#بقلمي_اية_الراويطبو سلامو وقدمتلهم ...وواحد يباوع عالثاني عبالك مستحين من شي الى ان عمي استأذن من بابا وبدأ يحجي ...
يابة رشا ....انتي زوجة ابني المرحوم وغالية علية انتي وولدج ....صعبة علية اطلب منج شي يربطج بغير رجال بس هاي الحياة مثل ما تشوفيهة تمشي وما تگف على موت احد انتي برگبتج اطفال اثنين .....مسؤوليتهم چبيرة هسة صغار باجر عگبه يكبرون وبعد ما تعرفين تضبطيهم مو قصور منج بس هذا واقع ولدج اولاد مو بنات دنكول على ايدج يتربن ....الولد مسؤوليتهم صعبة وهاي اني وهاي ابوج نعرف يعني شنو ولد .....وانتي بعدج بعمر الورد هسة بلشتي 25سنة وحرام بحق شباب هالشي ....
اني وابوج مو دايميلج ....كل واحد اله يوم ويروح لدار حقهاني يحجي وبدت دموعي تتساقط من دون صوت ....وبدا نفسي يضيق ....ما جاوبت بس عرفت يريدون بزوجوني لاحد بس ما اعرف منو .....ليش هيج صرت ثگل، .....حسبي الله على الي جان السبب
بابا نقهر بس مؤيد لحجي عمي .....حجو هواي اشياء ومبررات ....بس داخلي ما مقتنع احس نفسي مو وفية لخالد ....
راحو واني ما نطيت رد ودموعي اذتهم ....
مرت يومين جانت بقساوة او ايام وفاته جنت ابجي وانوح بالساعات واني حاضنة اغراضه ....واعتذر منه الالف المرات
اجتي ماما ونفس الحجي بس جانت عصبية بعض الاوقات من رفضي ....تحاول تفهمني انو هذا الصح بس اني رافضة حتى ما عرفت من الولد الي اتفقو يزوجوني اياه
ماما اني باجر اتعين وابدي اصرف عليهم وعندي تقاعده واربيهم مو بحاجة احد يخليني اخون عشرتي وية خالد ....انتم ما قصرتم بشي بس اذا اني ثگل من اليوم اني المسؤولة عن نفسي وعن ولدي
وبلة حجي معلگ ....انتي تعرفين يعني شنو مصروف مدارس يعني شنو ولد مراهق وصعب الولد يحاجي ...اليوم اطفال باجر يكبرون الايام تمر ....
راحت واني ما نطيت جواب وهم ما كالت منو الولد
ورة كم يوم وهم رنا اجتي وهم تقنع بية ....وبقت اربع ايام خطية رنا جانت دائما تتصرف كأنما امي وشايلة همي ....بقت تقنع وبهداوة بية ....وباليوم الرابع سمعنا قصي نحجي هو يعرف بالموضوع بس ما تدخل ابد ....كال
تريدين الصدك والله حمزة خوش ولد وشايل هم ولد اخو وما قصر بشي الله يشهد ....
شنووووو حمزة ...من كل عقلكم ولكم هذا اعزب ما متزوج يبتلي بية وبجهالي ليش ....الله ما يقبلها ما اوافق لو تنگلب الدنيا ....
رنا....وليش هالرفض القاطع يا عيني واذا تزوج ترة هو هم اخو خالد وملزوم بولد اخو بعدين مو احسن ما متزوج ومناكر وية زوجته فوك ضيمج
بعدين اني مو من يوم الحادث وصيتج بدعاء الرسول مال اللهم اجرني في مصيبتي واخلفني خيرا منها يجوز الله استجابلجرنا صعب صعب الي ديصير من كل عقلج لج شاب هسة طلعته يتورط وياي ....مستحيل
ليش بالله انتي شكد عمرج اليسمعج خمسين سنة وتسولف هيج ....بعدين اذا مقهورة علي خلي يزوجج ورة فترة يتزوج ويعيش حياته وية مرته على الاقل بس سند يا اختي
اني الفكرة اشوفهة مو منطقية ابداااا ...بس حجي رنا كلت بي وجهة نظر وقصي أيده
زين اطوني وقت افكر ....مو بهالسهولة الموضوع ....
بقيت أسابيع افكر كل يوم اكول راح ارد بالرفض واتذكر حجي الكل واكو عمو وبابا كبرهم القهر ومو ناقصين هم جديد ....واخاف على اولادي خاف بيوم فعلا بعد ما اكدرلهم واكون مو كد المسؤولية .....كثير من الالم والقهر انضاف الي ....وقصي حس بية وكالي فكرة رنا كلش منطقية وافقي بس علمود ولد ترة حمل عليج كبير وانتي ذبلتي يا اختي .....
يعني مراح احد يكول خنت خالد وتزوجت وراه ....
يمعودة يا خيانة ليش انتي اول وحدة لو اخر وحدة تتزوج بعد وفاة زوجها العراق متروووس
يتبع
