بنت الشيخ

الحادي عشر

#بنت_الشيخ

الجزء الحادي عشر

Nada hs

‎مرت ايام وانه احضر روحي لللعرس... بس هو محد جايب طاري العرس ابد...بس اهلي ..اهل ياسر لا حس ولانفس... بديت اخافن خاف تصير مثل خطبتي الصارت بلقريه.. بس الطمني انه عاقده ..وحچي ياسر وياي هم يطمني.. مااكولن ظل ع نفس الحب..لا جان كلش غريب..يخابرني بالليل يسمعني غزل يخبل يطير عگلي من راسي...بالنهار لا مايتحاجه... ومن اخابرنه مايطول وياي ..نص دقيقه ويسده.. بس الليل لا يختلف..
‎صار الليل ونستي وسلوتي...
‎اتاني الدنيه تظلم وابوكن روحي واظل مكابله التلفون حته يدك..
‎يدك وافتح التلفون وانسه روحي ويا.. وهو مثل خباله وصوته العالي...يظل يصيح احبج..لو مرات يحجي همس وروحي تروح مني... كله حجيه حلو.. بس حسيته مو ياسر نفسه بنهار..
‎حسيت اكو اثنين ياسر.. ياسر بليل وياسر بلنهار..
‎مرت الايام وصار الشهرين تلاثه واهلي يوم عن يوم يكرهون ياسر ويحجون علي...انه بداخلي ماارضه عليهم بس استحي احجي..وهمه هم يستحون يوصلون خبر لاهله حته يجي ياخذني جي بعد ماعده عذر ..غرفه وكامله..ذهب وملابس هم كاملات.. وانه جاهزه شوكت مايكولون..
‎سميره شالت ايدهه مني..وكل مااريد احاجيهه وحدنه تشرد مني.. چنهه تعرف شي وضامته عليه.. بس ماخفت... كلت ماطول ياسر يحاچيني هذا كلش كافي ..لو اكو شي چا گالي..
‎انه مااهتم بطول الخطبه..المهم عدي واحد يحبني ويدلعني وليليه يسألني عن حالي واحوالي واهم شي مااكضي الليل وحيده وهذا انه الجنت اريده...
‎مرت الايام وانه ع نفس لهفتي وشوگي علي.. صار نص يومي اذا موكله يخلص بالغرفه... اهلي عبالهم انامن لو اخاف ع روحي من الشغل علمود العرس...مايدرون بالتلفون...
‎بيوم انه نزلت العصر من غرفتي...مرتاحه وماعدي هم... ياسر توه مخابرني بس ماحجااي غزل.. بس كالي انه رايح وي جماعته ويتأخر يجوز يله يخابرني...
‎عاينت بالهول والفروخ شي تلعب وشي مدنگه تكتب دروسهه.. طبيت للمطبخ شفت امي كاعده ع كرويته بالمطبخ عدنه وتشرب چاي وبصفهه فليحة تلگط تمن ومليحة بالگاع تگطع بدجاج..
‎مانسمع بس ركعه الباب بكل حيلهه..
‎صوت مجيده تكول:والله اله اسويهه ظلمه عليهم..
‎حليم يرد عليهه:والكعبه ورب العرش اله اشبعه دگ واعلمه الامهات شجيب!
‎من يحجون وصلو للمطبخ... مجيده وجهه احمر دم وحليم ميبين علي حمار چي هو اسمر..بس عيونه حمر دم واحس حته جفونه مورمه...
‎امي فزت :ها يمه شعدكم! ولج مجيّده شجابج؟!
‎حليم:شجابهه مو؟ جابهه هذا الچلب ابن الچلب... نوب حليم فقد! انريد نفهم شكو ...صار يدك ع صدره ويصيح.. ولكم انه واحد يدنس عرضي..ولكم انه السكاره والهتليه تريد تناسبني! يابويه عساك لاجبتني اذا ارضاهه!
‎وهو يصرخ واحنه مامفتهمين شي فلش المطبخ تفلش..شال الصينيه مال تمن التلكط بيهه فليحة وركعهه بالكاع والتمن ترس الكاع... شو نوب انه واكفه يم باب المطبخ ومتعجبه ع اليصير مااحس اله وجهه كبالي والراشدي طير صفحة راسي...
‎امي صاحت:ولك شمالك! ولكم احجو شبيكم! شمسويه حليمه؟ شصخمتي؟ ولج طيحتي عگال ابوج؟ طيحتي مو؟؟
‎انه مسطوره من الراشدي وامي مدري شتحچي وحليم متخبل ماافتهم شكو... اجت مجيده خلت ايدهه ع ظهري ودفعتني ع كيف حته ادير وجهي ومشتني خطوتين ليكدام
‎وصاحت مجيده:لايمه لاااا..حشه! احنه بنات منصور تطلع منه العيبه! يمه هذا نسيبچ الجديد ! طلع سكير! والبارحه شايفينه سالم وصاحبه (ابن عمي يصير حمه مجيده) ...
‎امي:يا خوي يابن امي! شنهي! ولج خاف يجذبون يردون يخربون قسمتهه؟؟
‎فليحة:عمه شني يچذبون! انه اخوي مايجذب! انه سمعت بس غلست وماحچيت!
‎حليم:ولكم اليوم احرك روحي اذا خليته عايش...ولكم اليوم انعل ابوهم يابو عشيرتهم! ولكم انه !! انه!!! هيج تسوون بيه! انه من الاول مارضيت! عرفته مو راحه! بس ابوي السكتنه! وكله منچ انتي وسميره! كله منچ! اليوم كون اكض سميره...يابويه كون اشرب من دمهه! ولكم النوب طلعت ويا! طلعت ويا والناس درت بينه مناسبين عار وسگط!!!
‎كام حليم يدك ع راسه وانه دموعي صبت..شكول وشحچي.. اصدك لو مااصدك؟ خاف مشتبهين؟ بس لالا..حليم مايسوي هيج اذا مو متوكد منه ! چن مثل الحلم.. مرات واحد يحلم يطيح من مكان عالي ومايريد يشوف الجواه من الخوف ومن الهبطه ومن الوجع اليحس بي كبل لايوصل الكاع.. انه هيج حسيت
‎هيج جنت فوك بنايه عاليه وهاي البنايه هي الحچي والحب والغزل ماله وروحه وضحكته... كلشي تهدم حدري(جواي او تحتي) طحت وخسرت كل شي... خسرت الحب خسرت الثقه واكيد خسرته هو كله.. مستحيل اهلي يخلوني اخذه بعد..
‎صعدت لغرفتي وخليت راسي بين رجليه وابجي ..اسد اذاني مااريد اسمع الهوسه الصارت جوه... ماريد اسمع ياسر يذمونه مااريد اسمع بي هو مو خوش... چان بعيني ماكو منه.. حسدت روحي علي... يمكن من قله المحنه حسيته هيج...
‎كل غلط منه ذبيت الصوج بروحي.. كل مغثه منه اكول اي انه المقصره وياه.. چنت معميه عمي بي...
‎مطلعت من غرفتي يوم كامل... لثاني يوم يله اجتني امي العصر وبيدهه صينيه اكل ووجهه رايح تعبان وبيهه محنه وكسره عليه..
‎امي:كعدي اكلي وغسلي وبدلي..دام ابوج راسه يشم الهوه لا تنزلين راسج.. وراج زلم انتي...
‎ع حچي امي گعدت ع حيلي واحس صدك انه وراي زلم...
‎امي:اي هيج اريدنج... بت ابوج ماتهزج ريح! الله خلصج منه وزين وكشفنه سوالفه مبل لانتورط كلش وياه..
‎نزلت دمعتي والخنگه بصدري:يمه كليلي شصار؟ شلون شافو ومن يكول هو؟
‎امي:يمه هو.. سالم تدرين بي وبسوالفه.. مده مده يشرب.. وبذاك اليوم شايفين ياسر هو وصاحبه يم الكيوليه.. هونج ع الشرب .. يمه مكعدله وحده بحضنه ...
‎رادت امي تكمل كلتلها:كافي .. دنكت واريد ابچي بصوت بس استحي ...استحي حته اطلع الحسره البيه..
‎ظليت ابجي وامي يمي .. بس ماحجت شي..
‎بعدين انه كلت..
‎-يمه ابوي شكال؟ شراح يسوي؟
‎امي:اليوم ابوج راحله لبيته.. واخوج حليم مدمي وجهه وكوه فاكينه منه... طيحو حظه لحد ماطلگج..
‎اباوع بصدمه لامي ..واحجي وياهه بتواسيل:يمه هسه انه مطلگه؟ يعني راح بعد مايرد؟ خلص كلشي؟
‎امي:لا مو مطلكه..بس خلصتي منه.. لاتبجين عله چلب! زين مااخوج كتله!
‎-يمه انه ليش هيج حظي؟ انه شمسويه بدنياي!
‎امي:نصيبج هذا.. صيري گويه ولاتنكسرين ! افه ! بت منصور يكسرج خنيث!
‎ظليت ابجي وامي شويه وراحت... ماظلت لحظه بيني وبين ياسر ماذكرتهه.. الزينه والشينه... الحلوه والمره... چن شي مثل الحلم چنت بي.. والصدمه احسهه براسي صارت.. الوجع مافاركني..
‎هديت شويه وكمت زكلت لكميتن.. غسلت ورديت للغرفه.. اسمع صوت هزه تلفون... رحت دورته .. انه شامرته مادري بي وين يوم كامل... باوعت شفت المتصل(العزيز والغالي) هاي انه الثوله هيج سميته...الحرگه الصارت بيه من شفته هيج خلتني اشيل التلفون واركعه بالكاع...
‎ماارتاح كلبي .. وادري بي ماانكسر ولاخرب... ضميته جوه ردن ثوبي ونزلت جوه.. طلعت ايد الهاون ورحت وره البيت... طحنت التلفون طحن... بكل حرگه فلشته.. احس انتقمت منه..واحس الطگات الطگيت بيهن التلفون اجت بضلوعه مو بالتلفون...
‎افلش بي واكول بيا وجه تخابرني! وشتريد تچذب عليه بعد! وليش هيج سويت بيه؟ مالكيت اله انه تضحك عليه! ام كلب الفطير والثوله؟ لكيتها ع كد ايدك وتسليت بيه!
‎فقدت كلش ... كمت من مكاني رحت لغرفتي... بچيت بچي بس الله العالم بي.. ياهو الالومه! ياسر؟ سميره؟ عمتها؟ رجلها؟ اهلي؟ لو الاكبر من ذني كلهن الهو حظي؟؟
‎نمت بعد مانشفت عيوني .. وثاني يوم هم ماطلعت...ظليت حابسه روحي..احسلي من الحچي والنغز اليصير.. ماريد اغث روحي اكثر...كلش كافي عليه الصار...
‎امي سوده عليه هنا يله حسيت بحنيتهه... كامت تودي الاكل بيد الفروخ خطيه ماتكدر تصعدلي كل وكت... تصعدلي مره وحده باليوم تصبرني وترفع راسي وتحسسني انه صدك عدي حزام ظهر ...حته مجيده.. هم اجت هي وامي مره... وهواي حجن وياي وقنعني اطلع من الغرفه وانزل وانسه كلشي...
‎صدك طلعت من الغرفه وحاولت امشي واحجي مثل البشر بس مانسيت... كل امالي جانت بي.. كل احلامي هو.. طار مني بيوم وليله...
‎كمت اكل جوه بعد اسبوع من العزله والوحده والبجي... وبيوم التمينه كلنه وره العشه...ردت اصعد فشلانه من اخوتي وابوي ع قسمتي وع حظي وع الجان اسمه رجلي...
‎امي كالت ظلي لاترحين.. كعدت وي اخوتي وابوي وامي ومجيده هم يمنه... احسهم مكسورين عليه بس مايبينون... ابوي صوته مبحوح...اكيد من الطلايب الخليته بيهه... اخوتي مدنگين...
‎مجيده:بويه انسو الصار...كافي حزن..هذا درس ...
‎ابوي:وروح ابوي.. لوما سميره بالنص چا سويت الدم للركب!
‎مجيد:بويه عليش؟ سميره شذنبهه! خطيه گطعتو بيهه؟ چا هي رادت الخير عود!
‎ابوي:اي ادري.. بس هذا رويد كون اطكنه ع حلكه! المخمث الصخل! هيج مايدري بي؟ راد يسويله راس ع ابو ماخذ من بيت الشيخ!
‎حليم:يخسه! ادوسن ع راسه وراس الخلفو!
‎ابوي:كوم انته! تعذر من اختك وحب راسهه! هي سوايتك سوايه وياهه! تجي اطگهه بلا ذنب!
‎حليم كام من مكانه واجاني..انه كبل وكفت ع حيلي ودمعت... خله ايده ع راسي وحباني..انه فقدت بجيت بصوت وكضيت ايده وحبيتهه ... كام حليم مايركز مكان...حسيته راد يبجي.. خله ووخر مني ورد لمكانه...
‎ابوي:كافي بويه لا تبچين...انه مامتت وتنزل دمعتج!
‎كلها صاحت وانه هم :طولة العمر الك!
‎مسحت دمعتي وعاينت ع اخوتي وابوي..احسهم صدك سباع.. ويمكن ماانخلق بغيرتهم احد بعد... مجيد ابو كلب الحنين.. عينه عليه وروح الشهامه الانزرعت بي تمنعه يگرب مني ويسألني ويحاچيني ...بس عيونه حاچتني ..وانه هم جاوبته بعيوني..
‎طمنته انه بجاله وبصايته هو وابوي محد يدناالي...
‎شكبره صارت عدي هاي الكعده واللمه... سولفنه هواي والسوالف مالتهم نستني شويه... واول ماطشينه من هاي اللمه وطبيت غرفتي رديت للمأسي ... ظليت ابجي واريدن استوعب الصار بيه ماكو... شني الجره ؟ شني الصار؟
‎تندمت چي كسرت التلفون وماحجيت وياه...يجوز عده شي يكوله يجوز ظلمو؟ يجوز مو هو الشافو؟
‎شكد وشكد فكرت حته مااظلمه..طلعت الناس كلهه غلطانه... بس حسافه طلع مايسوه التعب ... وره يومين تأكدت هو صدك سكير وصاحب شغلات موزينه..
‎تاكدت من اجتنه سميره...مدري بيا وجه اجت..بس هم ماالومهه رادت مصلحتي ورادت تشوفني ابيت معززه مكرمه واخلف واستقر...
‎من طبت سميره حليم كلب الدنيه عليهه...غلط عليهه وحچي وصياح..راد يطردهه من البيت.. گوه قنعته مرته وامي وطلعنه من البيت ودنه لبيت عمي..
‎انه من شفت سميره گربت منها وكلت:چنتي تدرين مو؟
‎هي ظلت مدنگه ..لچحتني بنظره وردت نزلت راسهه..
‎-ولچ احچي! چنتي تدرين بي يسكر مو؟؟؟
‎سميره والدمعه بطرف عينهه:والله ماعرفت اله وره خطبتكم! انه شمدريني بي.. والله بالصدفه عرفه وماگدرت اگلج... خفت لا تخرب وگلت انتي تصلحينه وتخلينه يبطل سوالفه!
‎انعصرت عصر...گلبي انقبض وسديت عيوني حيل حته اعصر مخي واحاول استوعبهه...اختي انه؟ اختي تغشني وتريد تعبرهه عليه؟!!
‎سميره لازمه زندي وتبچي:والله مو ذنبي..مادريت ! ذاك اليوم يله دريت بي..
‎جاوبتهه بهداوه:روحي مني سميره...حته انتي وي زماني عليه؟ ليش هي هاي الخوه؟ شفرقج عنه من دريتي وسكتي؟!
‎صعدت لغرفتي وبچي وبچي..صرت اشهگ ومالحك اصرخ واريح گلبي..مثل الي يريد كل مابي يطلع البچي والحسرات البي بس مايلحك يطلعهن فرد مره...
‎صفنت وي روحي..اتذكر كلامه وياي وصوته العالي تالي الليل..
‎كشفت روحي ثوله ومطفيه وغشيمه... عبالي يحبني..
‎طلع يسكر ويخابرني.. الله اليعلم چان يفكرني وحده من صاحباته يجوز ويحاچيني هيج... چي هو بلنهار مو نفسه اليحاچيني بليل...
‎ظليت ابچي لحد ما ثلجت اطرافي..تالي غفيت.. احسن حل اسوي حته اشرد من هاي السالفه انام...
‎كعدت مادري بروحي..دايخه..مسطوره.. عيوني تحرگني واحس عليهن ثگل.. مامصدگه الصار..اگول يجوز چنت اتحلم.. وبس امشي خطوتين واشوف حالي اتذكر الصار بيه صدك.. مو حلم ولا خيال...
‎صعدت سميره يمي... گضتهه اتعذر مني وتريدني اسامحهه... وانه گلبي شوكت يعرف يقسي حته مااسامحهه.. حبتني من راسي وانه هم شبگتهه حيل ...
‎شويه وگالت انزلي امي راديتج وعدهه حچي وياج... نزلت ادور امي لگيتهه بلحديقه تلگط الحصو والزبايل مال فروخ..
‎ماچنهه موديه عليه.. يمكن سميره تچذب... وهي صدگ چذبت..
‎نزلت وره شويه وبيدهه علاكتين كبار...
‎-هاي شني؟
‎سميره:يختي مايصير يظلن يمج..هذا يرد لاهله..
‎-اخذيهن..ماريد اشوفن شي منهن..
‎نزعت الحلقه من ايدي بحرگه واحسها گوه طلعت من اصبعي.. هي مو ضيگه ولا صغيره عليه..بس انه من الغيض والسرعه ماكدرت اطلعهه.. اطيتها بيد سميره..
‎اخذتهن سميره وراحت.. من مشت خطواتهه لحد باب الحوش انه عيني ع العلاليك واذكر من اشتريناهن وخوفي لاانكشف طالعه ويا وحچيه المغثه... بگلبي گلت الله وياك.. روح الله لايردك...
‎مر اسبوع اخر.. وانه ع نفس الهضيمه وكسره الخاطر.. بس ماابين ع روحي.. من الشمات استحي اشكي..
‎نسوان اخوتي چن صار عدهن عيد من تطلگت.. شگد چانتزايام صعبه.. نسيت روحي شلون چنت گبل..لاهم ولاغم .. بس الضحك ومرات اضوجن واتحسر ع العرس.. بس هم اشوه بيني وبين روحي مو هسه مطلكه وصرت علچ بحلك عمامي وكرايبنه كلهم... ابوي راد يگاومهم ويسويهه عشاير وياهم.. بس كلهه تدخلت ومارضو چي سميره عدهم.. المهم سكتو.. بس ظلو ماخذين عليهم صوره مزينه.. يحچون عليهم دوم...
‎وبيوم ابوي تعطر وتكشخ.. والفرحه تارسه وجهه ترس.. انه هم ع فرحته فرحت.. امي هم.. من شافته سألت
‎امي:خويه شو فرحان عساهه دوم؟ وين رايح؟
‎ابوي:اليوم رايحين مشيه علمود عناد..بلكن الله ويتصافون ع هذا العرس هو وعمه
‎امي:يااا بيهه الخير..يستاهل ابن الاجاويد..
‎ابوي:حليمة..صيحي ع اخوج ..بطينه هم يله!
‎مشيت بتعب وبثكل.. احس الدنيه انسدت بوجهي..ناس تخطب وتعرس ترتاح..بس انه كله مكلوبي اجاني.. حته صوت ماعاد بيه اصيحن ع اخوي..تعبت جدامي ولا تعبت لساني..صعدت دكيت الباب لكيته جاهز كتله ابوي متانيك جوه...

‎يتبع...