#بسمه
البارت الخامس
#ام_مصطفى
صارت سمر كلش قاسية وياي
والأكثر رائد يكومني بضربه ويكعدني بضربه
والله باليوم بالقليل 4كتلات انكتل من رائد وسمر
مرات ابوي موجود ويشوفهم ويسكت
يخاف من سمر لأن سمر شالت مسؤولية البيت كله بغياب امي
امي تطلع من الصبح وترجع باليل
وجانت اجازتها فقط يوم الجمعه
جنت كلش أحب يوم إستراحة امي
ابقى لازكه بيها ومجلبه بثوبها وين متروح امشي وراها
مرات تعيط بيها وج يمه فكي ياخه مني
شبيج مجلبه بدشداشتي
ماما احبج أريد ابقى يمج
اي يا أمي قابل راح أطير اني
اووف هالبت تبقى متعلقه بيها دوم
ولا تكبر
كالت يله امشينه نروح للسوك اشتريلج ملابس مدرسه وجنطه
بعد أسبوع الدوام مدام كاعده اليوم
وصدك اخذتني للسوك اشترتلي حذاء وجنطه وقميص ابيض
وصدريه وشرايط بيض وشرايط احمر
شكد فرحت بيهن كمت انكز بالسوك
امي جانت كلش مدللتني كولشي تشتريلي وبعد ماخالتني محتاجه شي
بس للاسف جانت هاملتني وماتدري شي عني
جانت تجي لو تلكاني نايمه لو بغرفتها ابجي
وحابسه نفسي
من تسئلني ليش تبجين اكلها ابجي عليج
تحضني وتنومني
سمر بعد مااخذ ريم قررت تكمل معهد معلمات جانت عدها شهادة ثالث متوسط
وقدمت أوراقها للمعهد
وداومنا سوه اني اروح للمدرسه وهي للمعهد ورائد صف خامس
اول يوم اداوم للمدرسه
كلش فرحت
وره أيام صارت عندي صديقات العب وياهن أمنيتي جانت أحد يلعب وياي
من جنت اشوف ريم ورائد يلعبون
أتمنى اروح العب وياهم
بس همه مقبلون يدفعوني ويكولون وخري انت مو اختنا
جنت انقهر وابجي وأبقى اباوع من بعيد عليهم اضحك وابتسم ع ضحكهم ....
فديوم جاي اكت بالواجبات
واجه رائد
كال كومي يله كومي شنو شتريد كومي جيبيلي مي من المجمده عطشان أريد اشرب
ماءءء معليه أريد اكتب
روح انت اشرب
ولج انت دكولين ماءء اوكفيلي
لزمني من شعري كطع شعري تكطع
كمت اصرخ حيل
اجت سمر ولج صخيمه شبيج شوكت نخلص من صوتج المزعج
سمر شوفي رائد اشسوه بشري
ليش بله سبب اعرفج لئيمه ومكروها
رائد .. ماما سمر كتلها جيبيلي مي
ساعه اتوسل بيها متقبل
ولج ليش متجيبين اله مي
مو جاي اكتب
وج كولي خبيثه مااجيب
دتعاي خلي افوخ كلبي بيج
لزمتني خلصتني كتل
وج فوك ما تحمله عيارتج ودوختج انوب
حتى ماتتأمرين
اي عيني مو عدج خادمه سمر
تخدملج
قررت بس تجي امي احجيلها
لليل اجت امي
كتلها ماما يوميه يكتلوني من ترحين والله اضل بس ابجي النهار كله
لو رائد لو سمر
امي صاحت ع سمر
اجت سمر ليش هيج وي بسمه
شمسوين بيها
ليش تكتلوها صدك جذب سمر
اني مامنتها عدج
واروح اشتغل ورجلي اتكرمت من المكينه
حتى اجيب لكمه الكم ..
وأنت صدكتي بيها
هاي وحده جذابه منو طاخها منو واصل يمها
فوك مامتحمله تعيقلها
وج فوكاها تشكين علي دتعالي
كامت وسحلتني من حضن امي
وشبعتني كتل
ورجعت ع امي منا هيج شوفيلج خدامه لبتج وولدج
فوك ماخادمتهم انوب يشكون علي
امي خافت لا تسويها صدك
رجعت ضربتني ولج اجذبين
كله من وراج راح تهج البنت
ماما والله ما اجذب رحت كالعاده لبدت جوه بطانيتي ابجي
وخايفه ارجف من الخوف باجر من تروح امي شيخلصني من سمر
من الصبح امي كعدت جرت أذني كالت ولج بسمه اني رايحه مااريد مشاكل وي رائد و سمر
سمعتي لولا
اي ماما والله بعد كلشي مااحجي
بدلتلي امي وكالت يله امشي
اعتذري من سمر
وروحي مدرستج
رحت اعتذرت منها
العفو سمر بعد اسمع كلام وماابجي أبد
يله خلي نشوف بلله
مرت الأيام وبقت معاملة رائد نفس الشي وياي
وسمر ادافعله بس اني كمت من ابجي
ابجي بسكوت
نجحت من صف اول للصف الثاني
فديوم محد بالبيت موجود جان بس رائد ونايم كلهم
طالعين
كعد رائد من النوم
كال وين امي كتله طلعن مااعرف وين وابوي نايم جوه هو وأمين
هسه اجو تعبانين
كال فوتي سويلي غده جوعان
كتله مااعرف شلون اسوي
كال جذابه كلشي تعرفين
والله مااعرف حتى طباخ مااعرف شلون أشغل
كومي لج كومي يله جوعان بسرعه كليلي بتيته
والله مااعرف
والله اذا مادكومين اموتج خلاص
رائد والله مااعرف
اوكفيلي تعاندين اليوم اله اذبحج بالسجين
رأسا ركضت وهو ركض وراي
صعدت فوك أركض اجه يركض
وج اتشردين مني اليوم اموتج
اليومي شيخلصج مني
كمت أركض بالسطح
وصلت لنهاية السطح جان سياج بينه وبين جيرانه
تقرب مني خفت منه بيده سجين
ركضت صعدت ع السياج وطفرت
وللحكايه بقيه
#ام_مصطفى
