#بسمه
البارت العاشر
#ام_مصطفى
وصلونا للبيت وكالت أم محمد ارتاحوا احنه نروح
كالت كلش حبيتكم وبيكم ريحة العراق
مراح اعوفكم باجر اجي اطمن على الوالده
كل الهلا بيج خاله
راحت هي وابنها السايق
اني هم تعبت الليل كوله مانمت
سدينه الباب ونمنه وماكعدنه اله المغرب
كمت سويت اكل لأمي
جان المطبخ بي طباخ واغراض طبخ
واحنه مشترين مسواك كمت سويت تكلاه النه
وكعدت امي أكلت
ثاني يوم امي خابرت محمد السايق
خاله متجي اليوم عندي مراجعه وي الدكتور
كالها جاي بالطريق
راحوا اني بقيت بالفندق
ساعه ورجعوا
كالت كال الدكتور زينه العمليه وناجحه
بس عندي مراجعه بعد 3اشهر
لازم نرجع ليران
كتلها الله كريم
كالت امي لازم نزور الإمام الرضا
حجز النه السايق
وباجر طيارتنا لمشهد
لليل اجت أم محمد هي وبتها
رحبنا بيهم
بقوا يسولف
كالت لأمي هواي حبيتكم
واريدج تنطيني بنتج بسمه لابني
ابني مخلص كلية هنا
وهسه يشتغل بمحل ملابس
وحق زواج بس ميقبل يزوج ايرانيه
يريد اله عراقيه
وإني حبيتكم والله جابكم بطريق
محمد بلكت قسمتهم
جان دكولها امي.
والله أم محمد انتم والنعم منكم
بس هاي بنتي مريضه
قابل اقشمرج بيها
المره ضربت ع خدها يا شبيها
والله عدها مرض برأسها دوم تشكي منا
وتوكع وتتخربط دائما
فمو مال ازوجها
اني من سمعت هالحجي انصدمت
مدري شصار بيه من الخجل
كامن يباوعن علي بشفقه
ياخطيه
حرامات حلوه وهيج مرض بيها
خاف صرع عدها
اي هو يمكن صرع
وإني مقرره ماازوجها أبد
كمت منهم ودخلت للحمام وسديته
علي أريد ابجي خنكتني العبره
ليش هيج كالت خو دكول لا ماازوجها عدها دراسه
أحد رايدها
ليش طلعت هيج إشاعة علي
ضليت بالحمام ابجي
لحد ما اسمعهم طلعوا
طلعت فتحت الباب
طلعت عيوني طاكه
كتلها ليش هيج
كالت شنو ليش هيج حجيتي علي
شنو دكولين مريضه
وخليتيني بموقف محرج
كالت مااريد ازوجج
عود من اموت ازوجي
هسه اني كتلج زوجيني
جاي اكلج ليش هيج اطلعين حجي علي معقوله اكو أم هيج تحجي ع بنتها بله حجي زايد مالي خلكج روحي نامي ورانه سفر باجر
شحجي شكول
الحجي مامنه فايده وياها
رحت نمت غطيت راسي ورجعت مثل مت جنت طفله اغطي راسي وابجي جوه البطانيه
بقيت للصبح مانمت
الصبح خابر محمد كال جاي اخذكم للمطار
كمت لميت اغراضنا
وتريكنا ولبست
وطلعنا
طول الطريق الولد يباوع علي بشفقه
حتى من نزلنه ماقبل اجر الجنط
كال لا اني اجرهن عوفيهن
متت من تصرفه
حسيت بنفسي معاقه
صعدنا الطياره وودعنا السايق
وامي ولايمها ولا حاسه بيه ولا بالي كالته
سلمت أمري لله
كلت ميخالف قابل هسه اني وين راح اشوفهم
وصلنا لمشهد حجزنا فندق
هناك عبالك بنص العراق كومه لكينه عراقيين
زرنا ومن لزمت الضريح بجيت لمن مليت
بقينا يومين بمشهد
وراها حجزنا ورجعنا للعراق
رجعت للضيم
الناس كامت تجي ع امي لأن سوت عمليه
منو يجي يكل لأمي صلوات بسمه تخبل صايره عروس
امي تضوج
آخر شي كالت بعد لاطلعين للناس الغربه
اجو بيت خالتي خالتي ولدها سامر وثامر
سلمت عليهم وع خالتي
خزرتني امي بمعنا كومي
عفتهم وكمت للمطبخ ساعدت البنات جناينه
اجت سمر انت هيي
اني
اي انت لعد اني شعدج كاعده بنص الولد
ياولد همه غير ولد خالتي ورابين سوه
هذاك اول من جنتي جاهل هسه صرتي مره شكدج
شويه استحي
مشوفيهم شلون يباعون عليج
هاا مشوفين
والله ماشفتهم
عادي سولفنا ماكو شي صار
جري عدل بسمه تره يجي رائد واخلي يصرف وياج
عوجت حلكي وفتت للغرفه
صبوا الغده رحت كعدت وياهم اتغده عادي شعلي بيها اني
خلي سمر شتحجي
لعد هي مو هلكاعده وياهم
لو أني وحد
كعدت اكول وسامر يشاقه وياي ولج كبرانه صايره مره
اي لعد شعبالك ههههه
ثامر ماشال عينه مني
حتى ارتبكت كمت مااعرف اكل
جاي نأكل ودخل رائد
أهلا شباب شلونكم
خاله شلونج شخبارج مشتاقين
جان بيده علاكة ملابسه
انطاني إياهم كمت من السفره اخذتهم بوجهي غسلتهم اله
لأن أعرفه لوه يريد كولشي حاضر
بوقته
كال بسمة سويلنه جاي وجيبي
للاستقبال
البنات شالوا السفره
اني سويت جاي وجبته الهم
سامر كله متلكالي شغل وياك رائد
تره اخوك كاعد الشغل ولا عمل
كال صدك تحجي والله اليوم اندور ع عامل
هسه اخابر أبو المعمل
اني قدمت الجاي
وطلعت
سمر كالت شكو طابه طالعه يم الولد
كتلها رائد راد جاي سويتله
شعندي قابل
لا تسوين حجتج برائد ولي لغرفتج
تفترين بتراكسودج بنص الولد
شكو انت والله يا الله
خب حضي شبيها هاي ماعدها غيري ....
خلصت العطله ورجعت اداوم صف خامس علمي التهيت بالدراسه
سامر اشتغل وي رائد كام كل جمعه يجي وي رائد يبات وياه
ويطلعون ثاني يوم للمعمل
فد مره طلبت من امي تشتريلها حذاء
رائد سمعني انت عارضة ازياء شنو
يوميه لبس شكل احنه بس نجيب ونشتري لحضرتج كتله مطالبه منك اني زين
عود من أخذ منك احجي
اني اطلب من امي
كام وضربني دفعني ع الحايط ضربني بوكسي نزلت راسي انضرب البوكسي صار بالحايط ايده كامت توجعه
شردت لبدت بالغرفه وسديت الباب
وللحكايه بقيه #ام_مصطفى
