#قصة_هوانا
nada hs
الحزء12
بعدها حسيت نفسي بين النايمه والگاعده واسمع صوتي بس عبالك مو آني الي احجي.. احس بالم ببطني وعيوني مااكدر افتحها وعطشانه ميته عطش ...
-وين احمد... ا..حم..د... تعال...
-يمج اني شهد...
-بعدني احبك احمد...
سمعت كلامي واتذكر الحجيته بس عبالك مو اني الحجيت... وشفت بيبي تخلي ايدها ع حلگي تسكتني... ومن فتحت عيوني باوعت وشفت احمد يم راسي ... وابني بحضن بيبي وشويه ودخلت ام صادق مدري شحجن هي وبيبي وراحت مبقت...
جنت بعدني مخدره بس الالم بده يزيد عندي وصرت اصرخ من الوجع... احمد لازم ايدي ويهدي بيه وبيبي تخبلت جابت الممرضات واجت وخلو ابر بالمغذي يله هديت ... ايدي بيد احمد بعدها واتمنى مااعوفها ... هو هم خله كرسي يم راسي وبقه ايده بَـس مشال راسه بقه مدنك ع الگاع...
بيبي حارت بأبني سوت ممه لان مكدرت ارضعه وسوتله ممه طبعا متعرف هي بس الممرضه علمتها وساعدتها... من وعيت كلش ع نفسي شفت ايد احمد بيدي ومزلغه ومعضضه..
من جنت اتألم مدريت بنفسي شسويت ...
صار الصبح وبيبي مخليه راسهه وغافيه وابني همين اشوفه من بعيد غافي آٌني خلص وقتي بين انام شويه واگعد وانام واكعد وهيج...
-اريد اروح للحمام...
-هسه اصيحلج وحده تساعدج...
واجت وحده عود تساعدني اگوم وماحسيت بنفسي من گمت بس اتذكر شميت عطره لاحمد يمكن هو شالني مادري بعد...
صحيت لگيت بيبي واحمد والدكتوره وممرضات اثنين كلهم بالغرفه ... الدكتوره گالت متطلع اليوم لان تعبانه وتحتاج مراقبه ودمهه قليل...
وره شويه دخلو صادق وامه احمد من شافهم رأسا طلع... شال ابنه وكبر بأذنه ع اساس متدين كدام العالم...وغير اسمه الي جانت مخليته بيبي بالبيان وسماه علي ...وتحمدلي ع السلامه وگعد شويه وگال عنده شغل وراح ... طبعا امه تلوب مگعدت ولادقيقه تالي بيبي گلتلها اذا تردين روحي اني يمها...
وماصدگت ع الله فرت وراحت للبيت... احمد من طلعته من اجو صادق وامه بعد مشفته... وصار الظهر واحت تماضر وخالي رحيم جايبين غدا وياهم عود اليه... ماجنت اشتهي شي بس تماضر بقت تسولف تخلي بحلگي واخذني الواهس وياهه... خالي خله جوه راس علوش ميه الف ومرته هم ممقصره جايبه ملابس اليه ولابني... وره مكملت اكل كالت عندي الكم بشاره وبيبي جانت تباوعلها صفح لان عدها بس بنـات... وصدك فرحتلهم من گالت حامل بولد... تستاهل ... بيبي غيرت نظرتها ورادت اطير من الفرح وگعدتها يمها تخاف عليها صارت...
راحو خالي ومرته وبقت بَـس بيبي وابني بعده ع الممات وماكدرت حته اشيله بس شميت ريحته وقربته بيبي من حظني شويه ...
تذكرت امي وبجيت بجي ... طبعا بيبي نايمه ومخليتها تسمعني درت وجهي وبجيت...
للظهريه واجن اخواتي... ماصدكت من شفتهن... بس بيبي مسكتت الهن عاتبتهن علمودي وغسلتهن برزاله... ومابقن بس شويه وراحن لان عايفات اطفالهن بلبيت... وهنه حته بيناتهن هم ميتواصلن...
من راحن گعدتني الممرضه ورحت للحمام وغيرت ثوبي وغسلت اديه ورجليه ووجهي وكلتلها تغيرلي الفراش... وخليت راسي بعدها مااكعدت اله ب11 بليل ... حته ابني مادريت بي ... من كعدت لكيت خالتي جايه وبيدها علوشي ترضع بي ممه...
اما بيبي فهلكت هلاك وهي متتحمل كبرت ...
حجيت ويه بيبي وكلتلها تروح ترتاح ماطول خالتي يمي وصدك خابرت ع خالو رحيم اجاهه وراحت...
طبعا همزين من جنت اهذري مجانت خالتي موجوده لان جان بلحظتها جابو ورقتي... صار الليل وحرت بنفسي لان خالتي نامت وعلي ليل كله منام لل4 الصبح يله نام واني هم خليت راسي ونمت... كعدت ع صوت صادق يحجي ويه امه وجايب ريوك ... امه بس شافته كامت تتشكه يمه راح اموت يمه طلعني منا... اني كلتلها روحي لتبقين خاله... وصدك راحت حته بغير متشوف علي... گعد يمي صادق واول مره يعاملني هيج جايب ريوك ويسولف عن ابنه وفرحان همين ... دعيت ربي كون يتحسن ويايه وانسه كل الفات لخاطره وخاطر ابني...
بعدين شفته يباوع ع ساعته كلتله اذا تريد روح اكيد بيبي ع جيه وهم راح صادق وصفيت وحدي...
بيبي مااجت اله ورا 12 الظهر لان عبالهه خالتي يمي وگالت راح اخبارهه وارزلهه بَـßÊـسّ آٌني توسلت بيها ومخابرت... تغديت وخليت علي بحظني وصار الوقت ميمشي وحسيت نفسي مختنكه شوكت اكدر اطلع مااعرف... اجت الممرضه واخذت دم مني وهم حللو وبليل كالو متكدرين اطلعين هسه... حته حليب مبصدري من الضعف... اوف صدك مليت ...
وتالي الليل تقريبا ب10 اجه احمد وجايب حلويات اشكال والوان وهدايا لعلوشي من اجه بيبي نايمه .. فگعد گبالي وماكو حجي بينا بس العيون تحجي... تالي گطع السكته وكال ليش؟
-مابيدي شي.. اني مااكدر اوگف بوجه احد...
-مو المفروض هذا ابنا هسه؟
-مووقت هل حجي وانت ع ابواب زواج..
هو طلع حسره جبيره وسكت محجه شي.. بقه خمس دقايق تقريبا وخله ميه الف جوا راس علي وطلع... من طلع شبعت بجي ورا... أي مثل مااني منسيته هو هم منساني... الله يسامح الي جان السبب...
وبعد يومين كدرت اطلع وبيبي بقت يمي ليله وراحت... طبعا بيبي نازله عليها حنيه موطبيعيه مجانت هيج ويايه... من صدك هسه بديت اخاف اخسرها مادري ليش خفت.. يمكن من اشوف التعب بعيونهه اخاف لو من اشوف ظهرها شلون تقوس لو اديها الي ترعش من تلزم الشي ... فوك كل هذا اني كملتها عليها بولادتي
اوف رغم كل الي صار اتمنى انطيها من عمري.. لان اذا صار بيها شي اني انكطع من الدنيا فدنوب...
