صدفه بالجامعه ❤️

تهديد وكره ?

ليث..
دكيت الباب طلعلي ابوها و ويا ولد شاب اعتقد اخوها الثاني ..
رحبو بيه ودخلوني للصاله وضيفوني عصير وكيك ومي
حجينه اشويه ع الوضع مال البلد ومن هاي السوالف .. بعدين حجيت ...

ليث .. حجينه انت اكيد متعرفني واحتمال سمعت عني كلام مو حلوو واني مااريد امدحلك نفسي بس ابو المثل يكول (اللي ما يعرفك ما يثمنك )

ابو محمد .. فعلا ابني صدقت.

ليث .. والله يا عمي اني انسان معروف والحمدلله الناس كلها تشهدلي خلق واخلاق وسمعه وصيت ومال وحلال ومنصب و وظيفه ترفع الراس واذا أأشر بأصبعي الف وحده تتمناني والعالم اتكول كبع واخذ

ابو محمد .. والنعم منك وليدي

ليث .. بس يا عمي اني شفت بنتك بالجامعه خلق واخلاق بنيه مؤدبه وثكيله ودخلت كلبي الله شاهد ..
واجيت اطلبها منك على سنة الله ورسوله واتمنى متردني .

ابو محمد .. والله يا أبني انت على عيني وراسي ويشرفني اناسب شخص مثلك
بس البنيه عدها اخوان واني لازم اخذ رأيهم واللي كاتبه الله يصير .

ليث .. حجينه بس الي اعرفه انو اخوها مموافق وانت اليوم كايللها تخبرني انو متنطينياها.

ابو محمد .. والله يا ابني بالاول والاخير هو اخوها واكيد يعرف مصلحة اخته.

ليث .. حجي اللي ناقصني شنوو اريد اعرف شنوو السبب اذا ع المذاهب فأعتقد احنا حاليا بالقرن الواحد و عشرين والعالم ديتطور وهذي العقول انقرضت .. اني امي شيعيه وابويه سنيي والحمدلله عايشين على الحلوه والمره ولا واحد فد يوم غث الثاني
فما اعتقد هذي مشكله حتى تفرقونا.

ابو محمد .. وليدي حشاك من النقص وكلامك صحيح وان شاء الله اني اقنع اخوهاا واذا من نصيبك متصير لغيرك.

ليث .. الله يسلمك حجي ويطول بعمرك واني شتريدون حاضر حتى اذا تردون اعيشها بيت وحدها وهنا قريب عليكم هم ما عندي مانع، واتمنى تروح تسأل عني بنفسك وتتأكد ومتسمع من فلان وعلان.

ابو محمد .. لا ابني بلا ما أسأل المكتوب مبين من عنوانه وانت كلامك وأخلاقك مالت ابن اجاويد وما يكون خاطرك الا طيب .

ليث .. اشكرك حجي يلا اني ارفع الزحمه .

ابو محمد .. الف هلا بيك وليدي زارتنا البركه.

ندى ...
دخل ليث واني وكفت انتظر شحيصير وادعي ربي كوون محمد ميجي هسه ويكلب الدنيا علينه ..
سمعت كلام بابا ويا طرت من الفرحه وارتاحيت.. لانوو كلام بابا طمني
راح ليث وصاحني بابا

كال .. الولد مبين خوش ولد وابن ناس ومتربي واني موافق ومحمد يقبل غصباً عنه .
بهذي اللحظه دخل محمد ..

محمد .. ها خير شكوو اشو متجمعين وفرحانين شصاير ؟!!

الاب .. اليوم اجه الولد المتقدم الندى وطلبها مني .