#بسمه
البارت السابع
سمر الفرحه ماشايلتها
وره اسبوع اجو أهل الولد
الي طلع مزوج ومنفصل اتفقوا ع الحاضر والغايب
وحددو يوم الجمعه الخطبه سمر ممصدكه كامت تعتني بنفسها
واشترت ملابس كومه
واجت الجمعه وحضرن خواتي عذراء ونهى وجهالهن ماشاء الله
انترس البيت
التهيت وي امي بالعزيمه والغده
للعصر اجوي الخطابه
سمر طلعت حلوه لبست فستان طويل وهي صاحبة شعر طويل سرح
وعيونها اكبار وحواجبها طوال
جنها هنديه
عقد الشيخ الهم ولبسوا الحلقات
واخذو صور
وراها راحو كالوا بالعرس منطول أقل الشهر وناخذها
اهلي اكيد ماعدهم مانع
سمر بهاي الفتره له عني كلش
بقت بس مهتمه بروحها ولبس وطلعه وي خطيبها ولو بالدوام
لو بالسوك
امي كلش قست وياي بالشغل
خلته كله علي
وولد يرادلهم خدمه أركض منا وارجع منا كوه كمت الحك اقره
رائد خبيث ع الروحه والجيه يضرب ويصيح
وشكد يأمر ومايعجبه كلشي
آمين نحس يحاجي الواحد من وره خشمه
وكلشي يريده حاضر
بس زهير جان كلش فقير
وجانو مستغلينه كولش
حتى رائد أصغر منا عود
وجان يخدم عليه ويصنف
لأن زهير من يحجي يرتل شويه
بالحجي
صار عمره 18 سنه وبعده يرتل
فجانوا دوم يضحكون عليه
جان مرات يضوج ويطلع
كلش جنت انقهر عليه
من اشوفهم يصنفون ع حجيه
وهو جان كلش فقير ومايأذي أحد أبد
جان كلش حنين وحباب وياي.....
امي صلوات متلحك ع الخياط
وصارت خياطه معروفه
وصارت أحوالها زينه
ابوي هم خير من الله
والولد موضفين
امي أكثر وحده عدها فلوس.
كالت لابوي نبيع هذا البيت
ونشتري بيت جبير نزوج الولد بي
ابوي كالها لا عوفي هذا ناجره
ونشتري غيره
وفعلا اشتروا بيت
وخلوه كالوا وره عرس سمر ننتقل بيه
وصار يوم الحنه مالت سمر امي خيطتلي نفنوف وردي يجنن
من لبسته وفتحت شعري ومكيجتني نهى كلها تعجبت بيه
طولت اني وبدت ملامح جسمي تبرز
كولها الي تشوفني دكول كبرانه وصايره حلوه بسمه
البنات كامو يركصون
وإني هم ع الواهس كمت أركص
امي اشرتلي تعالي
اغسلي المواعين
كتلها ما معلي خليني وي البنات
كولها تركص حتى بنات الجيران
جنت فرحانه بلبسي
عبالك لسه طفله وافرح بالبدله
من البسها
ضليت يم بنات الجوارين وبنات عمي وريم جايه بنت عذراء
كلت أحرك كلبها
كل مره هي تجي وي امها لابسه شكل وفوك هذا سمر كلشي تشتريلها
ماهتميت لأمي من صاحتلي أبد كل همي أركص بالنص
حتى البنات يشوفن نفنوفي
خلصت الحنه وطشت النسوان
ضلت بس أخواتي
جان تلزمني امي
وتشبعني كتل ولج اني مو اكلج تعاي ساعديني
شكو تعاندين انت مستحقه الظرب
تعاندين وعنوديه كلش
لزمتني من شعري
فوتي اغسلي المواعين كولي امي خطيه رجليها رايحه من الخياط
وفوكاها تشتغل النه.
طبيت للمطبخ متت بجي
اباوع مكلوب كلاب
رحت نزعت نفنوفي مااريد يتوصخ وإني اشهك وابجي
ريم شافتني من طلعت من الغرفه كامت تتبسم بمكر علي
شبعت قهر بالزايد
كمت اغسل اماعين وابجي بسكته ساعتين يله خلصتهن
وغسلت المطبخ
بس عيوني نشفن من الدموع
كلش انقهرت خصوصا ريم كامت تضحك علي
واشوفها شلون مددلينها وامها وسمر كلشي يشترن الها
ويخلنها اطخ حاجه ثاني يوم العرس قررت ابقى بالمطبخ ولا اطلع ولا اروح للزفه
اصلا ماكو زفه راح ياخذوها كبل للفندق
هنه بدلن ولبسن كلهن وهم اجوي الجوارين
بعد اني مطلعت كمت أصب شرابت ومايات وادز بيد الجهال
بس مقهوره بكلبي كلش
ليش عود هيج امي تسوي وياي
ليش تضربني كدامهن
يعني مايصير ارتاح شويه افرح بشي
اجت الزفه وخذوا سمر وراحوا وياها وصلوها للفندق ورجعوا
خلصت من سمر وعياطها علي
وصياحها
رائد كام يشتغل بمعمل
ويبقى أسبوع يله يجي
يجي بس بالجمعه
ضاج شلون أمه سمر ازوجت
خله واشتغل بالمعمل ع مود مايتواجد هواي بالبيت
ارتاحيت هاي الفتره كلش
صدك شغل البيت كله علي
بس مرتاحه.
بس من يجي رائد بالجمعه يسويه يوم اسود علي
اله يضربني يله يرتاح
ومن اشتكي لأمي عود ليش رائد كل مايجي يكتلني ليش ماتحاجينه
جان دكول وشكو بيها واذا يضربج غير اخوج ويطلع قهره وتعبه بيج
وانت خو حر الجيس ماتتحجاين
عيني شدعوه عليج هو بس بالجمعه يجي وهم تردين تهججينه
يمه منج يمه
ماما اني مااكرهه بس هو ليش هيج يعاملني
شمسويلج ها شنو انوب اخو مايحاجي اخته خوش عياره
الله يساعدني اخواني سته
جنت نهار كله اخدمهم
وشابعيني دك
ومااحجي ولا كلمه حتى عيني ماارفعها بيعيونهم
وانت هسه السان وياهم تردين الكلمه بعشره
اني حقانيه تدرين اذا واحد ضربني بله سبب اكوله ليش شمسويه
ياا والله خوش عمي ارجعي ضربيهم بعد فد نوب
لزمتني من شعري شوفي سمر جري عدل احسلج
لا والقران اخليهم يكصون السانج انوب اذا تراددين
سمعتي لولا.
مالي خلك مشاكل تره
اشتغلي بسكوت
تره حتى مدرسه ابطلج سمعتي لولا
اي سمعت بس عوفي شعري ماما
روحي يله
وللحكايه بقيه #ام_مصطفى
