الـدخيل

بارت ٨

-

يطلع من الشقه و يشوفه جدامه يفتح باب الشقه، مع مشعل و معاهم اكياس واجد، يلتفت مشعل له و يصرخ

"طلالل!!" يروح له بسرعه و يلتفت فهد لهم "عبالي انت بسعوديه ما قال لي ابوي انك عندنا!" يقول له و يبتسم له طلال رافعه عن الارض يحمله

"غيرت رايي راح اقعد في الكويت سنه كامله" يبتسم له، و فهد عينه على عين طلال اللي التفت له و نزل مشعل عالارض

"يلا مع السلامه مابي اتأخر" يودعه رايح للمصعد، يلتفت فهد له و يشوفه يدخل للمصعد و يتنهد داخل للشقه يشوف علي مع خالد قاعدين

"وين رايح طلال؟" يسأل علي و يلتفت له علي

"في واحد من الجامعه عازمه على عشا.." يقول له و يقلب خالد عينه

"قوله اللي قلت لي عنه!" يهمس له و يطق رجله من تحت بخفه

"ماراح اقول!" يهمس له اهوا الثاني و خالد يخزه و يلتفت لفهد اللي قعد على الكنبه و معاه جنطة ولده المدرسه و اغراضه يحطهم بالجنطه

"لو تشوف وناسته يا فهد! تخيل قعد ساعه يفكر شنو يلبس و حالته حاله طلع ثلاث بدلات و مو عارف شنو يلبس له طلع مو هين هالطلال" يقول له و فهد ولا طلع منه أي ردة فعل، ما كأنه يسمع اصلاً

"شفيك معصب؟" يسأله و يطالعه فهد و يرفع جتفه

"مو معصب" يرد بهدوء و اهوا يفتح الاجياس و مشعل راح يبدل ملابسه

"زين رد قاعد اكلمك انا" يقول له و فهد يقلب عينه

"شقول يعني؟.. كيفه خل يروح وياه انا شكو؟" يرد بعصبيه و صراخ

"زين مالا داعي تصرخ" يرد عليه علي

"تنرفز!" يصرخ مره ثانيه واقف من مكانه معاه اغراض ولده و يروح لغرفته

"شفت شلون عصب؟" يسأله مبتسم و يرفع علي حاجبه

"انت لو الله يفكنا من افكارك بس!" يوقف من مكانه و يسحبه خالد له

"انت بعد زعلت و عصبت؟" يسأله و علي يبوس خشمه

"ليش اعصب؟ بروح اسوي لي اكل جوعان" يقول له و خالد يوقف من مكانه معاه و يروحون للمطبخ مع بعض

-

"شنو حاب تاكل؟" يسأله و يرفع جتفه طلال

"مالي خبره بمطاعمكم فخلنا على ذوقك" يقول له بابتسامه، اصلاً متفشل منه ببوكه مافي غير عشر دنانير و ولا عمره راح لمطاعم غاليه و فيها ناس كثيره كان يسد جوعه بجبن و خبزه ببيته بالسعوديه و اذا اكلوا و شبعوا بيكون من الغدا اللي اهوا عيش بس

"شدعوا ترى مطاعمنا نفس مطاعمكم!" يضحك مشاري و طلال حس بعدم الراحه

"ذوقي بالاكل فاشل! مدري" يهز راسه و عينه برا الدريشه، يوقفون بالأشاره و يتنهد طلال و يهز رجله