الجزء 14

21.1K 449 57
                                                  

#كوبرا
اتصل بيا .. و كنت متحشمه هلبا .. كانت اغلب المكالمه ساكتين ..
سألني .. خفتي عليا ؟؟
لا أرادياً رديت هلبا 😔 ..
تنهد و قالي قعدت نفكر فيك و نقول أكيد خافت ..
قتله هلبا خفت و قعدت نبكي 😔💔
قالي نسألك سؤال شخصي ؟
قتله ايه عادي ..
قالي انتي مطلقه ؟؟
تفاجأت أنا 😳 ما اتوقعتش السؤال .. قتله لا مش مطلقه ..
حسيته تفاجأ .. و قعد ساكت .. و بردوا أنا قعدت ساكته ..
و معاش عرفت نحكي ..
قالي به ليش راجلك طالع بي بنتك لي تونس ؟؟
قتله مشاكل صايره من اول ما تزوجت ..
قالي يعني منفصله ؟؟
قتله ايه ..
قعدنا ساكتين .. و لأن الصمت طول .. قتله نستاذن انا ..
قالي قبل ما تصكري بنقولك حاجة .. قتله نعم !! قالي أنا ما نقدرش نكلمك و إنتي على ذمة راجل تاني .. الي نرضاه لنفسي بنرضاه لغيري ..
فجأة فقت لي روحي انا 😳😳😳 أنا شن قاعده ندير صح !!!
قعدت ساكته .. ما عرفتش شن نقول .. قتله صح كلامك انا اسفه .. و صكرت الخط ..
عاود اتصل بيا .. ما رديتش ..
بعتلي رساله .. ( على شنو تتأسفي انتي ما درتي شي )
عاود اتصل بيا ما رديتش ..
كلنا نعرفوا الصح من الغلط و انت و طريقتك كيف توصله للطرف التاني ..
فكرة إن احنا الي نرضوه للناس نرضوه لنفسنا هادي شعارات واهية أكل عليها الزمن و شرب .. بالعكس احنا الي نرضوه للناس ما نرضوشي لنفسنا .. أنت گ شاب مستعد ادير علاقات مع بنات الناس كلهم لكن اختك لا 🤚🏻
أول مواجهة ليا .. أول موقف .. أول صد ..
و مع الشخص الي اخترناه ♥️
و انسرقت الفرحه الي حسيناها للحضات .. و فقت على واقع ان عندي بنت و قاعده على ذمة راجل ..
عاود اتصل بيا .. درت تليفوني صامت و رغميت راسي ..
نتأمل في وعد .. نحس في روحي في حلم .. امته تزوجت !!
امته حملت !!
امته جبت !!
😔😔💔💔
و كل ما نحاول نغمض عيوني يجي بين عيوني لما سقيته ميه .. و لما طالع من البحر و صاحبه مضروب .. و قداش خفت عليه .. وقتها حسيت اني نحطيت في اختبار صعب و عرفت إني مغرمه بيه ♥️ هلبا مغرمه بيه ♥️♥️
الصبح نضت و انا مقرره نقدم في قضية طلاق .. جى عمي الصبح و جابلي السياره ..
قال امس انتو مهناش في البحر و جت ام سراج و اخته .. قتله جوك انت ؟؟
قالي لا جو هنا لحوشكم .. لقيتهم قدام الحوش .. قتله شن يبو ؟؟ قالي ع كلامهم كيف سمعوا بي صلاح و جايين بيشوفوا البنت ..
و معاش تعرفي كيف ربطتي روحك بشي أبدي .. ما يكفيش انفصالك عليهم لا لا .. يقعدوا كل شويه ينغصوا حياتك ..
قالي عمي حقهم يشوفوا البنت .. حقهم !! 😳
طلع عمي .. تلفتت لي امي ... و وين كان حقي لما جو خطبوني لي شاذ زي هذا !!! وين كان حقي لما ضاعت حياتي !! وين كان حقي لما كان يضرب فيا !! وين كان حقي لما خدا مني بنتي و حرمني منها !!!! و وين حقي لما بنعيش مطلقه و أندادي قاعدين في الجامعات ..
وين حق نفسي !! وين حق كرامتي !! وين حق فرحتي !!!!!!!!!!!!
قعمزت على أعصابي .. يعرفوا حق الناس عليك .. لكن ما يعرفوش حقك عند الناس ..
ما يتكلم حد عليك و يقول حقها تكمل قرايتها .. ما يتكلم حد عليك و يقول لا ما تزوجوها صغيره .. ما بتكلم حد عليك لما تحرجي في حوش اهلك و انتي مظلومة مكسورة .. ما يتكلم حد عليك لما يحرموك من صغارك ..
بس يوم يتفكر الراجل يشوف صغاره وقتها يبدا عنده حق 🤚🏻 .. لا يصرف عليك .. لا يعاينك .. لا يعرف صغاره شن ناقصهم .. حقه في رؤية اطفاله بس .. 🤷🏻‍♀️
قلت لي أمي أنا نبي نمشي لمحامي .. قتلي ليش 😳😳 .. قتلها نبي نتطلق ..
قتلي 😱 و كان يسمع بيك خوك ؟؟
———
🤷🏻‍♀️🤷🏻‍♀️🤷🏻‍♀️🤷🏻‍♀️🤷🏻‍♀️🤷🏻‍♀️
قتلها شنو يعني نقعد طول عمري هكي !! لا متزوجة و لا متطلقه !!! نقعد معلقه هكي ع خاطر واحد زي هذا !!
قتلي ما فيش مشي .. نقول لي خوك قبل ..
قتلها أمي انتي عارفتيه شن بيقول .. و لا مدايره في بالك نرجع حتى انتي ؟؟
قتلي نكلم خوك نقوله قبل ..
خشيت للدار و انا بنتفجر من الغيض ..
تكملي عمرك و انتي ترضي في الناس .. هذا يبي يزوجك .. هذا ما يبيك تطلقي .. امك تقولك ارجعي راجلك و تحملي زيك زي باقي النساوين ..
و هكذا ....... المهم المجتمع راضي عليك ..
نسمع في امي تتكلم في التليفون .. صكرت الخط .. مشيت سألتها قتلها صلاح هذا !!
قتلي ايه ..
قتلها به شن صار ؟؟ قتلي قال تروح حوش راجلها و ما فيش طلاق ..
ضحكت 😄 .. قتلها و الله بجد !! .. مزال خاطره يقهرني ؟؟ مزال ما رجعله عقله ؟؟ ما يقولش هذا دين اخواتي اليتامى ؟؟ ياما قهرت و ياما ضربت و ياما حبست و ياما جوّعت !!! 
{ مَا لَكُمْ كَيْفَ تَحْكُمُونَ }  !!!!
حتى لو هو ضرنا يا أمي أوقفي وقفة حق .. مش هو بس ولدك .. الظلم شين راه 👌🏻👌🏻
و تعدي عليك أوقات تحسي روحك رضعتي المر من صغرك ..
لبست و مشيت دورة الخياطه .. و أنا طالعه لقيت حمزه في سيارته .. ركبت تاكسي بسرعه قبل ما يجيني .. و تفكرت اني مخليه تليفوني صامت .. طلعت التليفون من شنطتي لقيته متصل هلبا و باعتلي رساله ( اسف كان زعلتك بس و الله ما قصدي ) ..
روحت لقيت نوران و حماتها عندنا في الحوش .. خشيت نشوف وعد طول .. و بعدها غسلت وجهي و قعدت مقعمزه نهدرز معاهم ..
من هدرزه لي هدرزه .. قتلي نوران ما تقوليلي خيرك ؟؟ قتلها خيرني 😳 !!
قتلي شناباتك و حواجبك زي سامي .. نقي حواجبك نظفي وجهك .. غيري من روحك خلاص .. حتى الي يشوفك يحسك من فصيلته 😄
قتلها به اتديريلي انتي وجهي ؟؟
قتلي به بعدين يجي سامي يروح بي حماتي و نفضى بيك ..
حمزه يتصل .. رديت عليه .. قالي جيتك بكري للدوره .. قتله اهااا ما شفتكش ..
قالي به تمام .. ليش ما ترديش عليا !!
قتله لأني مزال ما اطلقتش حمزه ..
تنهد و قالي خليني معاك .. مش قادر نبعد على عيونك ..
قتله و لا انا قادره نبعد ع عيونك .. بس كلامك صح كله .. قالي ح نقعد كل يوم و كل دقيقه نفكر فيك و نستنى أتصالك تقوليلي انا حره ..
قتله ان شاءالله ♥️🌺
جى سامي و روح بي اخته و قعدت نوران عندنا .. نقتلي حواجبي و نظفتلي وجهي .. نضت شفت روحي ع المرايه 😳😳 هادي أنا !! 🤭🤭
شكلي تغير هلبا 🤭🤭
وعد شوفي ماما بدت إمرأه 🤭🤭
قعمزت نهدرز على نوران و نحكيلها ع أهل سراج و سراج .. و كل شويه نشوف روحي في المرايه ..
قتلي به ليش ما ترجعيش !! حتى ع خاطر بنتك ..
قتلها تعرفي نوران .. في ليلة كنت راقده في دار النوم .. و من كثر ما كان الجو سخون فتحت الروشن و خليت الستار بس ..
و سراج كانوا عنده صحابه في الصالون .. و الصالون فيه بلكونه تفتح على روشن دار النوم ..
و انا متكيه و الدار ضلام .. حسيت بحركة جهة الروشن .. تلفتت حسيت بخيال .. خليت روحي عاديه و بديت انراقب بشويه .. حسيت بالستار يتحرك .. انتبهت .. لقيت راجل واقف في البلكونه و يحاول ينحي الستار باش يشوفني ..
نضت نجري .. مشى الراجل ..
طلعت من دار النوم و طقيت ع سراج في الصالون .. طلع قالي خيرك !!
قتله راه كان في حد جهة روشن دار النوم ..
قتلها تعرفي شن رد عليا نوران ؟؟
قتلي شنو !!
قالي و علاش فاتحتيه انتي اصلا !!
خش لي دار النوم و صكر الروشن و قالي معاش ترقدي جهة الروشن ..
انصدمت وقتها .. و هلبا مواقف صاروا .. الموضوع مش موضوع حب و انسجام .. لا لا
الموضوع موضوع أخلاق .. إنسانيه .. تربية .. رجوله ..
كيف بنرجع باش نربي وعد !!
وعد ح تكبر تشوف بوها و هو يضرب في امها .. و يهين فيها .. و يبات مع صاحبه و يهدي بي صاحبه و امها مجرد خادمه و بس في الحوش ..
يعني يا نوران .. تنفصلي و تعيشي اطفالك في بيئة هادئة محترمة افضل من انك تتشبثي بمبدا اني ما نحرمش اطفالي من بوهم و تعيشيهم في جحيم معاه ..
امته بنحترموا عقلية أطفالنا !! صغارنا يحسوا و يفهموا كل شي .. يحسوا بالجفى الي بين الام و الاب .. يحسوا بي سوء المعامله .. يكرهوا بيئتهم .. و احتمال يكبروا يحاسبوا أمهاتهم .. ليش ما انفصلتي من زمان .. الا لو كان الاب نمودج جيد قدام صغاره .. وقتها نشجع كل ام انها تمثل قدام صغارها و تصبر و تتحمل ..
قتلي به شن بديري توا !! 😔😔
قتلها يومها جتنا إيناس .. قتلي خيرها ! قتلها جايه تهدرز ..
تعرفي يا نوران .. هدرزتلي أشياء كانت غايبه عليا كلياً .. ليش نرجع !! نرجع باش ننضرب و نحمل تاني ؟؟
قتلي يضرب فيك 😱😱
قتلها الضرب عنده حق مشروع للزوج .. من غير التحقير و الأهانات ..
قتلي شن رايك نقول لي سامي يشوفلك محامي ؟؟ قتلها ياريت اتديري فيا معروف ما ننساه بكل ..
قتلي معروف شنو احنا خوت ♥️♥️
قتلها خايفه .. خايفه يغصبوني نرجعله .. وقتها مش عارفه شن ندير في روحي ..
قتلي ما يغصبك حد .. و لو صار ما صار تعالي اقعدي عندي لين تاخدي طلقتك ..
قتلها بالحق 😍😍
قتلي ايه و ما يقدر يوصل فيك حد عندي .. حضنتها و قتلها ما ننساشي معروفك هذا بكل ..
No name ♥️🌺

كوبراحيث تعيش القصص. إكتشف الآن