#بسمه
البارت الثامن
#ام_مصطفى
يارب تعبت من هاي البنيه نحسه كلش صايره وشايله خشمها حر الجيس
بسمه: اني الي تعبت من هاي العيشه ليش هيج يعاملوني كولهم
اني شنو مو بنتهم معقوله اطلع مو بنتهم
هااا اي يجوز صدك مو بنتهم اووف
شنو ها لأفكار التجيني مو بتهم
اوف بسمه بسمه بس عمري مشفت البسمه
أتمنى أحد يفهمني يحبني
يسمعني يحتضني ليش هيج يعاملوني اني مسويه شي الهم
معقوله صدك اني نحسه
والله مو نحسه أحبهم كولهم واتمنى يحبوني
واتقرب منهم
رائد شوف معاملته شلون وي ريم
وشوف شلون يعاملني
عبالك خادمه مو اخته ما يوم حسسني اني اخته ولا يوم سمعني حجايه زينه
ابوي وجوده مثل عدمه بالبيت
وامي صح كلشي تشتريلي وكلشي تجيبلي بس ماتحس بيه ولا تفهمني ولا يوم حسيت بمحنتها علي ولا فد يوم سئلتني شتحبين شتكرهين 😭😭😭😭😭
كرهت نفسي اووف ياريت اموت واخلص
تعودت ع معاملتهم هاي الفتره احسن من غيرها أحس
ازوجت سمر ورائد كل جمعه يجي
امي تخيط ملتهيه
كمت اخلص شغل واقره
ماعدي شي صح حاسه بوحده بس
مرتاحه ماكو مشاكل
امي قررت نتحول بالبيت الجديد
وتخطب ل آمين وزهير سوه وازوجهم وتأجر هذا البيت
وصدوك تحولنا بالبيت الجديد بيت حلو وجبير ونضيف مو مثل القديم
كامت ادور امي نسوان لاخوتي
والحمد لله لكت وخطبت الهم
وبنفس الشهر زوجتهم
صار عرس جبير وحلو كلها التمت بي كلها تسولف وتضحك
ويركصن ويهلهلن
اني صارت بيه خوفه من عرس سمر
صح بدلت ولبست ملابسه حلوه
بس لا ركصت مثلهن
ولا كعدت وي البنات
امي بس تنخي علي ضلت كومي اكعدي وهاي حالتي
طاح شغل العرس كله فوك راسي
خلص العرس ع خير
واجن الجناين مرت الجبير هبة خوش بنيه حبابه كلش
ومرت زهير هم زينه
تقاسمن الشغل
الحمد لله خف مني الشغل
اساعدهم بالخفايف
التهيت بدروسي
كلت لازم أثبت ذاتي وصاير شي
خلي اعتمد ع نفسي
لازم اخلص دراستي واتوظف
سمر وره 4 أشهر من زواجها اجت زعلانه وقررت تطلك مره ثانيه
يبوووي وردت ريمه لعادتها القديمه
حاولت ترجع بس الولد بعد مارادها
كامت تسوي مشاكل وي اهله
ويكول تلاسن وتغلط وماتسمع الكلام ولا عبالك معلمه وجبير عقلها مال جهال
بقت تخابر بي وتقنعه يطلع بيها بيت حتى لو ايجار بس هو رفض
كالها اني وياج مانتراهم
واطلكت سمر ورجعت للبيت
كامت تسوي مشاكل وي الجناين
يوميه عركه
لو وياي لو وي الجناين
امي تخاف منها متحجي وياها
حبلت مرت آمين
وأمين طار فرح بيها كيف كام يعارك سمر ع مودها
حل بيها خليها تلتهي مني
شايفه روحها سمر ولا تنكسر
بتها صارت مره ولسه ماشايفتها
اخذوها منها وشالوا محد يعرف وين ...
امي كامت كلش متشوف راجعت هواي دكاترة كالوله شبكة عينج ضاربه من التركيز بالخياط
قررت تسافر ليران تسوي عمليه
وتأخذني وياها اساعدها هناك واداريها
من سمعت سمر هيج اني اروح تخبلت وجن جنونها
شلون امي تاخذني ليران وماتاخذها
امي كالت الها اني أريدها تروح ماامن تبقى بالبيت
أريد أخذها وياي
وهي أكثر وحده اداريني
انت اعرفج مزاجيه وماتسويلج شغله عاد هي
كلشي تعرف تسوي
كوه قنعت سمر اخذتني امي سوتلي جواز الها والي
وحضرنا جنطنا باجر نسافر ليران
اجه رائد كال شنو صدك تردين ترحين ليران وتاخذين هاي وياج
اي ليش اكو شي
لا بس شمعنه هي خو اخذي امي سمر
اووو رجعنا لنفس السالفه
يعني اله اكللكم ماخذتها اشتغل عليها هناك
مو لسواد عيونها
ارتاحيت هسه
اني جنت واكفه بالممر يم الغرفه
وسمعت الحجي مالتهم
من سمعت امي هيج كالت انه نص حيلي أحس
كلش انقهرت بس مابينت الهم انو سمعت
مع ذالك ومع كل الي سمعته
بقيت مصره اروح وي امي
أريد اخلص من البيت
واطلع
بنفسي أسافر واصعد طايره ....
ثاني يوم سافرنه صعدت طايره
جنت كلش خايفه ومرعوبه
خصوصا اول مابدت تصعد الطياره
أرعبت تخيلت راح توكع بينه
جلبت بردن امي من الخوف
وصلنا بمطار طهران
جان الدكتور الي حاجزين عنده بطهران
وللحكايه بقيه
#ام_مصطفى
