#بسمه
البارت السادس
#ام_مصطفى
ركضت صعدت ع السياج وطفرت بدون مااشوف الكاع الجواي عاليه ناصيه
من طفرت أحس رجليه تكرمت
كمت ازحف وابجي صعد
رائد كال طفرت ع الجيران وج اليوم شيخلصج
فضحتينا اذا مااكعد ابوي اوكفيلي
اني كمت اتجيت ع الحايط
جان السطح مالهم مابي بيتونه
رأسا درج ينزل ع الحوش
جلبت بالسياج وكمت انزل
واشهك بجي
شافتني أم البيت جيرانه
ها خاله ياا هاي بسمه شبيج يمه
اختنكت بعبرتي
عيوني من كد الدموع كمت اشوف غواش
خاله رائد يركض وراي يريد يذبحني بالسجين
ضربت ع خدها المره يااا عزه شمسويه ويردون اهلج يذبحوج
والله خاله كلشي مامسويه هو يكلي كومي سوي غده وإني مااعرف
وركض وراي وتالي من الخوف جيتت ع سطحكم
يااا اسم ألله
عوذه من هيج أخ
اهلج وين لعد
خاله محد بالبيت بس ابوي ونايم
دكعدي بنيتي اكعدي
خلي اجيبلج مي
راحت جابت مي وشربتني وغسلة وجهي
وجان يندك الباب
خفت
كالت لاتخافين مااطيج اله بيد ابوج
راحت فتحت الباب. اسمعها تحجي وي رائد
كالتله روح وإني اجيبها وراك
وسدت الباب
اجت كومي حبيبتي كومي
لا خاله خليني يمج لحظ ماتجي امي
لا يمه ميصير اخذج بيدي
وانطيج لابوج ومااطلع اله
وهو كاعد لبست عبايتها المره وكادتني
ودكت الباب
فتح الباب آمين
ها خاله شلونك وين ابوك
موجود خوش
صيحه لعد
فوتي خاله
اباوع علي يخزر بيه
دخلت وياها
شفت ابوي متخوصر واكف.
ويمه سمر جايه
ورائد
سلمت المره
وركضت سمر علي ولج شطفرج ع الجيران
كالت الها اليطخها والله العضيم ازعل وبعد لا اعرفكم ولاتعرفوني
شجاكم وي هاي الطفله
تره بعدها صغيره وينها
وين الطبخ كلها عمرها 9 سنوات
صدك جذب.
بعدين ولا جنها بتكم هيج تسوون بيها
عيني أبو آمين اذا مترردوها
اطيني إياها
كالها لاتخافين اني موجود بعد محد يحاجيها بعدين اكو واحد يطي بزره يا ام ليلى
زين لعد اروح واكيد ماتحاجوها
روحي الله وياج
طلعت أم ليلى
وهمه كلهم هجموا علي
ولج تردين تفضحينه
شلون اطفرين ع الجيران
شبعوني كتل
حاولت اشرد للشارع
انوب انسحلت
ابوي يتفرج ولا حجه والا كال
إلى أن كمت ازحف وانكطع نفسي
زحفت زحوف لغرفة امي
لحد مااجت امي شافتني
ضلت تحجي ليش هيج ساعة السوده عليكم
اله اعوف الشغل واموتكم جوع
حجوا وياها إلى أن قنعوها اني الغلطانه.
تالي رجعت علي ليش هيج يمه تردين تفضحينه هسه الناس شدكول علينه.
يمه رائد بيده سجين يريد يذبحني.
وج شلون يذبحج هو بس يخوفج
انت شلون اطفرين ع الجيران
مو عيب وتفضحينا هيج ماما والله خفت منا
شلون بيه وين اوديج ياربي
احسن شي اترك الشغل واكابلج وأكعد
ادري شنو صغيره مو شكبرج صرتي
وبعد شاله حالي تعبتيني موتيني
ماما والله همه
أسس كافي مو متت منج ساعة السودة الصرتي بيها .....
ضلت هاي وضعيتي
نفس المعانات ونفس المشاكل رائد كبر صار اعداديه وإني سادس ابتدائي نجحت منا
سمر توضفت معلمه وكامت ادرس
امي تركت الشغل
وكعدت بالبيت ابوي توضف
وأمين هم من صار السقوط وضعيتنيه كلش تحسنت
الولد توضفوا وسمر وابوي
ورواتب زينه
امي فتحت محل خياطه بالبيت
وكامت تخيط خير من الله
تحصل
بس صار شغل البيت كله علي
سمر متلزم عود الشخاط
وامي تخيط
تعلمت انضف وغسل مواعين
وغسل ملابس
وسوي اكلات خفايف
بس التركيب ع امي
فديوم اجت سمر من المدرسه
مبين الفرح بعيونها
امي كالت الها خير شو وجهج يضحك
كالت الها اي يمه
أريد اصارحج
اكو معلم وياي
حاط عينه علي
واليوم فاتحني راح يدز أهله
ويخطبني
وإني كلش فرحت ومامصدكه
لأن الولد كلش محترم وخوش ادمي
امي كالت يا الله ربي يفتحها بوجهج سمر بنتي
وللحكايه بقيه
#ام_مصطفى
