الجزء 13

23.2K 515 122
                                                  

#كوبرا
كنت مقعمزه ع الشط و نضحك 🤭🤭 و مش قادره نمنع نفسي من الضحك و أحساسي بالسعاده ...
خلاص يا نور خيرك شن صارلك تو امك و اخواتك يلاحظوك 🙈🙈
و ما انتبهتش بي و لا كلمه قالتها أمي او نارمين .. و كل مره نتلفت نلقاه مقعمز ..
و بعد شوي تلفتت لقيته بي شورت بس هو و صاحبه و بيخشوا للبحر ..
قلبي 😳🙈 قلبي 😳🙈 قلبي 😳🙈
بديت نعض في صوابعي 😳😳
يارب أمي ما تنتبه يارب .. كنت خايفه امي تشوفه ..
نارمين : نور اعطيني وعد ندخلها للبحر شويه .. نور .. يا نووووور
أنا : نعم !!
نارمين : خيرك مش معاي !!
انا : شن تبي ؟؟
نارمين : اعطيني وعد ندخلها للبحر شويه بس ..
انا : لا لا تشرق منك و لا تطيح فكينا من الرعايش .
نارمين : بنمشي انوض عبدو ( ولد نوران ) ندخله للبحر ..
أنا عيوني في حمزه .. خيره خش داخل هلبا .. الحمدلله الي جى اصلع نشوف انعكاس اشعة الشمس في راسه 😁🤭
امي قتلي اليوم بيجيبها عمك السياره ؟
نور ..
الصبر يا ربي وين بيوصل مالطا هذا 🤦🏻‍♀️🤦🏻‍♀️ اطلع يا ودي عارفينك فالح 🏊🏻‍♂️
امي : نور خيرك اسم الله ندوي بروحي انا !!
نعم يا ماما خيرك ؟
عمك امته بيجيبها السياره ؟؟
قتلها قال اليوم العشيه .. لكن مدام احنا مهناش اكيد بيجيبها اليوم ..
رجعت نشوف لي نوران و راجلها طالعين من البحر .. حمزه هو و صاحبه داخل ..
و احنا مقعمزين كان في شاب يلعب بي موطو البحر .. قال سامي الموطوات هادي مش هنا مكانها بكل خطيره ..
قعدنا نتفرجوا عليه كيف يسوق في الموطو و كيف يدور فيه في مكانه ..
فجأه وقف الموطو و نقز الولد من ع الموطو للبحر .. سامي قال يا ستير !!!
بدت الناس كلها تجري تخش للبحر .. سامي قال عرفته بيضرب حد ..
نخنقت .. خفت .. ركب الدم لراسي .. حمزه وين ؟؟ الدنيا زحمت كلها مع بعضها ..
من غير وعيي اعطيت وعد لي امي ..
نضت معاش نشوف في شي .. و لا درت حساب لي اماليه و لا راجل اختي و لا شي ..
خطواتي رزان لاني كلي مبلوله و رمله ..
ناض سامي وراي .. ماشيه و ندور فيه .. عيوني في الناس كلها وينه !! .. وينه !!
يا ربي هو بأيد وحدة .. يااااارب ♥️♥️
نشبح في الزحمة الي كانت في البحر كلها طلعت للشط ..
شفت حمزه طالع و قايمين صاحبه مضروب ع راسه و كله دم و مغمى عليه .. حمزة فيه جرح في كتفه ..
بمجرد ما شفته قعمزت ع الرمله و قعدت نبكي .. نبكي .. نبكي ..
جتني نوران و نارمين قالولي خيرك ؟؟؟
ما قدرتش نرد عليهم ..
قمت عيوني بنشوفه وينه !!
لقيته يلم في حاجته و بيمشي مع صاحبه للمستشفى ..
نضت مع نوران و نارمين رجعت لمكاننا .. وين تليفوني ؟؟
امي قتلي ما تقوليلي خيرك ؟؟
قتلها خفت بس نحسابه طفل الي نضرب ..
قمت تليفوني لقيته متصل بيا .. اتصلت بيه و قعدت نبكي .. قتله معقوله هكي !
قالي احنا ماشيين نسعفوه و فايق هو توا و كان كملنا بكري تو نجيك ..
قتله طمني .. قالي حاضر ..
و من سنين ما جيت للبحر .. و يوم الي جيت 🤦🏻‍♀️🤦🏻‍♀️ صارت كارثه ..
قعمزت معاهم و حلت عليا الكآبه 😔😔 سامي يحكي ع الي صار ..
امي تسأل كيف حاله الراجل مات ؟؟
سامي : لا لا هما كانوا غاطسين تحت البحر و لما طلعوا ضربهم الولد بالموطو .. واحد راسه نفتح و التاني كتفه ..
امي : و الله الشباب هادوا مفروض ما يخشوا بي موطواتهم و عائلات موجودة و صغار ..
مقعمزه معاهم و متفاجأه في نفسي .. للدرجة هادي احساس الفقد صعب !!
شن الي صارلي بكري !!
ياريتني عندي سياره كنت مشيت للمستشفى ... و لا لا احسن ما عنديش سياره تو يقول خيرها هادي خفيفه لاحقتني لي هنا ..
و كأن فجأه البنت الي مات فيها كل احساس حلو و مشاعر بريئه أحياها الله من أول و جديد ..
كيف الأنسان هكي يملك مجموعة مشاعر متحوله .. مع سراج أنا أنسانه بلا روح .. بلا احساس .. نخاف منه .. نكره صوته .. نشمأز من أحاديثه التافهة .. ما فيشي شي جميل .. حتى لما ياكل ننقرف منه .. و هو راقد نشوف فيه زي الفقمه ... تناكرت الأرواح حد الشرر ..
جى حمزه و جدد كل شي فيني .. هكي من غير اي اعتراف بالعشق .. تملكني ..
كلهم جوهم حلو الا أنا قلبي معلق معاه .. نشوف للبحر و نقول قطرات من دمه اختلطت بمية البحر .. الناس عادي الي يعوم و الي يلعب ع الشط و الي يطيب في غداه و الي يغسل في الدلاعه في البحر ..
حطيت وعد في حضني و قمتلها ايديها الزوز للسماء .. قولي ياااارب حمزه ♥️♥️ يااارب اشفي حمزه ♥️♥️
هو مش بابا راه .. لكن 😔💔
و بعد اكثر من ساعه اتصل بيا .. سألته كيف حالك ؟ قالي كويس .. الولد الي معاي خيطوله و اهو معاي اموره طيبه .. قتله و انت ؟؟ قالي غرزتين 😀😀
قتله بتجي ؟ قالي تبيني نجي ؟ سكتت تحشمت .. قالي هاا تبي نجي ؟؟ قتله بصوت مرتجف .. ايه ♥️♥️ قالي حاضر تو نجي توا ..
تنهدت و قلت الحمدلله 🙈 و بصوت مليئ بالسعاده .. قتلهم هيا شن رايكم نحطوا غدانا ؟؟
اعطيت وعد لي امي و نضت انا و اخواتي نجهزوا في غذانا .. و كله كان طايب من الحوش .. حطينا تغذينا و قعدنا مقعمزين نهدرزوا .. سامي مشى بيدخن .. خشت نوران و نارمين للبحر ..
مقعمزه انا و امي ..
هدرزنا ع صلاح .. ع المحامي .. ع مصروف الحوش و مصروف صلاح ... و كل مره نخشوا في موضوع .. و وعد راقده ..
كلمني حمزه قالي انا برا .. قتله وين ؟ قالي وين ما في السيارات ..
قلت لي امي بنشوف كان في حمام عنا و نجيك .. قتلي به .. قتلها ردي بالك على وعد ..
مشيت و كنت خايفه سامي يشوفني .. لقيته يدخن جنب القهوة .. مشيت جهة السيارات .. لما قربت نزل من السياره .. كنت حاسه روحي بنبكي خلاص من كثر ما خفت عليه .. بس حاولت نتمالك نفسي .. نزل من السياره .. سلمت عليه .. قتله الف الحمدلله ع السلامه و نزلت دمعتي .. قعد شاد في ايدي .. قالي اوووووف ليش عاد دموع ..
قتله خفت بكري .. قالي اول مره نبثرت ايدي ..تاني مره نفتح كتفي .. الثالثه شنو 😉😉 ؟؟؟
قتله حمزه 😳😳 ارخي ايدي 🤨🤨
قالي و الله نبصر 😄😄
قالي اسف بجد .. قتله عادي ..
قالي عادي كتفي ينفتح و يخيطوه ؟؟
قتله حمزه خيرك عليا 🤨🤨
قالي هيا ارجعي راجل اختك مرات يشوفك .. قتله به في ألم ؟؟
قالي لا لا ما فيش شي ..
قتله به تو نتصل نتطمن عليك ..
قالي اوك 😉
رجعت جنب امي .. لقيت اخواتي مقعمزين .. قتلهم ليش طلعتوا من البحر ؟؟ قالولي بنشربوا قهوة .. فاقت وعد من النوم .. اعطيتها حليبها و قعدنا مقعمزين ع الشط و نصنا في الميه .. نارمين تلعب في عبدو في الميه ..
قعدت شاده ايدين وعد و نغنوا .. يا ستي يا ختياره .. يا زينة كل الحاره .. 🎶🎶
حبيبي يلي بحبو ناطرني بالسياره .. 🎶🎶
بحبو بحبو و ما بقدر خبي و عيونوا خلت قلبي مثل رماد السيجاره .. 🎶🎶
درنا قهوتنا و مع المغرب درنا شواء .. و كان لكل شي طعم جديد .. طعم الشواء لذيذ .. طعم القهوة لذيذ .. كل شي طعمه جديد ..
كانوا في عيله جنبنا .. يدربكوا و يغنوا .. تحسي ببساطة الناس .. و كلنا عندنا هموم و مآسي و أحزان .. و كل واحد كيف يتعاطى معاها .. أمي مره مره ينهبها قلبها و تبكي ..
جابولنا العيله الي في جنبنا لوز اخضر .. قعدنا نقشروا فيه .. و ناكلوا .. و نلعب في وعد نقوللها اكته بتكبري تاكلي لوزه يا لوزه 😄😄
و كان ناكل فراوله نقوللها امته بتكبري و تاكلي فراوله يا فراوله 😁😁 ...
نضنا نلموا في حاجتنا .. و ركبنا السياره و روحنا .. وصلنا للحوش خشيت دوشت لي وعد و اعطيتها حليب و رقدت ..
و ضميت انا و امي الحوسه و دوشت و غسلت الملابس ..
خشيت للدار لقيت حمزه باعتلي رساله روحتوا ؟؟ بعتله .. ( ايه )
بعتلي .. ( نكلمك ؟ )
بعتله .. ( به 🙈 )
No name ♥️🌺

كوبراحيث تعيش القصص. إكتشف الآن