اقتباسات

نساء

- كلها مكياج وعمليات تجميل !
غالباً هالجملة بتطلع من نساء عندهم نقص بالثقة ، ما بتحملوا فكرة وجود انسانه ذات جمال طبيعي او غير مصطنعة ، بالاخص انهم حتى لو اصطنعوا الجمال بيضلهم قبيحات الخُلق والخلق .
- والله العليم انها مصاحبة لهيك رافضة تتزوج !
امرأة تفكيرها محصور بالرجال فقط .
- يختي زوجها طرطور وخاتم باصبعها :
امرأة ذات حقوق مهضومة ،، وما بتم ترويضها سوى من قبل مسترجل سادي ذو شنبٍ عريض وكف خماسي يشوطها يجيبها في مصح نفسي , عشان هيك بتستهجن وبتشوف كل نظام حياة مخالف للحياة يلي ربيت عليها ظاهرة كونية عجيبة .
- الزلمة ما بينعاب ، امرأة جاهلة حافظة عاهات وتقاليد مجتمعها النتن ، وقبلانة على حالها تظل عبدة عادتهم ، وبينها وبين الفهم سوء تفاهم .
- النسوان ما بيجو الا بالعين الحمرة ، غالباً ما تصدر هذه الجملة من نساء كالبعير لا يفهمن الا بالعصا والضرب والقمع .
-يختي سمعت انك بتكملي ب الماستر وبدك تقدمي رسالة الدكتوراة !!
على شو بلا شهادة بلا هم زوجك هو سندك " اخرتك رح تعلقي شهادتك بالمطبخ " ، غالباٌ هذه المرأه غير قادره على النجاح واكمال تعليمها وبس تقعد بمجلس نساء مثقفات بتضل صافنه شو بحكو وهي بتقاطعهم وبتبلش شو طبختو اليوم ، ولما تطلب من زوجها تشتري شي بنفسها اول كلمة بحكيلها ياها " معيش ، طفران " .. مسكينة مش قادرة توصل لمراحل الاستقرار المادي يلي وصلتله صاحبة الشهادات يلي بدها تعلقهم بالمطبخ يا حرام .
- دريتي فلانه اتطلقت ، فسخت ..
اه سمعت يختي اكيد شايف عليها اشي ، لا بقولو هي طلبت الطلاق !!
حتى ولو .. الوحده كتبت كتابها لو على رقبتها لازم تظل مع جوزها ماحدا دايملها ، انداري يختي كل واحد بدور على راحتو ..
بتحكي ما اتفاهمو ، اي راحه وهي راح تعيش بدون زلمه ؟ الوحدة سترتها بالدنيا احسن ما ينقال عنها مطلقة او تركت . هاي الفئة تحديداً مش رح ينجزوا بحياتهم اشي اكبر من لبسهم لبدلة عرسهم وبعد هيك الحياة بنظرهم بتوقف وبتخلص كل الانجازات العظيمة من الدنيا ، اه ولااا ما صار عندها البوم صور بالابيض هيك دخلت التاريخ من اوسع ابوابه .
- متى بدنا نفرح فيكي شديلي حالك شوي البنت بعد 25 سنه ببطل يجيها حدا !!
هذه الجمله المعتاده المتكرره من قبل نصف نساء العرب الجاهلات تصدر لسبب ما انها تزوجت بعمر صغير قبل ال25 وما شافت اشي من حياتها غير المسؤوليه حتى لبس واهتمام وحريه ما عندها فغالباً بتحكي هالحكي لما تشوف بنت عايشه حياتها .

بتعرفوا مين العدو الاكبر للمرأة ، هي امرأة اخرى ربيت عالمذلة والعبودية وعقلها ملزقّ بقفاها ، لهيك غالباً بكون لسانها طويل وايدها قصيرة ، ما قدرت تتحرر من الحدود الفكرية يللي انرسمت بطريقها ، فصارت تهاجم كل شخص تعدا هالحدود ومارس حياته بشكل طبيعي ..
بالنهايه كل شخص بعيش على كيفه ،، وهيك بكون مرتاح وفي قمة سعادته ..
لذلك ارجوكي تتحفظي على نصائحك للقطيع يلي من طبقة تفكيرك ،، وما تقربي من البنات المختلفين اختلاف تام عن كيانك وشخصيتك واسلوب حياتك .