#قصة_هوانا
nada hs
الجزء14
وهم رجعت للغرفه ودگ بجي ... وتاليها يارب ليش هيج...
فتحت التلفون ولگيت الرسائل والفشار والتكفر من صادق ذاك حدها... هذا انچلب همين...
خليت راسي يم بيبي وغفيت....وبقيت تقريبا اسبوع يمهم مااطلع من الغرفه بَس ع كد الحمام لو اغسل لأبني وطبعا اغلب الوقت يم تماضر حيل تعلقت بي... وصادق بعده زعلان وامه موصلتني... اني گلت خل شيصير يصير ...
وماطولت بيبي وبيوم گعدناهه الصبح مگعدت اني بوقتها فقدت ملخت نفسي وبقيت حاظنتها ماقبلت يشيلوها... هذا اليفقد عزيز شتترجون حاله... وراحت بيبي وطلعو ملابسهه وجربايتهه ومغذياتهه وادويتهه وانسدت الغرفه وانفقلت...
مرت ايام العزا واني لااكل ولاشرب انتهيت ع الاخر ومكدرت اوگف ع رجليه... خطيه خالي رحيم نوب فوك مصيبه بيبي حار بيه وليليه ناقليني للمستشفى...
بقيت كم يوم وبعدها ودعت بيت بيبي بله رجعه ... ورجعت ويه صادق وجان متخبل اكثر من قبل وع اقل شي غلط وسب وضرب اني اقبل كل شي يسوي بيه بس يسب امي وابويه لا...
وبيوم لگه قميصه مكاويته لان صدك بيومها مكدرت امشي واتحرك وحته خالتي هيه سوت الغدا.. اجه ياضرب ضربني اخر شي چوه ايدي بالجداحه يحرگ بيدي گدام عيني وبس اصرخ لحد ما امه گلتله عوفها لتبليك يمه!!
اه ياروحي شكثر تتحملين!
مرت الايام وابني صار عمره سنه وجان هو المصبرني بدنيتي وخاصه گام يلفظ ماما... تقريبا لبست الوضع ويه صادق وصرت اتحمل كل مهاينه واسكت ولااحجي هو من شافني متحمله وساكته فاجئني يگلي اريد اتزوج!!
متحركت شعره بيه من گلي ... بس طلبت اذا صدك اتزوج اني ماابقه بهذا البيت وطبعا مگلت عن فلوسي الي يم خالي.. هو گال ماعندي ومدري شنو ومرت ايام اجاني گال ميخالف راح اسوي الي تردي وأأجرلج وحدج... من سمعت هيج گلتله البيت راح يجيني هديه من خالي...ماريد ايجار...
وصدگ خابرت خالي وگلتله اجاني واخذني ع بيته الجديد لان بعد وفاة بيبي باشهر انتقلو وحدهم... وجانت تماضر مرتبه مسويه بيتها جنه صغيرونه... وابنهم تارس حظنهم صدك يستاهلون... لگيته محضر الفلوس اليه.. اني حجيتله ع صادق وراويته حته ايدي وصار عصبي راد يتعارك وياهم بس مخليته فگلتله هو يشتريلي ولو نص قطعه...
وماكو فترة اشهر انتقلت لبيتي وبأسمي وبناء جديد واثثته ع كيف كيفي جنا نروح اني وخالي نشتري ... بيبي الله يرحمها مخليتلي هوايه بحيث كفن قطعه وبناء واثاث وحته خالي طلع مخليلي من عنده... فدوه لعينه ماانسه وگفاتهم ويايه هذا الحنين
اما بيت خالي جبار بقو بالبيت الحبير بس فلشو وبنته كريمه ع ذوقهه بحجة ميلائمها وقديم... علا اتزوجت وهسه حامل واهلها حايرين وين يخلوها وطبعا زوجها شايلها ع راسه...
اما احمد اوف يااحمد بعده ع أمل... لحد هسه متزوج وامه متخبله من هاي السالفه ويوميه عركه هي ويا... طبعا الاخبار جنت اسمعها من تماضر ...
صادق من طلعت ابيتي گام يجي ويتلوك حسباله عندي بعد فلوس فمن عرف انه مااعندي فلس بعد بطل يجي... بيتي گبال بيت خالي رحيم هو الي اختار المكان واني هم مردت ابعد عنهم وعلاقتي اني وصادق من بعدني يمهم بس ع الورق متزوجين ..
امه كيفت وراحت خطبتله وحده من رفيگاته... مااهتميت ولاضجت لان من البدايه محسيت بي هو اليه...
