عطوة صلح

البارت 1

#عطوة صلح
البارت 1
بقلمي ملاك الصمت

قصتنه حقيقيه وهالمرة مراح ادخل خيالي راح اسرد الاحداث بصورة بحته مثل ماهيه بدون تجميل لان دواخلي ثائره ع التقاليد الظالمه الي ظلمت بنيه بعمر الطفوله وهاي قصة من بين الاف القصص الي يمكن حته متخطر ع البال حجم المعاناة الي تعانيهه البنات ببلد المفروض مسلم بس للاسف متحكمه الاخلاق ولا الدين ولا حرام رب العالمين .. يحكمه العيب والتقاليد .. صرنه نخاف من عيب الناس ومانخاف من حرام رب العالمين ..

والمعاناة هنا مو ضروري عنف جسدي وضرب .. لا اغتصاب طفوله تحت مسمى زواج وحرمان ومستقبل مجهول ..

القصه من محافظه بمحافظات الجنوب .. من العمارة تحديدا ..
لافصليه ولا هديه .. اني عطوة صلح ..
القصه اجتني عن لسان صاحبة الشأن والبنيه متابعه ويانه ..

اسمي تبارك .. عمري 13 سنه .. وعيت ع الدنيا ومصايبهه من عمر كولش صغير ..

امي وابويه عايشين الحمدلله عندي اخ واحد اكبر مني واني ومن بعدي اخت واخ ثنينهم اصغر مني ..
ابويه وامي اعمارهم صغيرة لان عدنه الرجال يتزوج بعمر صغير 16او 17سنه والبنيه بعد اصغر من هذا العمر يزوجوهه ..

واحنه كمجتمع عشائري وكعوائل منغلقه ومحافظه متقبلين هذا الوضع ومتأقلمين وياه ..
عدنه البنيه بس تبلغ تتزوج متبقى وتربى ببيت زوجهه وعيالهه ومرات حته ياخذوهه قبل لا تبلغ اذا خشنه جسم واجت قسمتهه ..
وهذا الي صار وياي .. جنت توني ثاني متوسط من انخطبت لابن عم ابويه .. يعني 13 سنه تقريبا ..

ابن عم ابويه اكبر مني بخمس سنوات ..
طبعا من اني وصغيرة يكولون تبارك لمحمود .. محمود هو ابن عم ابويه ..

فوعيت ع الدنيا واني احس محمود مالتي اليه يخصني واني مالته واخصه ..

وبس بلغت مبلغ النساء خطبوني وصرت خطيبته وعقدنه سيد رأسا ..

وطبعا اول ما انخطبت بطلت .. الدراسه مو ضروريه ولاعدنه اولويه انو نكمل دراستنه ..
البنيه تاليتهه بيت زوجهه متفيدهه شهادتهه بشي ومجبورين نتعايش ويه هالتفكير حتلو ممقتنعين بي وحتلو اكو طموح هم يقمعوه هذا قانون البنيه يمكن اقصى شي حدهه ثالث متوسط وتبطل كافي عليهه دراسه لهل حد  ..
مر ع خطوبتنه 3اشهر .. دنجهز غرفه وذهب وملابس .. مكيفه كولش .. احبه وفرحانه راح اصير اله ..
مفهومي للزواج طفولي .. مكياج وبدله بيضه ونعيش اني ومحمود ببيت واحد يعني طول الوكت هو يمي گبال عيني اشوفه ..
عبالي هذا الزواج .. وفرحانه فرح طفله من يشترولهه لعبه جديده ..

متفقين 6 اشهر ونتزوج .. بين منخلص تجهيز يعني ..

يوم من الايام صارت مشكله بين عشيرتنه وعشيرة ثانيه ..
المشكله طولت ايام وحته شهر ..
ابن عمي وولد من عشيره ثانيه تقريبا عمرة 16سنه هيج شي .. ديلعبون طوبه بالساحه القريبه يمنه وماعرف ع شنو بالضبط تعاركوا ..
ابن عمي صح هم عمرة 16سنه بس اضخم من هذاك الولد فابن عمي تعارك ويه الولد جطله بالگاع وگعد ع صدره وبالحجارة گام يضرب ع راسه الى ان الولد فقد وگامت الدمايه تجري من راسه ووجهه ..

نقلوهه رأسا للمستشفى .. ماطول الولد يومين ومات ..
صار مهادد بين العشيرتين .. عشيرة الولد المغدور هدت ع عشيرتنه ..
تدخلت اطراف طبابين خير ساده وشيوخ الهه وزنهه بين الناس واخذوا من عشيرة المغدور عطوة شكم يوم حقنا للدم .. وراهه سووا گعده ..

صار. الحكم انو تنطي عشيرتنه فلوس ديه .. 55 مليون ..
هالكلام ب 2005 وبهذاك الوقت ال 55 مليون كولش هواي .. عوائلنه فقيرة وع گد حالهه ..
عشيرتنه اعترضت عالرقم .. كولش هواي ..
اخذنه عطوة ثانيه ومادبر المبلغ وصارت گعده ثانيه ..
هالمرة اطراف تدخلت علمود يقللون المبلغ وتعويض ثاني ويه المبلغ ...؟؟؟