الجزء 1

49.7K 960 146
                                                  

#كوبرا
                  الــــــــمـــــــــقــــــــــدمـــــــــة
كان عمري 17 سنه .. كنت زي أي بنت يتيمه و السلطه كلها لي خوها ..
أمي جابت صلاح بس .. هو بس الي ما ينزعلش منه .. هو بس الي يلبس كويس .. هو بس الي كلامه صح .. هو بس الي لازم ياكل كويس ..
صلاح قاعد انطيبوا .. صلاح مش قاعد ما فيش داعي انطيبوا ..
ممنوع الطلوع حتى معاه هو ما فيش طلوع .. ممنوع اتديري صاحبات او يجوك او تمشيلهم .. ممنوع اتديري تليفون .. ممنوع نمشوا للبحر ..
مش من حقك تتكلمي في وجود صلاح .. لإنك إنتي مش كيان ليه معتقدات و أفكار باش تهدرزي و تعطي رأيك .. لا لا ..
إنتي جسد يأكل و يستفرغ و يحرث فقط ..
نوران بعد ما نجحت في الشهادة الثانويه قاللها قعمزي في الحوش .. هذا ما ناقص تخشي للجامعه و اتبعيلي فلانه و علانه ..
حاولوا يكلموه من العيله .. بس بدون جدوى 🤷🏻‍♀️ .....
حاولت نوران تطلع و تسجل في معهد عالي و تفرض عليه أمر قرايتها ..
بس مسكينه كان يضرب فيها زي المجنون .. كانت و هي تنضرب يسود الرعب في الحوش .. و نشوف في مصيري بمجرد ما ننجح في الشهاده الثانويه ....
بمجرد ما نسمعوا صوت سيارته و الباب نفتح .. انوضوا انضموا .. أو نخشوا نرقدوا ..
دارنا تتعرض للتفتيش كل فتره .. و يا ويلنا كان لقى عندنا قلم حمرة ..
صاحباتنا يعزموا فينا مرة مرة .. ما عمرنا خشينا حوش حد فيهم .. و لو وحدة من صاحباتنا جتنا تتعرض لي سوء معامله و معاش تفكر تجينا بكل ........
كان بابا الله يرحمه باني الحوش على دورين .. كانت أمي و احنا صغار مأجره الدور الفوقي كمصدر دخل .. و بمجرد ما كبر صلاح خدا الدور اللوطي .. و كل خميس تسمعي كل أصوات المجون .. يجيب في البنات لحوشه .. صوت منضومة الأغاني يسمعوها الجيران كلهم ..
كنت لما نسهر انا و نوران نسمعوا في ضحك البنات .. و لما انوض الصبح نمشي للمدرسه نشوف البيتزا ناسيها في السياره من كثر ما فرحان بضيوفه .. و أنا بايته ليلتي من غير عشاء ..
ما عمره فكر يخدم .. و ليش بيخدم و أمي تحرم فينا و توفرله في كل شي ..
حوشه ما فيش حد يخشله حتى من أمي .. نخشوله بس لما يبي تنظيف ..
نلقوا في ثلاجته جميع انواع الشكلاطه .. كروت التليفون ملوحين في كل مكان ..
الشرب تحت السرير متعه .. و في شيش شرب في الثلاجه ..
كل ما إنتي تنظفي في البساط تلقي خراص طايح .. خاتم طايح ..
الحمام متعه فيه مزيلات نسائيه ..
حياة أخرى تختلف ع حياتنا .. و ما كانش يهمه شن نشوفوا في حوشه ..
نضموا انا و نوران و تخنب نوران من الشكلاطه و نركبوا حوشنا .. و نعدوا ليلتنا نهدرزوا في الي شفناه ...
ما عمري مزحت معاه .. ما عمرنا قعمزنا على سفرة وحدة نتعشوا أو نتغذوا .. الا لما كنا صغار .. أنا نطلب حق كتاب او سبيدروا لان الي نلبس فيه تقطع و ما ناخدش بحجة ان ما فيش فلوس ..
في نفس الوقت يوقف صلاح يطلب منها .. تعطيه أمي من غير ما تعرف لي شنو الفلوس ..
كان أكبر مني بي 6 سنوات .. و نوران أكبر مني بي 4 سنوات .. و نارمين اصغر مني بي 4 سنوات ..
No name ♥️🌺

كوبراحيث تعيش القصص. إكتشف الآن