الجزء 15

21.5K 536 81
                                                  

#كوبرا
تاني يوم فقنا الصبح و درنا فطورنا .. قتلي نوران كلمته سامي و توا بيبعتلي رقم تليفون محامي ... قتلي تعرفي شن الغريب ؟؟
قتلها شنو !!
قتلي لما قتله نور تبي تطلق ما تفاجأش بكل .. قتلها ليش ؟؟
قتلي ما فهمتش .. غريبه بجد ..
قتلها و لا غريبه و لا شي .. الرجاله عندهم نظره في بعضهم ..
قتلي تطلعي بيها السياره ؟؟ قتلها مزال خايفه 🤦🏻‍♀️ مش عارفه امته بنتشجع ..
قبل ما تروح نوران اعطتني رقم المحامي .. و قررت تاني يوم نمشيله .. و ما كنتش عارفه شن بنقول لي امي ..
الصبح فقت قلت لي امي بنطلع نجرب السياره .. قتلي لا ابداً 🤚🏻🤚🏻 ضروري نمشوا معاك ..
قتلها معناها خليها بكره لاني كنت مدايره في حسابي نمشي للمشغل الي تابع الدوره ع الاقل نتدرب شويه ع الماكينات ..
قتلي به خلاص ..
طلعت و مشيت للمحامي .. قالي تلقيني في مجمع المحاكم .. مشيتله .. و قعمزت معاه و قالي ديريلي توكيل ..
درتله توكيل و طلعت مشيت للدوره ..
مزال اسبوع على امتحاناتي .. مشيت شريت مكينة خياطه .. و رجعت للحوش .. و بديت كل يوم نفصل و نخيط .. نفصل في الموديلات الي خديتها في الدوره .. و موديلات من راسي ..
نفسد في القماش .. و نلوح .. و نفصل تاني .. و نخيط و نفسد القماش و نلوح .. نتعب .. نصكر المكينه و نقيمها .. و انوض تاني يوم نفصل من جديد و نخيط ..
امي جنبي و كونها عندها خبره قديمه في الخياطه .. كل مره تفهمني حاجة .. و تقولي نور انتي مشكلتك في المقص .. تشديه لازم تفسدي القماش ..
و يوم عن يوم كل مره ايدي تثقن التعامل مع القماش اكثر ..
و جى يوم الامتحان .. رفعت مكينتي و قماشي و المتر متعي و كل شي ..
و طلبت عليا نخيط قفطان مقاس 40 .. و فعلا في زمن ساعتين فصلته و خيطته ..
و حسيت ان القفطان الي خيطته و لا خياطة إيلي صعب 😄😄
قيمتني أبله بدريه ربي يحفظها و خديت حاجاتي و روحت ..
خشيت للحوش وريتهم القفطان .. و قداش فرحوا بيه ..
قالولي هيا نطلعوا بالسياره ..
قتلهم نطلع عادي لكن وعد لا ..
قتلي نارمين بنطلع انا 🤨
قتلها لا بنتي ما نطلعهاش 🤚🏻🤚🏻 خليك معاها هنا لين نبدا نسوق كويس ..
قتلي امي خفتي على بنتك و بتطلعيني انا معاك ! 😱
قتلها عاد من بيشجعني كان ما تبيش تطلعي معاي؟؟ انتي امي ضحي ع خاطري 😁😁
طلعت انا و امي و وعد قعدت مع نارمين في الحوش ..
و ما لا يقل عن ساعتين و انا نحاول نطلع السياره من الجراج 😄😄
و نارمين تتفرج علينا من فوق ..
طلعت بالسياره و امي خايفه .. و انا متوتره .. و درت فليتشات الاربعه .. و شديت يميني ..
و في كل مفترق طرق الي وراي لين يتعصبوا 🤨 من كثر ما انا جامده في مكاني و نشوف يمين يسار .. و يخطم من جنبي يعارك .. نقول لي امي خيره هذا ؟؟
تقولي ما تعدليش عليه ..
و قداش ما كثروا الاربعه شوارع و الزنق 🤦🏻‍♀️🤦🏻‍♀️ و كل ما يجتازني حد نحس في روحي زي الي بنطيح من الدروج و ننخلع و نخاف ..
و لما بنخش زنقه امي تقولي ديري فليتشه .. نقوللها كله انديره انا 🤨🤨🤨
عاونيني شويه و ديريها انتي .. و نغلط و ندير المساحات .. و ننخلع و نعيط .. و امي تقولي ما تخافيش هادوا مساحات ..
ووووك عليا شوقني السواقه 🤦🏻‍♀️🤦🏻‍♀️
و بقدرة الله عز و جل قدرت نروح .. و من كثر ما كنت متشنجه حسيت روحي انا الي مركبه السياره ع ضهري مش انا الي راكبه فيها ..
درست السياره قدام الحوش .. امي قتلي دخليها في الجراج ..
قتلها لاااااا 🤚🏻🤚🏻 سادني اليوم خلاص مش مستعده نقعد ساعتين ندخل فيها ..
قتلي انا نوقفلك نقولك يمين و يسار خير ما يحنبوها .. قتلها ما يخنبها حد ..
ركبنا للحوش .. قالت نارمين شن صار ؟؟ بشروا ..
قتلها امي و الله اختك الله ييارك طلعت لقطت الدعاء من الناس و روحت 🤦🏻‍♀️ ...
قتلها امي 🤨🤨 بدل ما تشجعيني ..
قتلي نارمين معناها مشوار عشيه نطلعوا من الصبح ..
قتلها قبلها بي 10 دقايق كويس 😌😌😌 ..
و فاتت أيامي بين مكينة الخياطه و التفصيل و نلعب مع وعد و مرات يكلمني المحامي يطلب مني اوراق و مره مره نطلعوا بالسياره ...
لين كلموني الدورة و قالولي تعالي استلمي شهادتك .. و من يومها بديت نجهز في المشغل متعي بكل طاقه و حيويه و فرحه .. و سامي دارلي رخصه للمشغل ..
و بديت انوض الصبح نمشي انا و امي و وعد للمشغل نفصل و نخيط في موديلات من تصميمي .. و نروح نخطم ع المحلات ناخد مجموعة اقمشه و نروح للحوش ..
و في الليل لما نخش فراشي نرسم كذا تصميم .. و في الصبح نمشوا للمشغل ..
انشغلت هلبا و وقتي بدا معبي .. و مره مره ينهبني قلبي و ياخدني الحنين .. نتفكره نسرح ..
و ننتبه و نرجع نفصل تاني ..
و ياما اقمشه فسدت و ياما يأست و تضايقت .. بس مره بعد مره نتمكن اكثر ..
و بدت تخدم معاي امرأه مغربيه كانت خبرتها افضل مني .. و تعلمت منها هلبا ..
و كانت تخيط في ڤيلوات و قفاطين كبيره ..
و يوم عن يوم بديت ننجح .. و الي نخيطوه انا و اياها نحطوه في العرض .. بدت تجينا طلبيات .. و نضغطت هلبا .. و جت بنت تانيه ليبيه بدت تحدم معاي .. و هكي كانت حياتي لين جى اليوم الي كلمني المحامي و قالي اليوم حكم القاضي بالحضانه ليك و بالمؤخر و الطلاق غيابي ..
فرحت و حسيت اني حره .. شي كان كاتم ع صدري .. هم و نزاح ..
و لأن امي شافت نجاحي نظرتها تغيرت اتجاهي .. جيتها قتلها انا تطلقت ..
قتلي نعم ! 😳😳
قتلها تطلقت .. 🤷🏻‍♀️🤷🏻‍♀️
حسيتها تفاجأت بس ما تضايقتش .. فهمتها كل شي و قتلي الله غالب خيرتك مش فيه ..
قتلي و كأن سألني خوك شن نقول ؟؟ قتلها امي مزال حاصله في نفس الوحل !!
قوليله اختك تطلقت ..
قعدت امي ساكته ..
وقتها بس حسيت ان الخوف هذا مرضي ..
كيف يمكن للأنسان يحمل بي جنين في رحمه .. يتغدى من دماءه .. يتكون من خلايا جسمه .. 9 شهور .. قلب ينبض داخلك .. تولديه و انتي تحسي بالموت .. شن يخرج روح من روح .. يولد قطعة صغيره لا حول ليه و لا قوة .. ترضعيه من ثديك .. تحضنيه في البرد .. تمسحي دمعته لما يخاف .. تعلميه المشي .. تفرحي بي اول خطواته .. تعلميه الكلام حرف حرف 👌🏻👌🏻 .. هديتك يوم ينطق ماما .. فرحتك يوم يجيبلك اول صحيفه في المدرسه ... 
و لما يكبر تخافي منه .. تخافي من خشته للحوش .. تخافي من خشونة صوته .. تخافي من تعصيبته .. تخافي انه يضربك 💔💔
معادله مش مفهومة .. جبتك للدنيا من دمي و لحمي باش تقعد طول عمرك تقهرني و بدل ما نموت مره .. نموت في اليوم 100 مره ..
روحت انا و امي و وعد للحوش .. و طول الطريق امي تبكي .. يا امي خيرك شن مزعلك ؟؟
تقولي ما في شي 😢
كيف ما في شي و انتي من بكري تبكي ؟؟ متضايقه ع خاطر تطلقت !!
قتلي لا لا .. قداش ليك اليوم عندي لا جاك راجلك و لا صرف على بنته و لا يندري عليك .. و تو ربي يعوضك و تاخدي سيد سيده ..
قتلها امالا خيرك ؟؟
قتلي واجعني حالي .. و انهمرت بالبكاء ..
قتلها استهدي بالله امي ليش واجعك حالك ؟؟
قتلي خوك محبوس و انتي تطلقتي .. كنت نتمناكم خير من هكي .. راهو توا هو بصغاره و مرته و حوشه .. و انتي متهنيه و بحوشك و راجلك .. لكن الله غالب .. و غلبتها دمعتها لين معاش قدرت تحكي ..
بس للأسف أمي وصلت متأخره .. في مثل يقول (( يا اميمتي كان توديني من أول دحيه نهيتيني )) يعني التمرد الي في اولادكم انتو صنعتوه ..انتو خليتوه ينمو و يكبر و بغطرسه زياده .. ما كنتيش تعرفي ان الطوفان بتغرقي فيه حتى انتي .. و أكبر عقاب ليك إنك تشوفي ابنك ينتهي قدامك ..ليش !!!
لأنك كبرتيه على ان كل شي مباح ليه .. من و هو صغير و مزال ما يعرفش يقضي حاجته تقوليله انت راجل عيب 🤚🏻🤚🏻 كان لقيت اختك في الشارع اضربها عيب 🤚🏻🤚🏻 و مهما كان غالط في اخواته ما يتعاقبش ..
انتي ظلمتيه و ظلمتينا معاه 💔💔
No name ♥️🌺

كوبراحيث تعيش القصص. إكتشف الآن