الجزء 25

20.4K 453 90
                                                  

#كوبرا
غمضت عيوني و نسمع في أحلى نغم في حياتي .. باس إيدي .. و قرب مني يبي  ................
توترت و باعدت .. شدني من إيدي و قالي هيا نصلوا ..
صلينا و دعيت من كل قلبي نبدا حياة جديده و بقلب جديد و أمل جديد و فرحة جديده ..
خشيت غيرت و لبست فستان نوم و فكيت تسريحتي .. طلعت لقيته متكي ع الصالون .. كان في داخلي إحساس إني مش جاهزه ..
يحضرني إحساس الإحتياج .. الأمان .. الحنان .. بس ...
جيت جنبه و هو مبتسم فرحان طبعاً .. قالي عروستي ما جتش اليوم ...
قتله عروستك بزعت العصير ع ڤيلوها و الورد الي في الڤيلو كله قطعاته .. و تشد تركينه تنحي كندرتها و شخشيرها .. و تدور حفيانه ..
كنت انا نحكي و هو يضحك فرحان و مبسوط ..
قرب مني و قالي نبي بنيه حتى أنا 😉
مش عارفه كلمته كانت غزل .. أو طلب .. أو أنا سمعتها بطريقه حلوه هلبا ..
خداني في حضنه و قلت له هلبا كلام .. ما كانش كلام حب .. بس كلام يعبر عن حالة حب 👌🏻♥️
شدني من إيدي و قالي نوضي .. و لما نضت قامني بي إيد وحدة .. و خشينا دار النوم ..
اخخخخخخ شن بنقول 🤷🏻‍♀️♥️
(( لم أرى للمتحابين خير من الزواج )) 👌🏻👌🏻
و لي أول مره في حياتي نحس بروحي مع رجل ..بجسمي و بروحي و بكياني .. و قلبي و مشاعري و كل شي ..
كانت ليله حاضره فيها كل مشاعري و كل أجزاء جسمي تناغمت مع كل حرف و كل كلمه حلوه سمعتها منه ..
و غرقت في بحر من الإحساس ♥️♥️ فقت منه و أنا نبكي .. و حمزه يحضن فيا ..
نضت من السرير لبست و طلعت من دار النوم ..
قعدت بروحي في الصاله ..
يعلم الله سبب الدمعه الحاره الي نزلت مني .. كنت نبكي من قلبي .. من قلبي ..
خشيت في حاله هستيريا من البكاء و معاش قدرت نسكت ..
حسيت بي إيد حمزه ع كتفي ..
هنا 👈🏻♥️ في هالقلب في جروح .. جروح تشفيها الموت بس ..
حضني و قعدت نبكي في حضنه ..
أنا أنسانه ♥️
أنا أنثى 🌺
أنا إمرأه مكتمله .. ♥️🌺
من أعطاك الحق تنهي حياتي و مشاعري لمجرد إني مطلقه !!
حمزه ساكت .. و بعد ساعات و انا في حضنه .. و نحس بي لمسات إيديه .. هديت شويه .. كان حمزه يعرف إن الصمت في المواقف هادي افضل من السؤال ..
قتله حمزه ..
قالي روحه حمزه ..
قتله أنا ......
قالي نعرف .. و زاد حضني ..
و رقدت في حضنه ..
—————-
بس يكون في صدق 👌🏻 وقتها الحياه ح تكون أبسط من كل تعقيداتكم .. أجمل من كل معتقداتكم .. ♥️
—————
نضت الصبح لقيت روحي في الفراش .. خشيت دوشت و صليت ..
عيوني منفوخات من البكاء .. طلعت من الدار لقيت حمزه يدير في الفطور ...
حضني و باسني و قالي قعمزي ع الطاوله لين يجيك فطورك ..
فطرنا مع بعض .. و قعمزت في حضنه ع الصالون ..
قتله أنا آسفه لأني قعدت نبكي مبارح .. قالي و ليش الإسف !
بالعكس نبيك تكوني ع راحتك في كل شي ..
قتله حسيت روحي زودتها ..
قالي هيا انوضوا دارنا .. قتله هيا 🙈♥️ ..
المغرب جهزنا نفسنا و مشيت للحوش نبي ناخد وعد ..
شافتنا قعد تصحك 😃
خديناها و مشينا تعشينا برا و روحنا الحوش .. سهرنا و وعد بيننا إحنا الزوز ..
أول مره نحس بالتكامل الروحي و الأجتماعي .. أنا و حمزه و وعد بيننا .. صوره بألف حنين و حب و مشاعر .. فما بالك لو كانت من صلبه 🤷🏻‍♀️🤷🏻‍♀️ ..
قعدت بيننا لين رقدت .. حطيتها في الفراش و تلفتت نبي نرجع جنبه لقيته وراي 🙈♥️
.....
كانت أيام في جنه .. حياتي مستقره .. بعد فتره بديت الصبح نمشي للمشغل و نرفع تصاميمي و نشرف ع الخدمه .. و الضهر نروح أنا و وعد .. و سلمت الحوش الي كنت مستأجراته .. و ياسمين و أمها إستقروا في الدار تابع المشغل ..
أم حمزه إنسانه نادرة في الوقت هذا .. خدتها من قصيرها و شافت لي سعادة ولدها و بس ..
و مع الوقت إنتي الي ح تزرعي حبك و إحترامك بين الناس ..
جتني نوران و كنت فرحانه بيها 🤭🤭 قتلي امي تبي تشوفك و تفكري انتي كيف صلاح خدا منك وعد شن صار فيك ..
قتلها صح عندك حق 😔😔
قتلي شن رايك نقوللها نور عزماتك على العشاء و نخطم نجيبها معاي ؟
قتلها و ليش تقوليلها انتي ؟؟ تو نتصل أنا و نعزمها .. قتلي الحمدلله و الله كل صلاة ندعي ربي يهدي النفوس ..
اتصلت بي أمي و أول ما سمعت صوتي قعدت تبكي .. و أخي ع الوقت و أخي ع الضروف و أخي علينا الي سمحنا لكل شي يشتت بيننا ..
قتلها أنا عازماتك ع العشاء .. قتلي خلي نشوف من بيجيبني و كان ما حصلتش نجي في تاكسي 
هنا انا لزمت الصمت 🤷🏻‍♀️
ردها العفوي من غير ما تسألني حتى امته العزومه أوجعتني ..
أحنا ليش عيوننا ما تلامسش المشاعر الصادقه الا في الأزمات ؟؟ الا بعد تجارب مؤلمه ؟؟
لدرجة قلت لي نفسي أنا كيف قدرت الفتره هادي كلها من غيرها !!
قتلها تو نقول لي حمزه يخطم يجيبك ..
باش تزيد توجعني مره تاني و تقولي أمالا خلي نطلع للمحلات جنبنا ناخد حاجات لي وعد قبل ما يوصل فيا الراجل .. 🤷🏻‍♀️🤷🏻‍♀️
تعجز أحياناً عن وصف مشاعر الأمومه .. هي التسامح في حد ذاته 👌🏻
و من زرع الخوف فينا ؟؟ و من زرع المفاهيم الغلط في تربيتنا ؟؟ و من قال ان الأبن لازم يكون جلاّد البيت لمجرد إنه ما فيشي أب ؟؟ من قال لازم يسيطر ع خواته باش ما تطلعش دوه ع العيله !! .......... 
نلوم على أمي !! .. أو نلوم على على خوي !! .. أو نلوم ع معتقداتنا و مجتمعنا ؟؟؟ .....
—————
كلمت حمزه و قتله أخطم على أمي .. و قالي حاضر ..
من غير ما قالي امته كلمتيها !! أو ليش كلمتيها !! أو مش ح نمشي نجيبها .. و عليا اليمين ما تخشلي حوش .. و و و ..
و الرجوله أخلاق 🤷🏻‍♀️
جى حمزه و جاب أمي .. خشت فرحانه هلبا .. و تحضن فيا و تبكي .. و ما فيش أم ما تتمنى بنتها مرتاحه و بحوشها و ربي ناعم عليها بزوج صالح ..
جت معاها نارمين .. سلمنا و خشينا .. أمي واخده ألعاب لي وعد و ملابس ..
قتلها واخده حتى ملابس ؟؟ قتلي نارمين مش توا خدتهم .. لكن كل ما نطلعوا للمحلات و تسوف لبسه تعجبها تقول هادي تجي على وعد خلي نشريها .. قتلي دارتلها دولاب بروحها 😄😄..
تأثرت هلبا 💔💔 فعلاً الأمومه عطاء 👌🏻♥️
قعدنا نهدرزوا و نسينا الي فات كله .. و قتلي في ناس جو خطبوا نارمين ..
لا إرادياً قتلها لا ردي بالك .. قتلي نارمين ليش ؟؟ قتلها كملي قرايتك قبل ..
قتلي لا انا نبيه و متفاهمين نكمل قرايه بعد الزواج ..
ناضت نوران و نارمين للمطبخ .. و امي تشوف للحوش .. قتلي مرتاحه ؟؟
قتلها هلبا يا ماما .. ادعيلي ربي يدوم هناي ..
قتلي ان شاءالله يارب .. و دمعتها في عينها ..
قتلها كيف حال صلاح ؟؟
تفاجأت أمي .. ممكن ما أتوقعتش سؤالي عليه .. قتلي يرفعوا فيه للنيابات و خلاص 😔
قتلها يفرج الله ..
في عيون أمي هلبا أسئله .. و مستغربه مني ليش نسأل عليه ..
قعمزنا ع سفرة وحده و تعشينا .. و وعد و عبدو و إسراء يلعبوا و فرحانين ..
روحت أمي مع نوران و خدت وعد معاها ..
في الليل سهرت أنا و حمزه ..
سألته .. شن صار في قضية صلاح ؟
قالي يرفعوا فيه للمحكمة ..
قتله و كيف ما طلبونيش للشهادة ؟؟
قالي أنا قدمت أوراق إنك ما تقدريش تشهدي بحجة إنك قاعده مريضه ..
قتله امته الجلسه الجايه ؟؟
قالي نهايةالشهر هذا ..
قتله نبي نمشي ..
قالي مش ح نخليك تخشي للمحكمة .. قتله معناها تنازل عليها القضيه ليش تجري عليها ؟؟
قالي ناخد حقك .. قتله حقي ناخده بروحي .. و خليني نحضر الجلسه متع الشهود بس .. ما كانش راضي و وافق و هو مش راضي ..
و فاتت أيام و كل ما نشوف أمي نحس إن المرض كلاها و التخميم ..
و جى موعد المحكمة .. و مشيت أنا حمزه .. قعدت مقعمزه في مكتب لين نادى عليا حمزه .. خشيت و كانوا في 3 قضاه ..
خش صلاح .. و الأخوه تغلب رغم كل شي .. ما تقدريش ترضي تشوفي خوك مهان و مكسور و بي لبسة السجن ..
في مشاعر تغلب ع الذكريات السيئه .. تخايلت لو كان بابا الله يرحمه حي .. هل بنقدر نشهد أنا ضد خوي ..
رابط الدم أقوى .. رابط الدم أقوى ..
سألني الأول .. إنتي الضحيه ؟؟
رديت إيه أنا ..
سألني .. شن تتفكري يوم الحادثه ؟؟
قتله كنت أنا و بنتي بس في الحوش .. كنت نجهز للغداء .. و أماليه طلعوا مشوا حوش اختي بيجيبوها ..
كانت عيون صلاح كلها ندم و حسره ..
و عيون حمزه كلها تساؤولات شن الي بنقوله ؟؟
قالي القاضي كملي ..
قتله كنت نجهز في الخضره و كان في إيدي سكين .. و يبدو ان في حد شاف أهلي طالعين .. توقع ان الحوش فاضي .. خش للحوش بيسرق .. و لما شافني بالسكين خداه مني .. و لما عافرته لاني كنت خايفه على بنتي .. ضربني الطعنه الاولى في إيدي .. و كانت ضعيفه بدليل إنه مش قصده يطعني بكل .. و طعنتين في بطني ..
كان حمزه مصدوم 😳
و صلاح 🤷🏻‍♀️🤷🏻‍♀️🤷🏻‍♀️🤷🏻‍♀️🤷🏻‍♀️
قالي القاضي متأكده من أقوالك ؟ قتله ايه .. قالي ح نطلبوك للشهادة مره تانيه مرات .. قتله حاضر .....
مشيت خطوات القدام و قربت من صلاح .. و لسان حالي يقول ..  {{ لَئِن بَسَطتَ إِلَيَّ يَدَكَ لِتَقْتُلَنِي مَا أَنَا بِبَاسِطٍ يَدِيَ إِلَيْكَ لِأَقْتُلَكَ ۖ إِنِّي أَخَافُ اللَّهَ رَبَّ الْعَالَمِينَ }}
و طلعت من الغرفه و أنا نردد ..  إِنِّي أَخَافُ اللَّهَ رَبَّ الْعَالَمِينَ ..  إِنِّي أَخَافُ اللَّهَ رَبَّ الْعَالَمِينَ 👌🏻♥️
‏No name ♥️🌺

كوبراحيث تعيش القصص. إكتشف الآن