#بسمه
البارت الثاني
#ام_مصطفى
شجاها وهيج اختنكت وسكرت بجي
اسم الله اسم
اللهم صل على محمد وال محمد
ولج جيبي القرآن افتحيه بوجها
اي أي ماما
بسم الله الرحمن الرحيم
افتحي وسدي 3مرات
اي سويت
بسم الله الرحمن الرحيم
اللهم صل على محمد وال محمد
سكتت
اي يمه لعد شلون القرآن بي شفاء لكل مريض
وين صار المي وشكر
هاج شوفي هاي سمر ادزيها شغله متجي بعد
اروح اني احسن
اي روحي بنيتي
اوف سمر
ولج سمر شسوين كاعده وين المي وشكر
اوو نسيت شصار ميصير واحد ينسى
انت شبيج شجاج هيج نحسه صايره
يانحسه الله عليج اسوايه امج اسويها مره شكبرها شكدها
تحبل وتجيب
حتى استحي اكوله لمهند
امي جابت والله يا الله
لا وانوب ابنيه وعابت الها خبصتنه من اجت للدنيا ولهسه
دكومي كومي هذا الحجي ميفيد هسه
اي كايمه راح تجي عمتي أم مهند
تاخذني اناجر بدلات الحنه والعرس
هسه صايره دايره اروح وحدي
شكللها امي جابت اوف
دكومي كومي سويتيها قصه
وشنو يعني نص نسوان العراق يحبلن ويجيبن بهيج عمر قابل بس امي شنو
بعدين شدكولين علي مزوجه وعدي اثنين جهال وامي تحبل
اكلتها وسكتت
حتى عمتي دكلي شني امج
بزون يوميه جايبه
كتلها رزق الله شتسوي
انطيني انطيني خلي اشرب الطفله
صدك شسموها هي
ماادري عابت الها الفكر
مااجت اله وي عرسي كافي شكد تلحين
روحي البسي وحضري روحج خاف تجي المره عمتج
ولاتحجين هالحجي يمها ..
ها يوم نامت الطفله اي يمه نامت صلوات بس فتحي القرآن بوجها نامت
لعد سويت الها مي وشكر
عوفي من تكعد نشربه الها
اكلج يوم شسميتها البنيه
سميتها بسمه
حلو الاسم دوم البسمه يارب
أم مهند راح تجي تأخذ سمر يرحن ياجرن بدلات
ادري هسه شصار لو ياجلون العرس فد اسبوعين 3
ع ما اكوم ع حيلي اوف منج سمر طايره طايره ع العرس
والله ماادري بيها بس هي ماكايله امي جابت مستحيه منهم
يا وليش تستحي بله شو عمتها عدها طفل عمره 5سنوات بعد شكو المستحه
والله ماادري بيها اني
عوفيها معليج بيها خلي تروح
آندك الباب يمكن اجت أم مهند خلي اشوفها بالله
هله هله خاله تفضلي
زاد فضلج عيني اليوم عذراء اهنا شعجب
اي والله خاله مو امي جابت
يااا خطيه والله امج بطرانه شلها بالجهال بهالعمر
هلو عمه شلونج
هله سمر شلونج
شوفي عفيه من هسه اكلج احنه مانريدج تكوم جهال مثل امج تكومين
عمه هسه خلي ازوج والله كريم
يله يله خلصتي هسه
مهند ينتظرنه بالتكسي
اي بس اجيب جنطتي
يله اني طالعه انتظرج بره
اي أي مااتاخر ...
شفتي شلون كله من امج دكافي كافي يمعوده شنو شمسويه امي بايكه ناهبه الحمد لله والشكر
روحي روحي وره عمتج ...
ها يمه اجت أم مهند
اي اجت وراحت شايله خشمها ع شنو ماعرف عشتو
غير اختج هاي كله من وراها دكت رجل اله مهند
ياريت بي خير فد واحد مطيرجي ولاشغل ولا عمل
خليها هي بعد اختارت ...
وتزوجت سمر
وبسمة يوم عن يوم تكبر بس هوايه تبجي ومتعلقه بامها كلش
حتى يسموها نحسه متريد أحد
حتى أختها نهى مو هالكد تريدها كلش متعلقه بامها
رائد من ازوجت سمر صار نحس كلش لأن سمر مربيته
ويصيح الها ماما
كام من يشوف الطفله لو يضربها لو يعضها وتضل تبجي
حبلت سمر وحملت عذراء سوه
بدات أيام الحصار
الاب
أم آمين شلون بله بينه أبو المطعم يكول بس ها لشهر وعزل المطعم
شلون بينه منين انعيش منين نأكل
هو اني عامل هناك وعيشتنه ع المطعم
مااعرف أبو آمين الله كريم ربك ماينسى عبده
والنعم بالله بس ربكبتي عائلة منو الكم
من باجر اطلع ادور شغل بلكت الله الكه شغل
اي ان شاء الله بلكت ربك وتلكه
وهاي الطفله صار عمرها 8 أشهر
وهواي نحسه ع طول مجلبه بي
وذا رائد خال كوره من كورها كل شويه ضاربها
تربيت سمر بعد
اي عفيه نهى تعاي اكلج
فدوه بنيتي شيليلي اختج شويه خلي اخبز موتتني
يمه انطيني اي شغل ولا بسمه
مااريدها نحسه ومجلبه بيج
وتضل تبجي متقبل بيه
شلون لعد مو طاح العجين
دجيبيها كعديها يمي واكعدي بصفها
وإني اخبز بلكت تكست تعبتني هالبت
مدري منين اجتني اني عايزه ضيم ..
مرت الأيام وأبو آمين بطلوه من المطعم وضل يدور شغل وماكو
أيام حصار والناس حصره عليها الخبز
ألام كامن تخبز للجوارين
والتحصله توكل بي
والأب كام يشتغل عماله يوم يشتغل وعشره كاعد
جابت سمر بنيه وره فتره
اجت سمر زعلانه رجلها كتلها وطاردها
ولج شبيج منو مسوي هيج بيج
يمه هذا مهند موتني كتل
ليش ولج شمصخمه
يمه كلشي ممسويه
بس لأن الح عليه اكله اطلع دور شغل متنه جوع
وعمتي ترجع علي
ع الطالعه والراجعه اتسمعمي حجي
حتى الأكل كاطعته علي
شسوي كليله
والله يمه طبج طوب هذا اختيارج بعد
شيلي بنتج رضعيها ماتت بجي
اوف نوسه حبيبتي
هاي الشي الحلو الوحيد الي حصلته من مهند بنيتي حبيبتي ..
سمر اجت ماما سمر حبيبي رئودي شلونك مشتاقتلك
زين اني هم مشتاقلج
امي ولا تحبني مثلج كله شايله هاي بسمه
ولج بسمه صخمه ولي وخري وخريييي
شبيج وياها ع كيفج سمر طفله وتصيحين عليها
مشوفيها لزمت بنتي تريد تخرمشها
وخري منا وخري
تعالي ماما تعالي حبيبتي
خلي اروح لبيت أم زهره
واخذها وياي
شكو رايحه أم زهره كالت اكو معمل مفتح مال خياطة ملابس
ويردون عاملات بي بلكت أحصل ع شغل وياهم
اني رايحه وانت روحي ارتاحي
خلي اشوف بلكت اتذب اسمي
ويطلع واشتغل وياهم
وللحكايه بقيه
#ام_مصطفى
