صدفه بالجامعه ❤️

صدمه 💔

ليث .. يا خير هو اللي يصبح بهيج وجه يبجي يشوف الخير ؟!!
كومي انزلي سويلي ريوك .. راح يجوني خطار واريد استقبلهم مو ابقى مكابل حضرتج .

ندى .. جاوبته واني لازمه راسي ومدنكه كلتله صار حروح اسويلك ريوك !
كمت اريد اطلع صاحني ..
ليث .. هييي تعالي ارجعي هسه امي تشوف خلقتج وعيونج وتخبصني ع بالها مسوي لجنابج الكريم شي .
ارجعي ولتطلعين من الغرفه اني راح اكللهم مريضه.

ندى .. براحتك رجعت لمكاني ولوضعي .. وهو طلع.
ليث .. من رادت تطلع شفت وجها وعيونها كلت اكيد هسه امي تشوفها وتاكل راسي صحتلها ورجعت كلتلها لتطلعين من الغرفه ابد.
نزلت جوه شافتني امي كامت تهلهل وحضنتني وباركتلي هي واختي كالت ابوك واخوتك كاعدين بالصاله ويا الخطار .
دخلت للصاله وباركولي كعدت انسولف..
كالت امي يمه الريوك جاهز صحي مريتك خلي تتريك وياك!!

كلتلها لاا يمه ندى نايمه راسها يوجعها عوفي ريوكها اني هسه اكمل واصعد اذا كعدت اوديلها الريوك.

امي .. يااا يمه اشبيها البنيه البارحه مثل الورده شحلاتها ؟!! شسويتلها ولك 😉
تضحك وغمزتلي.

ليث .. هههه لا يمه ويين راح تفكيرج اشويه راسها يوجعها عود خلي بالصينيه حبايه براسيتول حتى تشربها .

الام .. صار يمه هسه اخليها الها.

كملت الريوك وراحو الخطار صارت الدنيا الظهر .. اتذكرت هي مماكله شي من البارحه !!
كلتلهم انطوني ريوك ندى اخذته وصعدت..
فتحت الباب ودخلت لكيتها على نفس كعدتها هم متكوره على نفسها وراسها بين رجليها .

خليت الصينيه ع الميز حيل وكلتلها هذا سم اكعدي اكلي .. مردت عليه
اتقربت منها وجريتها حيل من ايدها كلتلها انييي ويااامن احجيييي شنو طرشه متسمعين ؟!!
فزت هي الظاهر كانت نايمه باوعت عيونها حمر يعني بعدها تبجي .

ندى ..
لما طلع رجعت ع كعدتي وبقيت ابجي ابجي لحد ما غفيت من البجي وألم راسي وقهري ..
واني نايمه حسيت واحد جرني حيل من ايديه ع بالك ايدي انخلعت من مكانها حيييل أذاني .
رفعت راسي لكيته هو ..
كلتله خير ليث اشبيك ؟!!

ليث .. صارلي ساعه اصيح ليش متجاوبني شنو تعاندين حضرتج ؟!!

ندى .. اسفه كنت نايمه مسمعتك .

ليث .. اسفج خلي الج ومره ثانيه من اصيحج اتجاوبين فهمتي لوووو لاااا واني لازم ايدها بكل قوتي واهز بيها .

ندى .. كال من اصيج مره ثانيه تجاوبين وهزني حيل وهو لازم ايدي بكل قوته ويحجي وياي .. ما حسيت غير ادموعي تنزل هزيت راسي يعني اي .. وكلتله بس اترك ايدي دتأذيني .

ليث .. كالتلي اترك ايدي اذيتني  دفعتها حيل وكعت ع السرير كلتلها هذا سم كومي اتزقنبي .