#بسمه
البارت 21
#ام_مصطفى
كال بسمه
صار وجهي بوجهه
شميت عطره وريحته
باوعت عليه بنظرة عتب وهو يباوعلي بقهر
مااعرف شلون دمعتي نزلت
صدوك اني أم دميعه
دموعي تنزل بدون سابق إنذار
هو من شاف دموعي نزلت
غمض عيونه ورفع رأسه ليفوك
وتحسر
مسحت دموعي بسرعه
نسيت نفسي احنه بنص العالم
دقيقه جانت بس صدك دقيقة صمت مؤلمه
نضرات محد يفهمها غيرنه
كال بسمه شلونج
دنكت راسي وحجيت بعد ما بلعت ريكي الحمد لله زينه ومرتاحه
رجعت ليوره وفتريت ودخلت المطبخ
لكيت البنات
ها بنات بشنو اساعدكم
كالوا تعالي غسلي الاستكاين
اوكي
وكفت ع السنك جان السنك بصف باب المطبخ
والمطبخ كبال باب الحوش
جانت اكو برده معلكه اباب الحوش
سد للنسوان
كام سامر يطب ويطلع
كل ربع ساعه طاب بحجه شكل
مااستقر أبد
يوكف بصفي ويسولف
ويحجي وي البنات الي بالمطبخ
كولهن أقاربنه موغريبات
بس كلها انتبهت عليه
شلون مرتبك
ويباوع علي مثل الي يتلوك الي
بسمه وبسمه كل حجايه
يسئلني بسمه هيج
اني اتصنع اني عاديه
واجاوبه عادي كدام البنات
بس كلبي يحترك عليه اووف شكد أحبه
ياربي تعبت كافي مااكدر اتحمل اني هم بشر من دم ولحم
مو من حديد إلهي ارحمني
كال بسمه اذا خلصتي اجيبلج الخضره تنضفيها
كتله اي عادي جيبها انضفها اني والبنات
كال صدك شلونج بالدراسه
الحمد لله زينه
اي احسن شي سويتي رجعتي لدراستج
ابتسمت اي صح
مااكدر احجي لأن الكل الي بالمطبخ تسمع حجينه
اني اتضاهر انو عادي سوالفنه
بس هو لا مبين عليه
عيونه وتصرفاته فاضحته
لزك اباب المطبخ
شلون ياربي
اجتي رنا طلعت من النسوان واجتي
خييير شكو أريد شي سامر
كالها ماكو شي شبيج
لا وصلتني أخبار وإني جاي الطم
سامر مكابل بسمه وكاعد
تره انت مزوج مو عبالك مراهق مثل قبل
طبعا تحجي بصوت
اني عفتهم وطلعت من المطبخ
رحت يوم راح ارجع للبيت
يا ولج عيب شكو راجعه
هستونه طبينه
يمه عندي دروس وامتحانات
وبعدين مالي خلك
أخذت جهال آمين وطلعت
شفت سامر بالباب يشرب جكاره
كال وين رايحه
ماجاوبته عاط مو احاجيج
كتله للبيت رجائا سامر مالي خلك مشاكل تره
روح لمرتك تره البيه كافيني
كال اوكفي اوصلج
كتله اندل كولش زين ميحتاج
اي وترحين وحدج
ماكو روحه اني اوصلج
اهووووووووووووووووو
اللهم طولج ياروح
وبعدين سامر تره ميفيدك الي تسوي خلص تره كلشي انتهه وإني نسيتك اي مبين نسيتيني امشي امشي اوصلج وبلا حجي زايد
طلعت امشي بصف الجادر افتريت من وره الرياجيل
تلكاني ويأشر يله امشي
شلون عبالك زوجي ومنتضرني
وخايف أحد يباوع علي
لا ويحجي بثقه ويخزر بيه
منا منا تعاي يبووي شلون تخلص وياه
مشيت وراه مجبوره لأن رياجيل كومه
وتالي وياك سامر امشي واحجي
وهو يمشي كدامي
امشي بله حجي زايد تردين ترحين وحدج شنو
معليك بيه انت مامسؤول عني سمعت لولا
طلعنا من دربونة الفاتحه لفنه ع الشارع دار وجهه علي لا مسؤول وغصبن عليج
كافي بسمه تضاهرين انت مترديني
تره اعرفج زين ومربيج ع ايدي
8 سنوات حب مو شويه تره
ادري غير ازوجت شرايد مني
احبج والله لهسه ولا ناسيج يوم
واليوم من شفتج تخبلت بالزايد عليج
مشتاقلج بسمه مشتاقلج ياروحي
كاافي سامر ارحمني انت متحس بيه
اني دا اتعذب كافي يمعود
عوفني وارجع لمرتك
مالي خلك مشاكل وياها
واعرفها مراح تسكت هسه تسويله سالفه
شحدها مو انعل والديها
كافي كافي المره هسه ميته ونعلتها
هي تدري بيه احبج شكو وافقت علي
مشكلتها بعد تتحمل اوف سامر انت الحجي وياك ضايع
اي ضايع خوش ابقى احبج لحظ آخر نفس
اي واليحب يخون
اني ماخنتج بسمه اني ردت اخلصج واخلص نفسي من العذاب الي احنه بي
وخلصت هسه انت
لا زاد عذابي بس مو مهم المهم انت ترتاحين وتشوفين حياتج
مدام هيج شكو تركض ورأيه
مااكدر اشوفج واجاهلج
مو بيدي افتهمتي
مجاي اعرف شنو تريد
اريدج تبقين تحبيني وحتى لو افترقنا مااريدج تكرهيني
أشر تكسي وكفت
صعد ليكدام هو
وإني وجهال آمين ليوره
جان بيتنا قريب اكدر اروح مشي
بس هو اجر تكسي
وصلنا نزلت
كال اني راجع وي أبو التكسي
اذا تحتاجين شي خابري
لا شكرا مااريد
دخلت جوه بالبيت
جانت مرت رائد موجوده
بين فرح وحزن مشاعري متلخبطه بوكتها
فرحانه لان شفته وحجيت وياه جنت مشتاقتله كولش
وحزن ع وضعنا
ومقهوره ع نفسي وعليه
اووف ليش هيج صار بينه
وهاي رنا شكد لئيمه
دخلت للغرفه
وقت غده فتت للمطبخ سويت اكل للجهال وكلتهم وكتلهم ناموا شويه جهال آمين كولش مطيعين ولا متعبيني أبد
بقيت اني كاعده فتحت الكتاب اقره
اجتني رساله
اليوم ردت روحي بشوفتج
قريتها وخليت راسي ع الحايط اووف وتالي وياك سامر
كافي يمعود عوفني بحالي
أريد انساك أريد أعيش
دك علي مجاوبت تالي قفلت الجهاز
سديت الكتاب ونمت
لليل اجتي امي ولج معزايه شبيج وي رنا
شكو اشو ادردم وتحجي عليج
يمه ختولي
شافت سامر واكف بالمطبخ
اجت تصيح اني شكو
شعلي بي غير رحت اساعدهم
شبيها هاي
تغار يمه حقها تخاف ع زوجها
لا تخاف لو يضل بس سامر بالدنيا
مااباوعله بعد
اي عفيه بنيتي عفيه عليج
ثاني يوم راحت امي للفاتحه
اني داومت مدرسه
ورجعت الظهر بالوحده
تغديت ونمت
وكعدت قريت شويه
بالليل رجعت امي وسمر
سمر بقت الفاتحه كلها هناك بايته
اجتي علي ولج انت ماتستحين
شعدج وي سامر دك سوالف بالمطبخ
وخليتي البنيه فوك قهرها وكسرتها ع امها تتعارك وي رجلها
شويه اثكلي استحي مالج رداد انت
ع كيفج ع كيفج شسويت اني
شسويتي شكو لازمه سامر وتسولفين وياه
ضال يطب ويطلع ع مودج
والفاتحه كلها تحجي بيكم
يكولون سامر عاشك بسمه
والله يجي رائد واكله اله اخلي يملخج اتملخ
ع شنو يملخني اني شعلي بي واذا طب وطلع اروح امنعه لو أسد حلكه اذا يحجي
والله لوما منطيته مجال ست بسمه
مجان دك سوالف وياج
لا وجماله لاحكج لهنا يمشي وراج
طب رائد شكوو
كالت تعال شوف بسمه خانم فضحتنه وشهرتنه
الفاتحه كولها تصيح سامر عاشك بسمه ع مرته
كالها شلووووون. ... وللحكايه بقيه
#ام_مصطفى
