آبلع وابلع أريد انتقم من نفسي
لحد ماكامت معدتي تفور
وتكلب
صار لعبان نفس عندي
ومغص كمت اتقيأ
وابجي حيل
اجتي امي شكو شبيج
عوفوني أريد اموت واخلص
لحد يساعدني
وج شبيج معزايه
راح اموت وإرتاح منكم للأبد
احسن مابقى طول عمري خدامه
كوه احجي الكلمه
امي كامت تصيح رائد
سمر
وإني وكعت بالكاع من المغص
ورجفه قويه صارت عندي
مااذكر بعد شصار بيه دوي صوت وغواش
حسيت بجكة ابره
بس الصوت مو واضح عندي ولا
اكدر افتح عيوني
وراسي ثكيل
شويه شويه بده الصوت يوضح
وبدت أركز
سمعت صوت سامر
هو لو أني احلم لو مجاي أركز عدل
فتحت عيوني هو اي هو
اني وين خاف متت
حركت أيدي رفعتها
تقربوا مني امي وسامر وأمين
بسمه اسمعيني
بسمه
احجي
اي
فتحت عيني بتعب
اي يا الله امي كالت اروح أصيح الدكتوره مالتها
حسيت بعطش مو طبيعي حلكي يابس
ومااكدر آبلع
مي أريد مي
سامر كال راح اجيب
كله لا ابقى اني رايح اجيب
طلع تقرب سامر
لزم أيدي
بقيت اباوع عليه بعتب
كال ليش هيج تسوين بنفسج وبيه
والله لو صايرلج شي ماابقى عايش
عبالج اني مرتاح من الي يصير
اني جاي اموت الف موته
سامر لاتعوفني فدوه
كال مااعوفج بعد
بس انت صيري زينه والله كريم
غفيت وهو يحجي
دايخه وتعبانه كلش
سمعت امي جابت الدكتوره كوه فتحت عيني
كالت لا زينه منا لباجر تطلع
ثاني يوم طلعت
آمين كال تروح وياي لبيتي
حبيت الفكره
كتله اي اروح وياك
امي ماقبلت بقيت مصره اروح
رحت وي آمين
وقررت ابقى يمه مااريد اروح هناك
آمين جاب كم حاجه من غراضي
كتبي وملابس المدرسه وملابس بيت
موبايلي
واجه
تلكتني هبه الحمد لله على سلامتج عمري بسمه
ليش هيج تسوين بروحج حبيبتي
منو يستاهل
كالها آمين عوفيها تعبانه مو وكت هالحجي
حبيبتي نورس تلكتني.
نورس بنت آمين اني ربيتها بحضني
اجتني حضنتني
فرغلي غرفه فوك كال هاي ارتاحي هنا يمي
والله كريم
صدك ارتاحيت
هبه الله يطيها العافيه أبد مقصرت وياي
رجعت علاقتي بسامر
نتخابر اليل كله
أحبه ويحبني بس بعد منحجي بطاري زواج
كال نبقى هيج والله كريم
قبلت بكلشي خلي نبقى هيج
المهم مايعوفني
ويبقى وياي مافكرت شنو نهاية
علاقتنا
جان كل همي اسمع صوته
كل همي يبقى وياي
واشكيله ويشكيلي
سامر صدك حبني من كل كلبه
جنت أحس بمعاناته
بس مابيدي شي
فد يوم امي خابرتني
شلونج شخبارج
ماالله هداج وتجين
كتلها لا مرتاحه اهنا مااريد ارجع
كالت مرت خالج اجت تخطبج لامجد
وإني كتلها ماعدي مانع بس اسئل البنيه
كتلها يوم لا أمجد ولا غيرها مااريد ازوج زين لولا
وسديت الخط
خابرت سامر كتله الي صار
تعصب وبقى يصيح
شسوي هسه اني شسوي
شلون اصرف ابقى هيج اتفرج عليج لحد ماترحين مني
لازم اسوي حل.
اليوم احاجي امي
وشيصير خلي يصير ...
امي خطبت لرائد
وباجر الخطبه
بالليل سامر خابر ضايج وباجي مبين عليه
ها سامر شصار
كال امي سدت كل الطرق بوجهي خاف جان عدي أمل امي سدته ليش شكالت
كالت كطنه وشيلها من أذانك
انت متستحي تريد تزوج وحده اخوك جان رايدها
ورفضت اخوك
كتلها يمه أحبها وتحبني اله هيج اكلج
كالت لو تموت مااخطبها اني اخطبها الك تخبلت شنو
يمه بس اني أحبها واريدها
شوف سامر اذا كسرت حجايتي
لا اعرفك ولاتعرفني
روح اخطبها واخذها ولا انت ابني ولا اني امك
كتله سامر ميخالف الله كريم
ربك يغير الأحوال منعرف باجر شيصير
المهم اني ابقى منتضرتك
ومراح ازوج غيرك
كال والله كرهت نفسي بسمه
أحس روحي عاجز ومااكدر اسوي شي
ليش هيج صار ويانه ليش كل شي صار ضدنه لأن حبنا صادق وطاهر
كافي سامر لاسوي هيج بنفسك
اني قابله أعيش هيج وياك
المهم نبقى سوه
ثاني يوم خطبت رائد
رحنا للخطبه
سامر عينه علي وصعد وياي بالسياره
كعد بصفي
يكلي مااريد أحد يباوع عليج
سمر كامت تباوع صفح علينه
سامر سمر شكت كافي
كال خلي كل الناس تدري
اني أريد يدرون بلكت يصير حل النه
مااتحمل بعد اريدج الي
تعبت وإني اشوفهم يباعون عليج وهذا الي يخطبج
وإني مثل الصنم مااحرك ساكن
أريد اصرخ بعلوا صوتي هاي حبيبتي الي من حقي اني
لزم أيدي جريتها سامر تخبلت جريتها ع السريع
وصلنا لهل العروس
جرتني سمر ولج شعدج وي سامر
باوعت عليها شكو شعندي
والله مااعرف اشو دك سوالف
ليش متعرفين سامر مثل رائد اخوي ويسئلني شلوني وع دراستي عادي
ها ويلزم ايدج
كتلها شنو يلزم أيدي هذا تفكيرج وصخ ويتهيأ الج
والله طالعلج السان
اووي عفتها ورحت
اووف سامر
العروس حلوه بس شايفه روحها
خلصت الخطبه
وطلعنا اتفقوا بعد عشرة أيام العرس
رجعت وي آمين وهبه للبيت
خابرت سامر حجيتله ع سمر
كل ختولي شكد اكرها شبيها حاقده هيج
كتله حضي غير
معليج بيها ختولي خلي تصير حجايه علواه واخطبج
اجي
المدرسه قربت ع نهاية السنه
وسادس كوه بالف ياعلي يله دخلت بكلوريا
صار عرس رائد وكلها فرحانه وتركص
اله اني وسامر الحزن مبين بعيونه
اجت ريم بنت عذراء
طبعا ازوجت ريم واحد مهندس
اجت تتفيك براسي
ماهتميت الها مالي خلكها
العرس كله نتخيل اني وسامر
كل شويه نختل بمكان ونسولف بي
شكد ارتاح بقربه واتمنى ابقى وياه هيج
صفن علي لشوكت بسمه ابقى بعيد عليج اريدج أريد اضمج لصدري واطلع كل التعب والعذاب الي شفته
كلها تستقر وتزوج واحنه نبقى هيج
الله كريم حبيبي ربك متعرف شنو كاتب النه
والنعم بالله
خلص العرس ورجعت لبيت آمين
وبدت الامتحانات ورسبت
ورائد حلف مادام بعد
وبطلت من المدرسه
ورجعني يمهم بالبيت
مرته مثله خبيثه وشايفه نفسها
وبدت المشاكل والمعانات من جديد
تشتكي علي أزهار مرت رائد
ورائد يلزمني يموتني كتل
امي تصوجني ترجع
حبلت أزهار ولازم اني اخدمها
سوو حزب علي أزهار ورائد وسمر
اشكي لسامر يكلي شسوي انت اطيني حل
ازوج ثامر
وازوج أمجد مرت 4سنوات ع علاقتنا ونفس الشيء ماكو جديد
صرت خدامه لرائد ومرته وجهاله
سامر أمه كامت تضغط عليه
ازوج وازوج وهو ميقبل
صارت مشاكل بينه وبين أهله
وإني هاي وضعيتي
تعبت كلش
فد يوم كاعدين وكالوا صار انفجار
قريب من السوك
ياربي سترك شصار
اجه رائد كال صارت لحم الناس
وسيارات الإسعاف اتجر
طبعا رائد وسامر بطلوا كن المعمل ورجعوا يشتغلون ابغداد ..
امي كالت اسم الله ياستار
اني كلبي مخموش من الصبح
دخيلك ياربي
الله لايوفقهم شرايدن من عدنا
والله تعبنا من الانفجارت ملينه
واحد مايأمن ع نفسه يطلع ويرجع سالم
حسبنا الله ونعم الوكيل بيهم
وره ساعه خابرت هبه تبجي
دكول آمين راح للسوك
وماكو جهازه مغلق
ويكولون انفجار صاير هناك
سمعنا هيج تخبلنا كولنا
كلها راحت ادور بالمستشفيات
لليل ولكينه آمين بوحده من مستشفيات بغداد
مكطع تكطع وميت
جانت صدمة عمرنا كولنا
اميين مات وشلون موته متكطع تكطع
جابوا التابوت للبيت
مرته وجهاله فقدوا من البجي واللطم
امي تخبلت ماضل شعور عدها التمت الناس كولها عدنه
صدمة جبيره موته محد متوقعها
خواتي وخالاتي وعماتي
كلها اجت تصرخ وتملخ بنفسها
اني حيل تأذيت
كمت مااعرف شنو ممكن اسوي واطلع قهري
املخ بوجهي بشعري
وكعت ع تابوته لا آمين الموته الي مو الك
انت صاحب جهال ومرته بحاجتك
اني محد بحالي
اني اموت وانت عيش
لا ياربي فدوه اروحلك
أخذ عمري وبداله
كولنا نايمين ع تابوته الولد وابوي
رائد اول مره اشوفه بهيج حاله
يشيل روحه ويدكها
كوه الناس شالت التابوت من عدنه
فقدنه كلش
صعدوه ع السياره واحنه نركض وراه لا آمين لا تروح وتعوف جهالك تره بعدهم صغار محتاجينك
صعدت وي امي وأخواتي بالسياره
اخذونه وياهم للنجف
سامر صعد ويانه
ابجي يبجي وياي
عينه علي
طول الطريق
كل شويه كال كافي يمعودات
ترحموله
ويبجي هو انوب
آمين ماعنده وجه مكروه
ملتهي بشغله وبس
كل الناس جبت عليه
دفنوا وخلصوا ورجعنا
للبيت مكسورين كسره جبيره
أخونا الجبير راح من ادينه
وللحكايه بقيه #ام_مصطفى
حبايب صوتوا للقصه ع الواتباد
