الجزء 2

29.7K 560 87
                                                  

#كوبرا
و ضاعت الرابط الي بيننا كأخوه .. قعد الحقد و الكره و الخوف .. لقى بيئته الملائمة ..
و الي يربط بيني و بين صلاح هو رحم أمي فقط الي ولدنا منه أحنا الزوز ..
كنت نتمنى نلبس زي صاحباتي في المدرسه او بنات عمي او بنات خالتي ..
إحساس النقص يلازمك كل ما نتلاقوا في حوش حناي ..
جتني نوران ... نور نور ..
قتلها نعم !! قتلي سمعتي بي هدى بنت خالتك ؟. قتلها خيرها ؟؟ قتلي بوها بيبعتها تاخد دورة برا هي و خالتي ..
قتلها بجد 😳
قتلي الناس يطلعوا يقروا برا و أحنا محرومين منها هنا 😅😅
كنت نغبط بنات خالتي و أي بنت عندها حرية الدراسه .. نتمنى نكون زيها ..
و يا ويلي ع ثقتهم في نفسهم و حضورهم و هدرازهم و ضحكتهم ..
الفرق الي بيننا و بينهم .. (( أن أحنا أيتامى .. تعرفي شنو يعني فلانه يتيمه ؟؟
يعني الاخ هو الجلاّد و إنتي السجينة .. و أمك الي حكمت عليك 🤷🏻‍♀️
ترجعي لزمن { و إذَا الْمَوؤُدَةُ سُئِلَتْ بِأي ذَنبٍ قُتِلَتْ }
بأي ذنب قتلت مشاعري ؟؟
بأي ذنب قتلت ضحكتي ؟؟
بأي ذنب قتلت إنسانيتي ؟؟
بأي ذنب حُكِمت بالسجن ؟؟
بأي ذنب تم تهميشي و إستحقاري ؟؟
بأي ذنب ننحرم من الدراسه ؟؟
بأي ذنب جيت أنا أختك يا صلاح ؟ 🤷🏻‍♀️🤷🏻‍♀️... ))
في سياسه مجهولة السبب الأم بمجرد ما يكبر ولدها تستقوى بيه على بناتها .. و حتى على راجلها في حالات شاده ..
و فعلاً ما عدوة المرأه الا المرأه نفسها ..
و كأن أنا و نوران و اختي الصغيره الي نسيت أسمها 😂😂 مش مولودين من نفس الرحم ..
يا ماما نبي نمشي حوش صاحبتي ..
_ لا ما فيش مشي خوك ما يبيش ..
يا ماما نبي نسجل في دورة انجليزي ..
_ و الله تبي عينك مش دورة انجليزي تبي خوك يذبحك ..
يا ماما هيا نمشوا للبحر مع حوش عمي الجمعه ..
_ بحر شنو انتي عارفه خوك .. البحر كله معاكسات و دوة فاضيه ..
يا ماما ندى صاحبتي كانت تحكيلي على منتزه عائلي يشكروا فيه هيا نمشوله ..
_ و المنتزه هذا مش يبي مصاريف و خوك مش فاضي يرفعنا و فكيني ترا نوضي اغسلي بساط و لا ضمي الدواليب ...
و ضاع العمر و أحلى سنينه رضاءً لي صلاح 🤷🏻‍♀️ ...
_____________
نجحت من الشهادة الثانويه .. بتقدير ممتاز .. و كان عندي إصرار نكمل قرايتي ..
بس للأسف أمي كل شي يبيه صلاح تنفذه .. و على قد ما حاولت و ترجيت و كلمت أعمامي .. رفض صلاح نكمل قرايتي .. و تعرضت للضرب و الأهانه ....
و كان هذا أكبر جرح في وقتها ..
كان يمشي ياخد دجاج و يجهزوه في الجنان و يقعمزوا يشووا .. و لما نمشي نقعمز أنا .. يقولي نوضي درقي وجهك داخل يا متع القرايه .. انوض نخش للدار .. تجيني نوران تجيبلي طرف دجاج مشوي بالدرقه تقولي هاك كوليه ..
بس كالعاده و لأن نادرة الي كاتبه الروايه هادي .. كرامتي فوق كل شي 🤷🏻‍♀️🤷🏻‍♀️ ..
و مستحيل ناكل حاجة هو جايبها .. و قعدت هكي بين 4 حيوط .. يومي يتجدد لو في العشيه بندير فطيرة او كيكة .. نحس بفرحة عارمه لما نكمل الكيكة .. و يفوت يومي ..
انخطبت نوران اختي خطبه تقليديه .. و لا تعرفه و لا شافاته .. و لمجرد إن صلاح سأل عليه و قالوله كويس .. قال لي أمي بنتك لو ما توافقش عليه بتشوف ايامات سود مني .. بنخش نضرب و نطلع نضرب ..
و بحكم البيئه المغلقه الي كنا عايشين فيها ... بنصدق أنا كل شي تقوليهولي .. كانت امي تقول لي نوران تو تتزوجي و تكملي قرايتك و يبدا عندك حوش بروحك و تعيشي حياة افضل من هنا ..
وافقت نوران و كان ممنوع خطيبها يجيها او تكلمه في التليفون .. و بالرغم من طموحاتنا البريئه كانت تحكيلي كل ليله كيف ح تولع الشموع لراجلها و تستقبله بالروب الاحمر و مجهزة عشاها ..
هذا و هي ما تحباش .. و لا حكت معاه بكل .. بس بصيص أمل يخليك تحسي بكيانك و لو شوي ..
و في يوم مقعمزه انا و نوران في الدار .. و كان الجو سخووون و في عز الصيف ..
جت أمي قالتلي راهو في ناس كلموا خوك عليك .. قتلها أنا ؟ 😳😳
قتلي ايه .. و خوك يشكر و يعاود .. و الراجل متدين و يخاف الله ..
قتلها انا ما نبيش و صكريه الموضوع راه ..
قتلي عنده زوز حياش و مقتدر و ما شاءالله عليه و مش من سكان طرابلس ..
قتلها زياده 😳😳 تي مستحيل نطلع من طرابلس انا راه ..
قتلي الفايده في الهنى .. انتي بتمشي 200 كيلو بس أهو ساعتين نكونوا عندك ..
قتلها لا ما نبيش ..
قتلي خوك مصكر راسه و ما اتديرليش مشاكل .. و طلعت أمي و خلتني نصارع الموت بروحي ..
ليلتها كنت راقده انا و نوران في الجنان الفوقي .. بحكم الجو سخون هلبا و ما عندناش مكيفات .. في الليل نسمعوا في بنت تغني في حوش صلاح .. و ضحك هو و صحابه و جوهم جميل ..
تقولي نوران كيف بنت تجي في قروب اولاد هكي !! 😳😳
قتلها نعرفش بس عادي عندهم ..
زاد قرب صوتها .. شكلها فتحت الروشن الي تحتنا بالضبط .. نضت انا و منار نشوفوا من السور .. قامت راسها البنت لقتنا واقفين .. خشت و قالت لي صلاح ..
خشينا انا و نوران و درنا روحنا راقدين .. جانا زي المجنون .. سكران .. يقيم فيا من شعري انا و نوران و يقولنا خشوا داخل ..
ضربني على وجهي كفوف .. نوران تعيط و تقوله انحرقنا الجو سخون .. يقوللها موتي في النو داخل هنا .. ناضت أمي تقوله باهي ارخيهم خلاص .. صكر علينا الجنان بالمفتاح و خدا مفاتيحه .. امي تقول تستاهلوا علاش ترقدوا في الجنان !!
نوران تقوللها ولدك جايب بنت هذا علاش ضربنا و دخلنا داخل ..
امي تقوللها كلهم هكي الاولاد ارقدي و اسكتي ...
______
و ضاعت القيم الي مفروض سبب وجودك في الدنيا هادي ( امك ) تعلمهالك 🤷🏻‍♀️
و كأن أخلاقياتنا فيها أستثناء .. بين ذكر و أنثى .. و كأن ديننا الأسلامي شرع للذكر ما لم يشرعه للأنثى ( بأستثناء القوامه و الميراث )
باهي يا أمي .. يا قدوتي .. يا سبب وجودي .. يا دنيتي .. أنكري المنكر و لو بلسانك و هذا اضعف الإيمان ..لكن ما تقوليليش الاولاد كلهم هكي 🤚🏻 لاني وقتها بنجيبلك نمودج سيئ جداً للبنات و بندير زيهم و نقولك البنات كلهم هكي 🤷🏻‍♀️
عشت ليلتي صعبه جدا انا و نوران .. و في داخلي حرقه بين ضلوعي .. و نفسي عزيزه زادت من حدة وجعي ..
نوران تبكي و تقولي امته نرتاح من هالحوش هذا .. و لو درنا دراسه احنا هنا كمجتمع ليبي .. ح نلقوا ان كل قراراتنا المصيريه كانت جراء ضغط اجتماعي و ردود أفعالنا كلها هروب من واقعنا الأليم ..
تاني يوم الصبح نضت لقيت وجهي ازرق من الضرب .. نوران ايدها توجع فيها و منفوخه .. ضمينا الحوش .. و نسمعوا في الباب نفتح .. خشيت نجري للحمام من الخوف .. و قعدت مقعمزه فيه .. لين غاب عليا صوته و عرفت انه طلع ..
طلعت من الحمام .. قتلي نوران خدا فلوس من أمي و طلع .. قتلها و زياده تعطي فيه في فلوس !! 😳😳😳
قاله يا فرعون شن فرعنك .. قاله ما لقيت من يلمني 🤷🏻‍♀️🤷🏻‍♀️🤷🏻‍♀️
جتني أمي قتلي الاسبوع الجاي بيجو يخطبوك .. قعدت ساكته .. بعدين قتلها انا ما نسكنش برا طرابلس .. و ديري أي سبله لي ولدك ..
قتلي وين بتسكني ان شاءالله ؟؟ قتلها انا صغيره عمري 18 سنه ما نبيش نتزوج ..
قتلي علاش قاعدتيلي هنا ؟؟ لي آمته ؟؟ ريتي هالشهاده الي بتاخديها ..
طلعت أمي .. و في داخلي إحساس إني عبأ عليهم في الحوش هذا .. و مع هذا مش ح نوافق عليه .. و لما عرفت أمي إني مش ح نوافق .. زاد الجفاء و سوء المعامله ..
نكلمها ما تردش عليا .. نصبح عليها ما تردش .. يحطوا الغذاء ما ينادونيش .. نقعد باليومين من غير ماكله .. ضغط نفسي رهيب ..
جى اليوم الي بيجو فيه أمالي ( سراج ) .. جاني صلاح قالي تعرفي ما تطلعيش اليوم نقتلك بعدين .. جتني أمي بعدها .. قتلي راهو خوك هدرز على الولد و قاله بنخليها تكمل قرايتها و تتخرج و تخدم ..
طلعت للناس و سلمت .. و أعجبتهم هلبا .. و خشيت دارنا قعدت نشوف فيه من الروشن .. لقيته لابس عربي و إزار و لحيه .. شكله مقبول نوعاً ما .. بس في شي في النفس مش مقبول 🤷🏻‍♀️
روحوا و جاني صلاح قالي راهو بتوافقي و درقي عليا وجهك و انتو قاعديلي هنا في الحوش .. بكيت لي أمي .. بكيت لي صلاح .. بس كان الأمر أكبر من طاقتي ..
كانت عندنا بنت جيرانه ( ايناس ) تجي ديما تهدرز علينا بس احنا ممنوع نمشولها .. كان خوها و صلاح أصحاب هلبا ..
أيناس هادي لما خاطرها يضيق او بتطلع تشري يرفعها صلاح و معاها خوها طبعاً ..
يرفع فيها صلاح للجامعه هو و خوها و يروح بيها .. يوصل فيهم صلاح لكل طلعه .. للبحر .. للمحلات .. لي صاحباتها ..
كانت تهدرز علينا في حاجات فوق مستوى إدراكنا .. دارت عيد ميلادها و صلاح ماشي جاي يجيب الكيكة .. يجيب الحار .. الي ناقص كله ..
باهي وين العله ؟؟ يا ناس ليش خيرنا لي غيرنا ؟؟ ليش الود مقطوع بيننا ؟؟ ليش نودوا البرانيه بس ؟؟
الله يسامح أمهاتنا .. ربوا اولادنا ع القسوة .. ع الجفاء .. ع العناد .. و من الي اعطى الحق لي صلاح و لي نمودج صلاح بالأستقواء على اخواته ؟؟
و من الي اعطاه الأحقيه يحدد مصيرنا ؟؟ ليش في حوشك وحش مفترس و في الشارع و مع بنات الناس حمل وديع ؟؟ من أولى بي ودك و حنانك ؟؟ ____________
و بين أحداث كبيره و أحداث صغيره لقيت الله عز و جل يسير أموري بطريقه ترفضها نفسي بس مسخره من عند الله عز و جل .. و تحدد موعد عرسي أنا و نوران 🤷🏻‍♀️🤷🏻‍♀️

No name ♥️🌺

كوبراحيث تعيش القصص. إكتشف الآن