وبعد يومين طلبت الشيخه من ام عدنان انو اني ابدي انظف الغرف الفوك الخاصة ببيت الشيخ واني بداخلي فرحت لان بدت الشيخه تثق بيه وفعلا بديت انظف الغرف الفوك واول غرفة بديت بيها غرفة الشيخه ونظفتها وغيرت ديكورها وعطرتها والشيخه اول ماشافتها لغرفتها انعجبت بيها كلش وثاني غرفه نظفتها هيه غرفة الشيخ وهم غيرتها ورتبتها فدشي وعطرتها وهستوني اريد اطلع منها ودخل الشيخ وجانت هاي اول مرة تتلاگه عيونه سوا وحسيت بشيء بداخلي يتحرك وبعد فترة من الصفنه طلعت من الغرفة ......
الشيخ من تلاگة عيوني بعيون الفصلية نسرين حسيت گلبي يرجف عليها وبديت اميل الها واتعلق بيها ومن دخلت الغرفة وشفتها منظفتها ومغيرتها ومسويتها فدشي كلش حلو بقيت گاعد بغرفتي لحد وگت الاكل .......
نسرين اني بعد ماكملت تنظيف غرفة الشيخه وغرفة الشيخ نزلت جوة سويت الغدا وساعدت ام عدنان وبعد ماكملنا الغدا وتغدو ونظفت المطبخ گلت اصعد اكمل الغرف البقية وفعلا صعدت وبديت بغرفة حازم لان هو جان ببغداد ونظفتها وغيرتها وعطرتها واخر غرفة رحت اريد انظفها هيه غرفة اخت الشيخ واول مادخلت دا اريد انظفها شفتها گاعده بالغرفة وبس شافتني گامت تصيح وتعيط عليه وتگلي اطلعي برة وگامت تريد تجي تضربني وهيه تعيط اطلعي برة وهنا ماحسيت الا واحد جرني من ورة وهو جان الشيخ ومن جرني حيل وگعدت على صدره لان هو جان اقوى مني واوف شصار بيه جان احساس مو طبيعي وبعد فترة واني بحضنه بعدني عنه لان اجتي الشيخه على صوت صياح بنتها ومن شافتني واگفه گلتلي الشيخه عوفيها وروحي ولتنظفين غرفتها ......
الشيخ من سمعت صوت صياح طلعت من غرفتي ردت اشوف شكو شنو هذا الصوت وهو جان صوت حنان تصيح على نسرين تگلها اطلعي برة ورادت تضربها واني جريت نسرين من وره وهيه وگعت بحظني وحسيت مدا اگدر اتحمل حسيت حرگت گلبي وشعلت مشاعر قوية بداخلي وحاس بروحي بديت احبها واحب وجودها واشتاق الها اذا مااشوفها والصراحه اني حاجيت امي الشيخه انو تگول لام عدنان تخلي نسرين تنظف الغرف الفوگ بعد ماشفت ترتيبها ونظافتها جوة وسوت للبيت حيوية كلش وحتى اگلها طيب من نفس طيبة ومبينه فقيرة وطيوبة ......
من نزلت وره فترة دزت عليه الشيخه واني رحت الها لغرفتها گالتلي بنتي نسرين اريد منج تعذريها لحنان بس هيه مقهوره على اخوها هاشم لان جان هو مدللها ويحبها هواي اكثر من غيث وبعدين خسرت دراستها الي جانت تحبها .....واني هم جنت ضايجه منج وكارهه وجودج بينا لان كل الي صار بسبب اخوج بس من شفتج فقيرة وصبور وعندج گلب طيب حبيتج فاريدج تسامحيها وتتفهمين موقفها وبعد كلام الشيخه حسيت براحه واني هم گتلها شيخه اني متفهمه موقفها وهيه حقها الله يساعدها ويساعدكم واخوي غلط وغلطه مو سهله واني راضيه بقسمتي واتمنى اكون عد حسن ظن الكل انتو هسه صرتوا اهلي ومستعد اخدمكم طول العمر ومتشوفون مني شيء غلط .....
نزلت من يم الشيخه واني مدنكه راسي وهستوني دا انزل الدرج وصار بوجهي الشيخ وحسيت ردت اوگع ولزمني الشيخ وابتسم بوجهي وگلي انتبهي لتوگعين ....اويلي شصار بيه فد شعور مينوصف من لزمني وگلي هيج ......
الشيخ من جنت اصعد الدرج صارت نسرين بوجهي وحسيت بارتباكها ورادت توگع ولزمتها من ايدها وباوعت بعيونها وابتسمت وگتلها انتبهي لتوگعين وحسيت بروحي بديت اميل الها واحبها اوف يانسرين شحرگتي بيه مشاعر جنت دافنها بداخلي وگلت بعد متتحرك لبنية بعد البنيه الي حبيتها وخانتني .......وللحكاية بقية ......تابعوني وصوتولي فديتكم
