكي معاي و تقولي ارجعي لي راجلك و خلاص ..
فهمني كيف بيحس بغلطه صلاح !!!
خوف الأمهات من أبنائهم خوف مرضي .. مش ح يدفع ثمنه صلاح بس ..
لو ربي رزقني بي أطفال .. و صار فيهم هكي .. و كانت سوء تربيتي هي السبب .. ح نفرح لو بنتي أعطتني درس و لو متأخر .. و ح نتمنى الموت ألف مره و لا يجي اليوم الي بنتي تشهد في المحكمة قدام خوها .. الا في حالة أغتصاب 🤚🏻🤚🏻 وقتها أنا نفسي نوقف معاها ..
قعد ساكت .. و بعدين قالي نحترم كل كلمة قلتيها .. و نحترم قرارك .. بس بنقول كلام و ياريت ما تزعلي منه ..
تحت أي ظرف .. و مهما يصير .. حوشي ما يخشاش خوك .. و لا انتي تخشي حوش هو موجود فيه .. لا إنتي و لا صغاري ..
قعدت نبكي و قلتله به ..
قرب مني و حضني .. قالي ما تزعليش .. بس مستحيل نجازف بيكم مره تانيه ..
كان قلبي يعصرني ألم .. آمته نبطلوا نعاقبوا الضحيه !! 🤷🏻‍♀️🤷🏻‍♀️
قعدت في حضنه و يمسح في دموعي و يقولي خلاص .. قتله نبي وعد ..
قالي نمشوا ناخدوا عشاء من برا و نمشوا لي امك نتعشوا و ناخدوها ..
قتله هيا 😍 ..
و العطاء مكتمل لما يكون من شخصين .. و صعب لما يكون من شخص واحد .. 👌🏻👌🏻
طلعنا و مشينا خدينا عشاء و مشيت لي حوشنا .. و كانت فرحة أمي بي جيتنا بالدنيا كلها ..
قعمزنا تعشينا مع بعضنا .. و كان حمزه متحشم و يا دوبك خدا فمين و نزل للجنان ..
هدرزت شويه و خديت وعد و روحنا ..
و فاتت أيامي عادي .. بين المشغل و الحوش .. و يوم الجمعه تتغدى عندي أبله آمنه و أمي .. و العشيه يجوا أخوات حمزه و نوران ..
و فاتت شهور و قرت نارمين فاتحتها .. و من غير ما ادير عرس كبير .. دارت لمه بسيطه للعيله في حوشي ..
جو خالاتي .. و بنات خالاتي و مرت خالي و مرت عمي .. و الجيران بس ..
كانوا عيونهم كلهم في الحوش و الأثاث .. و في داخل كل وحدة فيهم تقول شن هالطيحه الي طاحتها ..
و بسؤال مستفز يسألوني .. حق راجلك عازب ؟؟ نرد و نقوللهم عازب ايه 😉
ترد أبله آمنه الفايده في الهناء ..
نقوللها يا اللاي حتى لو متزوج 10 قبلي هو معاي عازب 😍 ..
تضحك نوران تقولي صار منك و درتي لسان 😄😄.....
تقولي خالتي .. يومها عمك محمد ( راجلها ) يشكر في حمزه و يعاود .. قال من خيرة الناس ..
تسألني بنت خالتي .. كم عندك مشغل توا ؟؟ نقوللها زوز و بنفتح الثالث ان شاءالله ..
بحسد ترد عليا و تقولي ما شااااءالله وين بتفتحيه ؟؟ نقوللها لا مش في ليبيا المره هادي بنفتحه 😉😉
يتفاجأوا كلهم 😳😳
و نحس بدوخه .. و معدتي كأنه عسر هضم .. تقولي أمي خيرك ؟؟. نقوللها معدتي توجع .. و نهدرز و نساير مع الناس ..
جو أهل وليد راجل نارمين و ضيفناهم .. و خدوا عروستهم و طلعوا ..
بدا كل مره يروح حد .. فضى الحوش و أصرت أم حمزه على نوران و عزوزتها و أمي يقعدوا يباتوا عندي ..
غيرت ملابسي و أنا حاسه روحي تعبانه .. قتلي أحلام بالك حامل ..
قتلها بالحق 😳😳 قتلي نوران انتي لي آمته بتقعدي تحملي من غير ما تعرفي 😄😄
قتلها لا بس ما اتوقعتش ..
قالولي كان معدتك قعدت هكي امشي عايني و ديري تحليل حمل ..
قتلهم تو نقول لي حمزه 😍😍
قالولي حرام عليك ليل توا ..
كلمته قتله انت وين ؟ قالي انا و الحاج في الصالون .. قتله من حاج ؟ قالي بوي ..
قتله به تعالي دار النوم نبيك ..
جاني دار النوم .. و ع طول شديت في رقبته .. قتله معدتي من الصبح توجع فيا ..
قالي نجيبلك دواء ؟ قتله لا ..
بس حاسه روحي حامل ..
قالي ااااه 😳😳
قتله ح ا م ل ..
حضني و قالي نمشوا توا للعياده .. قتله توا ما فيش عيادات ..
بس امشي لي أي صيدليه و خودلي أختبار حمل .. قالي توا ح نطلع ..
طلع حمزه و مشيت جنب نوران و احلام في المطبخ ع أساس بنعاونهم ..
قالولي شن صار ؟؟ قتلهم قتله أنا حاسه إني حامل 🤭🤭
قتلي نوران حاسه صار و أنا لما قتلك لين نخلعتي 🤨🤨🤨🤨
قتلها تي هكي و قلته من غير رومانسيه الخبر .. تبيني نقوله انخلعت 😁😁
و ما عطلش حمزه و جى و جابلي إختبار حمل .. قتله ليش جايب 3 ؟؟
قالي مرات واحد يغلط نستعملوا التاني ؟؟
قتله أها احتياطات أمنيه يعني ؟؟ 😁😁
قالي هيا قريب نديره أنا ..
خشيت درته .. و طلعت أعطيتهوله ..
قالي شن نديرله ؟؟ قتله حتى انا ما نعرفش 🤭🤭 قالي نور انتي اعصابك بارده و أنا مش متحمل .. قتله و الله ما نعرف ..
قالي شنو نرفعه لي امي و لا كيف ؟؟
قتله هات نرفعه لي نوران ..
طلعت لي نوران و قتلي مبروووك حامل 😍😍
و باركتلي أحلام .. و خشيت لي حمزه قتله ألف مبروك أفندي بابا ..
فتح إيده و غمرني في حضنه ..
اللهم عوضنا عوض الصابرين ♥️🌺
قالي قلبي ينبض بقوه و كأني في امتحان ..
قتله به  جاوبت كويس انت ناجح 😁😁...
شدني و هو يقول ما فيش طلوع و انا نقوله بنطلع للناس .. و هو يقولي به جربي ديري واحد تاني باش نتأكدوا .. و أنا نقوله من وين بنجيب السوائل 😅 ... يقولي به اشربي و اقعدي هوا لين نجربوا التاني ..
و بصعوبه طلعت من دار النوم و قعمزت جنب عزوزتي و أمي .. و قتلهم أنا حامل 🙈♥️
باركولي و باسوني ..
ناضت أبله آمنه بتصلي .. امي قعدت تشكر فيها .. قتلي لا سألتني عليك لا على أمالي راجلك الاول .. لا على خوك لا شي ..
الحمدلله يا بنيتي ربي عوضك خير ..
سهرنا ليلتها للصبح .. و وعد تمشي ترقد جنب حمزه و يطير عليها النوم و تجي تكمله عندي ..و تنوض ترجع لي حمزه تاني ..
الصبح نضت بنديروا فطورنا .. و ما فيش أحلى من اللمه بكل ♥️🌺
و نوران تهدرزلي في المطبخ .. على بنات خالاتي و شن حكوا امس و كيف فجأه بدوا ودودين معانا ... و يحبونا .. و ليش لا و احنا حتى نتعلموا قاعدين نحكموا ع الناس بمظهرها .. ببساطتها ..
No name ♥️🌺

كوبراحيث تعيش القصص. إكتشف الآن