#بقلمي_اية_الراوي
كل يوم اكول اليوم يرجع وهو جان بعيد عن الانفجار .لان سيارته وجهازه بعيدين ....واسأل قصي ويواسني ....ما يوم فقدت الامل من رجوعه ......الى ان قصي كام يبچي ويگلي كافي رشا كاااافي لخاطر الانبياء .....راح تموتين من ورة هالحزن شوفي نفسج عبالك عمرج 50سنة ....وجلد وعظم ....خالد راح لدار حقه كافي تأملين نفسج جهازه والسيارة جانو بعيدين لان هو راجع ديطلع من المكان وابو المحل مرجعه بشغلة اخوهم كال اني طلعت وهمة بقوا ...راحووو كافي لو البچي يفيد ويرجع جان كل عزيز رجع ..
مرت ايام ظلمة حليبي نشف من القهر ...وزيودي توكح اربعة وعشرين ساعة يبچي دمرني ....حبيبي حمودي سأل مرتين على ابوه ومحد يجاوب وينسى ......عمي ما شفته ابد ....انقهرت علي تسولفلي اميرة شنون صابته جلطة وثگلت ايده فترة .....رنا جانت تجي علية كل اسبوع تبات تساعدني تواسيني .....ما قصرت بشي لا هي ولا اميرة ...عمتي جانت تجي اغلب الوقت ساكتة وتدمع عيونها من تشوف ولدي مو نفسها ذيج عمتي الگوية هدها القهر ....
صار على موته شهرين اني جنت بالمطبخ هسة كملته الدنيا عصر ولدي نايمين وقصي بالصالة ....سمعت الباب يندگ رحت كتله لقصي وطلع ....البردات مسدسدة اني بعدة ....
جنت دا الملم بالهول العاب وهوسة .....واسمع صوت عمي ....جمدت بمكاني لا كدرت اوصل الغرفة كعدت عالكرسي ....اسمع قصي يكله هلا عمي تفضل رفعت عيني واذا عمي بس مو هو عمي نفسه كبران سنين .....
كال
شونج يابةة
اني الدموع جانت نهر كتلة مو زينة خالد اخذ عافيتي عمو ...
معرف شنون وصل يمي حضنته وابچي على صدره حسيت بدفء ....عمو راح وخلاني اني ولدي ايتام .....يبچي مثل الطفل تبللت لحيته .....واميرة تتوسل
فدوة رشا بابا نجى بأعجوبة من جلطة ثانية ....ارحمي حاله ....واني مثل الي جان محروم من شي ووصله تروح وترجع وتتوسل
الى ان سمعت صوت حمودي يصيح جدو ....شكيت هي الي كعدته ....
سكتنا لخاطر حمودي
عمتي تبچي وقصي خطية موقف صعب .....
عمي كال
بنتي الله يخليلج ابوج بس اني ابوج انتي ولدج .....خالد تركلي امانة ثگيلة وراح .....ان شاء الله اكون گدهة ..
انت ابوية وابو اولادي وما تقصر ....
كامت تمشي الايام بكل وقاحة .....ولا تقدر مشاعر الفاقد غالي ....اهلي واهل خالد ما قصرو بشي يصرفون علية وعلى ولدي ....وقصي سكن وياية .... حمزة جان متكفل بالمسواك وجان يجي ياخذ الولد يوديهم لبيت جدهم ....
بهالاشهر الاربعة مشو بمعاملة التقاعد مالت خالد ....ولو موهواي لانه ما عنده خدمة هواية .....بس كالولي شكد ما هية تفيدج ....
اني ما احس بطعم للحياة ولا لون ....بس كمت افكر من اطلع من العدة ابدي ادور على شغل بشركة حكومية او اهلية لخاطر اولادي ....امانة خالد ولازم اكون گدهة
طلعت من العدة ومر تقريبا شهر واني ما الي خلك اطلع ....ما مر يوم الا ما بچيت ....جنت اشم عطر خالد كل يوم واشم هدومه واذكر ايامنا مع بعض .....واتحسب على الي جان السبب بالي صار بية .....
قصي اصر الى يوديني لاهلي ....اول شي ما قبلت وقنعني بالليل يوديني لخاطر بابا والولد مقهورين علية ....رحت بس هم ما اذكر الا الايام الي جنت بيه مخطوبة وشنون يجيني وشون وشون وتدمع عيني بقيت يومين. .....
اتصل حمزة بقصي وسأله عنا .....كاله اخذتهم لبيتنا ....الظاهر جان جاي ياخذ الولد ....وظل باله
عشت مثل الي ميت ويمشي بين احياء ....صحيح اروح لبيت عمي ولاهلي بس لبسي اسود الدنيا سودة....كمت اشك اكو الوان بالحياة ....
عمي عرض علي يدفع 60ورقة مقابل تعيني ....بس اني رفضت لان حسيت فوك قهره ولة هم مصرف زايد .....بس طلبت منه اقدم على شركات اهلية او حكومية ....ووافق
صار على موت خالد 10اشهر .....10اشهر شفت اصناف القهر والحرمان والشوگ اله وماكو فايدة ....
بيوم اجة عمي وبابا علي ودخلهم قصي اني من شفتهم كلت اكو شي مو خالي الامر ......
يتبع
