الحلقة الثالثة والثلاثون

8.2K 162 0

: في فيلا رأفت الصياد ،،،، طلبت شاهي من أدهم أن تتحدث معه قليلاً ، فتوجها سوياً إلى غرفة المعيشة و... -شاهي: تسمح تقولي انت بتعمل ابه مع البنت دي ؟؟؟؟ -أدهم: بعمل معاها ايه ؟؟ وضحي كلامك ، أنا مش فاهم -شاهي: يعني يصح المنظر اللي أنا شوفتك بيه ده -أدهم: عادي ، مكونتش بعمل حاجة غلط -شاهي : أدهم انت عارف كويس ان الحاجات دي بتضايقني ، وأنا مش بحب أشوفك مع أي واحدة -ادهم بعدم اكتراث : بس دي مش أي واحدة دي يارا بنت عمي -شاهي : ماتقولش بنت عمك !! الكلمة دي بتعصبني -أدهم : شاهي قوليلي عاوزة ايه وخلصيني -شاهي : عاوزاك تقطع علاقتك بالبت دي -ادهم: ليه ان شاء الله -شاهي : لأني ..لأني آآآآآ -ادهم: بصي عشان تريحي نفسك ، أنا مش بقطع علاقتي بأي حد ، عاجبك على كده ماشي ، مش عاجبك .. يبقى it's up to you -شاهي: يعني ايه -ادهم: يعني روحي اقعدي مع فيرووو ، وخليني اطلع أرتاح شوية -شاهي بضيق : اووووف ............. توجهت شاهي إلى فريدة لتتحدث معها بشأن ما حدث مع أدهم و... -شاهي : أنطي فريدة ، ازاي حضرتك ساكتة على كل اللي بيحصل ده ؟؟؟ -فريدة: ومين قالك اني ساكتة ، أنا هتصرف -شاهي: هتتصرفي امتى يا أنطي ؟؟ لما أدهم يتجوز الزفتة دي -فريدة: مش هيحصل الكلام الفارغ ده طول ما أنا عايشة ، أدهم بس بيحب يغيظ فيا ،وعارف اني بضايق من الكلام ده فبيقوله عشان يخليني أسكت -شاهي: أنطي أنا ممكن يجرالي حاجة لو ادهم متجوزنيش -فريدة: اطمني ، أدهم هيكون ليكي مهما حصل -شاهي: طيب وحفلة عيد ميلادي مين اللي هيعملهالي ؟؟ -فريدة: أهي حفلة عيد ميلادك دي هتكون أخر ليلة للزفتة دي في الفيلا هنا -شاهي : بجد ؟؟؟ طب ازاي يا أنطي ؟؟؟ -فريدة: أنا في دماغي فكرة ، وهنفذها يوم عيد ميلادك -شاهي : ايه هي ؟؟ -فريدة: هتعرفي لما اظبط الدنيا ، بس عاوزاكي تطمني ، الهبابة دي مش هتعمر في البيت ده ....!! -شاهي: يا ريت يا أنطي يا ريت .......................... في صباح اليوم التالي ،،، في غرفة فريدة ،،، -فريدة: اعمل حسابك تجيب هدية شيك وقيمة لشاهي -رأفت: بمناسبة ايه ان شاء الله -فريدة: عيد ميلادها -رأفت: الله مش كنا لسه محتفلين بيه من شهرين تلاتة -فريدة: لأ ده كان عشان نجاحها -رأفت: ربنا يسهل -فريدة: اديني بقولك وبأكد عليك اهوو عشان ميبقالكش حجة -رأفت: طيب -فريدة: أقول لصباح تحضرلك الفطار -رأفت: لأ ، أنا هفطر في الشركة -فريدة: في الشركة !!! وده من امتى ؟؟؟ -رأفت: التغيير مطلوب يا فريدة ، لأحسن ساعات الواحد بيحس انه بيجي عليه وقت وهيطق من عيشته ، فلازم يغير شوية -فريدة: ممم.... -رأفت: اشوفك ع الغدا ................. في غرفة أدهم ،،،، استيقظ عمر مبكراً ، وذهب إلى غرفة أخيه ادهم ليقترض منه بعض الأموال و... -ادهم: يعني انت صاحي من بدري عشان الحكاية دي -عمر: أعمل ايه بس محتاج الفلوس ضروري -أدهم: طب ليه ؟؟ -عمر: آآآآ... يعني عاوز اجيب حاجة نقصاني -ادهم: ممم.. -عمر: متقلقش هبقى أردهملك قريب -أدهم: منين ان شاء الله ؟؟؟؟؟ -عمر: من مصروفي -أدهم: وانت بتاخد غالبية مصروفك منين ؟؟ -عمر بثقة: منك طبعااااااااااااااااا -ادهم: يعني من دقنه وفتله !! -عمر: بالظبط كده -ادهم: طب انجز في يومك وقولي عاوز كام -عمر: احم... يعني مش كتير -أدهم: عاوزك كام يا بيه ، خلصني بقى عاوز ألحق أروح الشركة -عمر: ماشي ، يعني ألفاية -ادهم: نعـــــــــــــم ؟؟؟؟؟ ليه هتجيب بيهم ايه ؟؟ -عمر: هاقولك بعدين -ادهم: ماشي !! افتح الدولاب وخد منه ألف بس -عمر: حبيبي يا ادهوووم أخذ عمر ما يريد من أموال من أخيه ثم توجه إلى غرفة خالد ليقترض منه بعض الأموال و... -خالد: عاوزهم ليه -عمر: مزنوق أوي ، ومحتاج اشتري حاجة مهمة -خالد: طب ما تقول لأبوك -عمر: ما انت عارف بابا مش هيرضى يديني حاجة -خالد: اوعى ياض تكون ماشي في سكة الـ آآآ... -عمر: ولا أعرفه وربنا ، ده أنا أخري بلاي ستيشن -خالد: ماشي ، عاوز كام ؟؟ -عمر: ألفاية -خالد: نعم ؟؟؟ ليه كل الفلوس دي -عمر: بعدين هاقولك ، بس عاوز تتأكد ان فلوسك رايحة في الحلال -خالد: ولو اني شاكك فيك -عمر: أنا هردهوملك -خالد: ده باعتبار انك ردتلي حاجة قبل كده -عمر: لأ طبعااااااا ... بس النية موجودة !!! -خالد: يا سلااااام -عمر: طبعاااااا، والأعمال بالنيات -خالد: الصراحة الايمان بيشع منك -عمر الله يخليك يا خالوودة ، ها هتديني الفلوس ؟ -خالد: اتفضل .. -عمر: حبيب قلبي ، ربنا ما يحرمني منك خرج عمر من غرفة أخيه وهو يفكر ممن سيقترض المال أيضاً و.. -عمر في نفسه : الوقتي أنا خدت فلوس من ادهم ومن خالد، فاضل مين تاني أخد منه ..مممم... ماهو مش هينفع ماما هتعملي تحقيق ، ولا روحت لبابا برضوه هيتعملي سين وجيم ، أحسن حاجة أكلم الواد رامي وأخد منه أي حاجة واهو كده أنا قربت من المبلغ المطلوب شوية !! ..................... خرج ادهم من غرفته ليتفاجيء بوجود والدته تنتظره على الباب و... -أدهم بدهشة: ماما ، في ايه ، واقفة عندك ليه؟؟؟ -فريدة: عاوزاك -أدهم: معلش أصل أنا مستعجل -فريدة: مش هعطلك كتير ، بس عاوزاك تفضي نفسك عشان عيد ميلاد شاهي -ادهم بضيق: ربنا يسهل -فريدة انا وعدتها انك هتعملها حاجة محصلتش -ادهم: ماشي ماشي ، في حاجة تانية ؟؟ -فريدة: لأ نزل أدهم للأسفل ، بينما وقفت فريدة مع نفسها و.. -فريدة: كل حاجة هتنتهي يوم العيد ميلاد .. نهايتك قربت يا بنت الخدامين !!!!! ................. في شركة الصياد ،،،، وصل رأفت ومعه يارا إلى الشركة ولحق بهم خالد وادهم ... توجهت يارا إلى مكتبها ، بينما جلس أدهم مع خالد في نفس مكتبه إلى حين الانتهاء من تجهيز مكتبهم و.. -أدهم: بس مكتبك شيك يا خالد ،أنا مخدتش بالي الصراحة منه امبارح -خالد: أها .. مكتبك هيكون ع نفس المستوى متقلقش -أدهم: تمام -خالد: أنا هاروح أظبط الاجتماع مع الوفد الالماني تحب تحضر معايا التحضيرات -ادهم: لأ أنا أعد هنا شوية -خالد: اوك انصرف خالد إلى غرفة الاجتماعات بينما قرر أدهم الاتصال بيارا و.. -أدهم: الووو -السكرتيرة: أيوه يا فندم -أدهم: كلميلي الآنسة يارا وخليها تيجيلي فورا -السكرتيرة: حاضر يا فندم -أدهم في نفسه : أما نشوف بقى يا ست يارا هانم ، هتفلتي مني ازاي .................... في مكتب يارا،،،، كانت يارا مشغولة فيما لديها ، فرن هاتف المكتب فأجاب الأستاذ منير كعادته و.. -منير: الوو... ايوه -المتصل : ......................... -منير: حاضر -المتصل : ....................... -منير: سلام -منير : يارا يا بنتي -يارا: ايوه يا أستاذ منير -منير: المهندس خالد عاوزك عنده في مكتبه -يارا: عاوزني ؟؟ ليه -منير: مش عارف ، بس السكرتيرة بتأكد عليكي تطلعيله الوقتي -يارا: والله أنا ما فاضية كل شوية أطلع وأنزل وأنزل واطلع ، أنا عاوزة اخلص اللي ورايا -منير: ده برضوه المدير ، واكيد في حاجة مهمة عاوز يبلغك بيها -يارا: ما أنا كنت في وشه في البيت ، ولا هو الشخط والنتر ماينفعش إلا في الشغل .. -منير: معلش يا بنتي ، وكده كده انتي في وقت البريك ، يعني مش هتضيعي وقتك –يارا : امري لله أديني طالعاله ............. توجهت يارا إلى المصعد لتستقله إلى الطابق العاشر ، وبينما هي داخل المصعد ، انقطع التيار الكهربائي فعلق المصعد بها و... -يارا وهي داخل المصعد: يا ساتر يا رب ، وده وقتك .. اوووف ، هما هيشغلوا المولد الاحتياطي امتى ؟؟ أل كنت ناقصاه انه يعطل بيا ................. في نفس الوقت في مكتب خالد ،، -أدهم في نفسه : ايه اللي أخرها كل ده ، دي لو طالعة على رجلها مش هتتأخر الوقت ده كله .. ماشي يا يارا ، بتتقلي عليا ، ومقضاياها مع خالد .. طيب ، يومك مش فايت ........!!! ................. في داخل المصعد ،،، -يارا: الله ! كل ده المولد ما اشتغلش ؟؟ هو في ايه اللي بيحصل بره ، لأ كده كتير بجد ، هو أنا هفضل محبوسة هنا كتير !! ............... في مكتب خالد ،،،، كان ادهم يشعر بالضيق لعدم وصول يارا إلى الآن ، فقرر أن يطلب من السكرتيرة أن تطلبها مرة اخرى وتؤكد عليها الحضور للمكتب للأهمية و... -أدهم بضيق : اوووف ، انتي ناوية تيجي لما خالد يشرف هنا ولا ايه بالظبط ؟؟ -ادهم هاتفياً للسكرتيرة : الووو ، شوفيلي الآنسة يارا مجتش لحد الوقتي ليه -السكرتيرة : حاضر يا فندم ................. في مكتب يارا ،،، رن هاتف المكتب فأجاب منير و... -منير هاتفيا: ألوووو -المتصل: ...................... -منير: لأ هي طلعت من بدري -المتصل: ............................ -منير: حاضر ، لو جت الوقتي هبلغها تطلع فوراً ، لان ممكن تكون راحت الكافتيريا ، ده وقت البريك وحضرتك عارفة ده -المتصل: ......................... -منير في نفسه : أكيد هي طالعة على رجلها ، ماهو النور قطع أول ما مشيت من المكتب ، والمولد فيه مشكلة وبيتصلح ، وبعدين الأستاذ خالد أصلاً مش بعوايده يتصل كل شوية ، لازم يكون في حاجة مهمة حصلت وهو عاوزها فيها ..................... في مكتب خالد ،،، دلف خالد إلى المكتب ، فوجد أدهم جالساً وعلى وجهه الغضب و... -خالد : الواحد كان بيظبط الدنيا وفجأة النور يتقطع والزفت المولد فيه مشكلة ، والواحد مش عارف يكمل شغله .. الله .. أدهــــــم -أدهم: ايه في اييييه ؟؟ -خالد: مالك مضايق ليه ؟؟؟ -أدهم: مافيش -خالد: ممم.. ازاي مافيش وانت وشك عليه الغضب كده -ادهم: أنا كده ياخي ، وشي ملامحه كده -خالد: طيب خلاص ، المهم أول ما ترجع الكهربا تاني عاوزك تيجي معايا اوضة الاجتماعات عشان آآآآ -أدهم مقاطعاً: ربنا يسهل لما أبقى أفضى -خالد: تفضى ؟؟ ليه انت وراك حاجة -ادهم: لأ ................ في المصعد ،،،،، كانت يارا تشعر بالقلق والاضطراب لبقائها داخل المصعد و.. -يارا : لأ كده كتير بجد ، انا ممكن يجرالي حاجة ومحدش هيحس بيا هنا ، أنا لازم أعمل اي حاجة أخليهم ياخدوا بالهم ان في بني آدمة محبوسة جوا الزفت ده بدأت يارا بالطرق على باب المصعد بقوة في محاولة منها لأن يستمع إليها أي أحد و.. -يارا (طق...طق...طق ....طق ) : في حد سامعني ، أنا محبوسة هنا جوا الأصانصير ، ياااااااااااهووووه ، حد سامعني ، يا ناااااااااااااااس .. ................ في مكتب خالد ،،،، دلفت السكرتيرة إلى داخل المكتب لتبلغ المهندس خالد بأن هناك عطلاً في محول الكهرباء المغزي للشركة ، وأنه سيتم العمل فقط بنصف الطاقة لحين انتهاء شركة الكهرباء من اصلاح العطل و... -السكرتيرة: بشمهندس خالد -خالد: خير -السكرتيرة: حضرتك اتصل مسئولين الصيانة بالشركة وقالوا ان في عطل في المحول الخاص بالشركة ، وهما شغالين عليه -خالد: اها .. طب والمولد -السكرتيرة: في قافلة في الكهربا وبيحاولوا يصلحوها ، وبيبلغ حضرتك مهندس الصيانة ان نص الشركة بس هيشتغل والنص التاني لأ -خالد: اوووف ، ماهو معنى كلام ده ان الجانب البحري مش هيكون شغال !! مشكلة فعلا ومش وقتها خالص ، طيب ومقالش هتتحل في اد ايه ؟؟؟ -السكرتيرة: مش قبل 6 ساعات ع الأقل !!! -خالد: يااااااه ، كل ده !! -السكرتيرة: الموظفين حالياً في وقت البريك ، تحب أبلغهم بحاجة ؟؟؟ -خالد: الكل يشتغل عادي لحد ما نشوف قرار مهندس الصيانة النهائي -السكرتيرة: تمام يا فندم كان أدهم يشعر بالضيق لعدم حضور يارا ، لذا قرر أن ينزل بنفسه إليها ليرى سبب عدم مجيئها و... -ادهم مقاطعاً : خالد -خالد: ايوه يا أدهم -أدهم: بقولك ايه ، أنا نازل شوية وراجع -خالد: رايح في حتة ؟؟ -ادهم: هه.. لأ .. ده أنا بس همشي رجلي كده وأمر على المكاتب وأشوف الدنيا ماشية ازاي -خالد: ماشي ، مافيش مشكلة -أدهم: اوك انصرف أدهم من المكتب بينما أبلغ خالد السكرتيرة بـ.... -خالد للسكرتيرة: طيب بلغي مهندس الصيانة انه ينجز في أسرع وقت -السكرتيرة: حاضر يا بشمهندس -خالد: كنا ناقصين المحول ده كمان !!!!!! ....................... في داخل المصعد ،،،، كانت يارا على وشك الانهيار لأنه لا يوجد أحد يجيبها رغم استغاثتها المستمرة و... -يارا: حرااااااااام ، محدش سامعني ، يااااااا ناس أنا محبوووسة جوا ، أنا هتخنق هنا وأموووت ، الحقووووووني ، حد ساااااامعني ............................ !!!!

الفريسة والصياد اقرأ هذه القصة مجاناً!