الجزء الاول

5.1K 198 23


#رماد
بقلمي فردوس عبد اللطيف
الجزء الاول. حقيقية
بسم الله الرحمن الرحيم
ليس كل القلوب مملوءه هناك تمزقات ...يتركها الراحلون فراغات لا يمكن ان تعوضها بشخص اخر
الأرواح كالألوان اذا رحل عن حياتك اللون الأبيض قد يواسيك اللون الرمادي لفترةت ويخفف عنك بعض الالم لكنه مهما كان مخلصا لن يصبح أبيضا في يوم من الايام
السلام عليكم. أنا شهوب ...من الحله نعيش بمنطقه زراعية تخصنا عمامي وولد عمامي وإخوتي الله يحفظهم 7اخوان عدنه البنيه حدهه تتعلم للثالث متوسط بعد تكعد بالبيت تنتظر يتقدملها العرسان ووظيفتهه الزرع والطبخ والتنظيف البساتين مالتنه متداخله مع بعض ابن عمي اسمه علاء تخرج ضابط طيار ولازم يزوجو واحنا بنات العم مؤهلات الي بعمري كدامه ثلاثه بس هو اختارني الي ... وتقدملي وتزوجنه عشت وياه احلى ايام وبنات العم كلهن جانن يتمنن يخطبهن صارت العيون علي ..حسدوني وبعد جابلي ذهب هواي واهلي انطوني ذهب صارت عندي علبه مليانه ذهبات بسنه 1987 وجبت بنوته تخبل سميناها رماد ما اعرف ليش علاء سماها هالاسم بس الي اعرفه هو يحب اللون الرمادي
بعد رماد لازم احبل لان لازم يجي الولد من جبت الولد والكل فرحان حتى علاء يكوله انت سندي وظهري اني مهنتي ماموجود يمكم على طول ابني هو رجال البيت
من بدء يكبر ابني جاء اليوم المشوؤم وعمر ابني 6اشهر سنه 1989 ودعنه علاء مثل كل مره بس هالمره حسيته عيونه مدمعه ويبوس بالجهال سلم عالكل وطلع لكن الاقدار تسرق الاحباب مهما كنا حذرين توفى زوجي بحادث سير وتركني ارمله مع طفلين لسه يحتاجون رعايه سنين لازم أتكفل بتربيه بنتي وابني وأكون أنا الام والاب صحيح بيت عمي اهل زوجي كبير واسع يتوسطه ساحه كبيره وعلى الجوانب غرف اخوة زوجي الاخوان كل واحد يسكن مع زوجته واطفاله بغرفه ترتيب حياتنا طابع ريفي مزارعين واصحاب بساتين والخير ينهال عليهم مثل المطر وبكل المواسم من حيث التمر والخضر والحنطه والشعير وكل انواع المحاصيل
زوجي علاء كان سند لوالده وهو الكل بالكل وكان الابن الأكبر وكنت أنا مدلله واحتار وين أودي الفلوس
لكن من توفى زوجي كلشي تغير حياتي وحياة اطفالي تغيرت
والرحمه والعطف والحنان والاحترام كلهه انتهت مع وفاة علاء وكأنها مصلحه وانتهت واعتبرونه غرباء لان بعد وفاة زوجي ما النه حصه باملاكهم وصرنه غرباء وثقيلين عليهم
صرت اطلع اشتغل وياهم بالزرع حالي حال الغريبه حتى اعيش اطفالي لان راتب زوجي قليل وميكفي
اخوان زوجي وابوه هملونه وبدو يستحقرونه
حا اتركم مع بنتي رماد
مرحبا أنا رماد عمري حاليا 29 سنه حبيت اسرد الكم قصتي يمكن تكون عبره لبنات غيري يستفادون منهه خريجه بكلوريوس علوم نفسيه واجتماعية بس ما متعينه مواصفاتي سمراء حنطاويه عيوني عسليه كبار شعري اسود طويل رشيقه طولي 150 وزني 60 فتحت عيني عالدنيا ابوي ميت اشوف اطفال عمامي وخوالي عدهم اباء ويشترولهم ويهتمون بيهم الا اني واخوي بس كنا وسط هوسه العمام والخوال بس مانفهم شي بس يسمونه الأيتام ومن اسال امي وين ابوي دكول مات بس ما اعرف شنو معناتهه
الطفل بعض التصرفات تبقى في تفكيره وتحز بنفسيتهه لحد الان اتذكر مره جدي اجه من الزياره وبدء يوزع الهدايا لأحفاده كلهم ماناسي احد بس اني واخوي بقينا وجهنه فاهي والدمعه بعيونه بوقتهه الهديه كانت بسيطه وما الهه قيمه لكن كانت كبيره بنفوسنه وأثرت بداخلنه ومن باوع علينه كال والله نسيتكم كانت الكلمه اكبر من الفعل لو ساكت افضل لحد الان اتذكر رجعنه نبجي يم امي واسمعهه دكول اي مو انتو ولد الخايبه ماكنت افهم معناها وليش هيج دكول وليش احنا بدون اب
الغرفه الي ساكنين بيهه صغيره وأغراضنا هواي ماتكفي
امي طلبت من جدي غرفه ثانيه
ام رماد. عمي جهالي بدو يكبرون واغراضنه كثيره الغرفه ضيقه علينه
جدي. روحي سكني ويه اهلج عدهم غرف هواي جوابه كان صدمه لامي معقوله انت عمي اخوابوي وذولي دمك ولحمك اولاد ابنك تطردنه مع العلم عنده غرف كثيره ومخازن فارغه
ام رماد. بنتي رماد هذا الذهب الي بالعلبه الج لحد الان اتذكر لونها ماروني
لكن من شافت موقف جدي حبت تعتمد على نفسها وباعت الذهب ًوبنت بيت صغير غرفتين رساله ومطبخ كان بالوسط بين عمامي وخوالي
من كمل بناء البيت وتحولنا بي كان بمثابه قصر يشبه الجنه بالنسبه النه حسينا بي بالاستقرار والامان
خوالي كانو سند النه معافونه لحد الان اكول احنا تربيه خوالي علمونه رشدونه من تحولنا بيتنا كل يوم يجي واحد من خوالي يبات يمنه كانو 7 ربي يحفظهم
مرت الايام على هذا الحال وامي تشتغل الصبح بالزراعه وبالليل خياطه بعد ما اشترت ماكنه خياطه وصارت فنانه بالخياطه كل هذا حتى توفر النه احتياجاتنا
بالليل تسهر لوجه الصبح تخيط من يكون موسم مدارس او عيد جهاز عروس طفل لان راتب ابوي ميكفي وجدي ياخذ من الراتب حصته
بس ما انسى وكفه خوالي رغم كانو طلاب بس يشتغلون اعمال حره ويساعدون امي بالمصرف وماتركونه أبد كانو بمثابه الاب النه
مرت فتره الطفوله بحلوهه وبمرارتهه وكبرنا
بس اني كنت عنيده وكنت اكسر كلام امي وأخالف اوامرهه
واتعارك ويه اخوي والاسنه ؟؟؟؟؟ما اعرف ليش؟؟؟
بس اتمنى لو ما متصرفه بهالتصرفات لكن هذه كانت شخصيتي يمكن جينات وراثيه يعني التربيه مهما تكون صالحه الي يريد يتصرف غلط يتصرف
كان طبعي العناد والتهور من طفولتي وبشبابي وكل حياتي
صار عنادي وغروري وتمردي على امي سبب بضائعي وخسارتي وقله سعادتي
.....
الام دنيا
الام مدرسه .الام منبع الحنان والخير وكل شي
حتى لو كان كلامهه مخالف لطموحاتنا
الأفضل ان نمشي بكلامهه
والله
والله
نصيحه مني لكل بنت
اسمعي كلام امج وشنو تنصحج نفذي
ولا دكوليلهه لا ....هذا غلط
الام ماتغلط وإحساسها دائما في محله
والي تعاند امهه تضيع والله تضيع
انتقلنا اني واخوي للثانويه وكانت مختلطه وصرنه بفتره مراهقه
اخوي من النوع العصبي مايقبل بالغلط
يراقبني ويراقب تصرفاتي كان يتبعني وعلى اقل شي يتعارك وياي
واني ما اقصر
لساني كلش طويل هذه اسوء صفه بي وسبب من أسباب فشلي بحياتي
نصيحه ثانيه مني البنت شما تكون هادئه وتسكت حتى عالظلم وما تلاسن شما تكون ناجحه بحياتهه
اني ماعندي تصرف غلط لكن كنت اجتماعيه اضحك واسولف واختلط بالطلاب
هالتصرف خلى حاجز بيني وبين اخوي
كنت ممثله الشعبه كل سنه وادخل اجتماعات وندوات واروح الاداره كثير بحكم اني ممثله الشعبه
اخوي يكول كعدي بالصف وسكتي خلصي دروسج ورجعي للبيت
.....
اني كنت ارفض وبقيت على تمرديً ويه اخوي وبقيت نفس المشاكل
اجانه طالب نقل من مدرسه اخرى
رماد. ولج سراب منو هذا الولد الجديد
سراب. خلي اسال عزيز
هلو عزيز منو هذا الولد
عزيز جاي نقل من المحمودية
عزيز ممكن نتعرف
امير. اهلا وسهلا بيك ممكن اخذ منك الدروس
عزيز ليش لا
رماد. صارت نظرات وإعجابا بيني وبين امير بس ماتكلمنه وحدنه
بعدهه صار يدزلي رسائل وإشعار بيد عزيز واني أرد بنفس ألطريقه
نهايه السنه اني نجحت وانقبلت بالكليه لكن امير رسب
انتهت علاقتنه بمجرد انتهى دوام المدرسه لان بوقتهه لا جان موبايلات ولا صار بينه لقاء ولا تكلمنه وجها لوجه
داومت بالكليه. مرحله جديده بحياتي لكن اني نفس تصرفاتي
كنت اجتماعيه مرتبه انيقه وهم صرت ممثله الشعبه
وكلشي مشترك بين الطلاب استنساخ اي شي يربط مجموعه الصف كنت أنا المسوؤله
تعرفت على بنت اسمهه ايناس صارت اختى مو بس صديقتي بالمحاظرات نكعد سويه للنادي سويه نأكل سويه
نتمشى سويه نسولف مع طلاب الصف كان وقتنه بالكليه يخلص بهيج امور لحد ماينتهي الدوام ونرجع
بوقتها جتي الموبايلات
ماما اريد تشتريلي موبايل حالي حال البنات
ام رماد ولج خلى الحك اوكلكم
رماد يوم الموبايل ضروري فد يوم اتاخر شي عالاقل اطمنكم
ام رماد زين بنتي من اخذ الراتب
رماد اهوووووو وينج وين الراتب البنات كلهن عدهن بس اني
ام رماد ماشي باجر ادبرلج
اشتريت موبايل نوكيا ابيض وخزنت بي رقم اخوي وامي هم شجعتها اشترت واحد ورقم ايناس
بالعطله بعد نجاحي للمرحله الثانيه كنت اتفرج على قناة اسمها. (فينوس)
للحكايه بقيه
حبايبي صاحبه القصه معانا بالكروب وتقرى تعليقاتكم رجاءا عدم التجريح
بقلم فردوس عبد اللطيف. F

رماداقرأ هذه القصة مجاناً!