اخذوني فصليه

الجزء الاول

راح تتعرفون ع الشخصيات اثناء قراءه القصه بس طبعا لازم اعرفكم على عائلتي تعالو ويايه ندخل للبيت بس ااشش ماريد بابا يشوفكم امشو على اطراف اصابعكم هههه
يمه فزيت هذا بابا نايم بالهول خل اعرفكم عليه ابوية يشتغل نجار عنده محل براس الشارع مالتنه بابا كلش كلش عصبي ومايريدني اكمل دراسه ودائما يتعارك وية امي علمود ابطل من المدرسه اني كلش اخاف منه بس احبه
تعالو نروح للمطبخ هههه لبيت ماما قابل وين تروح اكيد بالمطبخ ماما حبيبتي اني اشبه ماما عيوني زرق نفسها ماماتي دائما تحميني من بابا يريد يضربني وهي تشتغل خياطه حتى تصرف عليه لان ابوية مايقبل يصرف على دراستي ومامخليتني محتاجه شي فديته نبع الحنان
علي: يمه وينج جوعان اكو غده

اااششش هذا علي اخويه عمره 20 سنه يشتغل وية بابا بالنجارة هو دائما يضايقني بس هم احبه لان اخوية وماعندي غيرة بالدنيا

انتو اكيد تكولون بابا وعلي يقسون ويايه بس اني احبهم لان همه كبار واني بعدني صغيرة اكيد يخافون عليه الساعه بيش هسه اوووف صارت ب 11 بالليل لازم انام عندي دوام الصبح تصبحون على خير

في الصباح
ام براء : بروو ماما اكعدي صارت ب 7 الصبح يلة وراج دوام كعدي حضرتلج الريوك
براء : اااي يمه كعدت راح اروح اسبح وافرش اسناني وابدل واجي اتريك

بعد مابدلت ولبست حجابي طبعا اني محجبه وماخلي شعرايه تطلع من الحجاب اذا بابا او علي يشوفوها يموتوني كتل
براء: فديتها لامي الله يحفظج اليه ماما لو مانتي مادري شسوي
ام براء : حبيبتي شعندي غيركم انتي وعلي يله تريكي لاتتأخرين
براء : يمه مو انتظر هند تجي تدرين مايقبل ابويه اروح وحدي للمدرسه
هند : صباح الخير خاله هااا براء تتريكين وعايفتني
ام براء : صباح النور بنتي يله تعالي تريكي ويه اختج حتى لاتتأخرن
براء: لج يله راح اسوي لفات ماضل وكت

طلعنه نركض للمدرسه لان اتأخرنه اول ماوصلنه دك الجرس
هند : براء شوكت يدك الجرس مال الحله طكت روحي تعبت من الدوام
براء: شبيج قابل مطلعيج عماله اكعدي اقري وركزي يله ويه المدرسه
هند : ااااااي واخير دك الجرس امشي يله نرجع للبيت بس بالاول نمر على ابو المكتبه هذا الحلو اليباوعلج دائما
براء : امشي لج ماروح
هند : على راحتج لعد رجعي للبيت وحدج
براء : اااي ارجع وحدي حتى انكتل لا امشي رجعي ويايه
هند : والي اريد اشتري تجين ويايه للمكتبه هسه واذا باوعلج قابل راح ياكلج
براء : اووووف اوووف منج يله راح اجي وياج وامري الله
هند : هههههههههه حبيبتي اني احبج
براء : حبتج حيه اكرهج اني
هند : هههههههههههههههه

دخلنه للمكتبه ( طبعا هاي هند تتقصد توديني للمكتبه اني ادري بيها حتى تخلي هذا الولد يباوعلي اني هيج اكول انتو شنو رئيكم تتقصد لو لا)

هند: مساء الخير
محمد(صاحب المكتبه): مساء النور تفضلي اختي
هند : اريد أأأ اريد دفتر ابو ال 200 ورقه عندك
محمد: اي عندي تفضلي عندي هاي النوعيه ومن هاي النوعيه وانتي اختاري اليعجبج..... علي باوع على براء راد يحجي وياها
العفو انتي محتاجه شي ...( طبعا براء مغلسه وماجاوب )
يابنيه عيني امي ابوية (هاي شبيها بس لا طرشه)
هند : اسمها براء هاي الي دا تصحيها
محمد: ( اها يعني اسمج براء اوووف اسم على مسمى) ...براء تسمعيني
براء ؛بصدمه هااا شنو منين تعرف اسمي انت فدوة لا احد يسمعك
محمد: بأبتسامه هاي شبيج خفتي سمعت صديقتج تصيح اسمج انتي محتاجه شي
براء : لا مامحتاجه شي شكرا هند يله خل نروح تأخرنه
هند:اوووكفي بس خل انطي الفلوس
براء طلعت من المكتبه وهند طلعت وراها تركض

هند : شبيج وجههج صار احمر واصفر امدااج جبانه اصلا البنات يكتلن نفسهن عليه وهو لا معبر وحده
براء: هند
هند: نعم
براء: انجبي ماريد اسمع صوتج منا لحد مانوصل للبيت
هند : هههههههه اي صار

اني محمد صاحب المكتبه خل اعرفكم بنفسي عمري 25 سنه خريج كليه ادارة واقتصاد طبعا ماكو تعيين فتحت المكتبه حتى اشتغل بيها طولي 180 رشيق صاحب عضلات لان كل يوم بالليل اتمرن بالنادي خل اوصفلكم شكلي بشرتي حنطيه لون عيوني عسلي دائما اسوي شوارب وسكسوكه خفيفه طبعا اني معجب براء ذابحتني عيونها من اباوع بيهن اغرك عبالك مو عيون بحر بس بعدهي صغيرة راح انتظرها تكبر حتى اخطبها وازوجها راح اعزل هسه دنيا ظهر اروح للبيت اتغده وانام وارجع افتح  العصر يله باي

هااا شكو شبيكم تمشون ورايه ....ها تردون تتعرفون على اهلي يله تعالو خل اعرفكم اول شي اروح للمطبخ الوالده اكيد بالمقر مالتها اعرفكم ع الحنيه والقلب الجبير ام حسام امي الغاليه اااي ام حسام لان حسام اخوية الجبير واعرفكم على اختى علا طالبه كليه قانون مرحله رابعه عمرها 22 سنه مخطوبه وخطيبها هم طالب وياها بنفس الكليه واخويه المشاغب والي متعبني طارق عمره 20 سنه ابو بنات والوالد العزيز ابو حسام فديته متقاعد

في بيت براء
رجعت للبيت بدلت ملابسي لبست دشداشه لان ابوية مايقبل البس تراكسودات وبرمودات
براء : يمه تردين اساعدج
ام براء : اي ماما سوي السلاطه لان ابوج واخوج على جيه
براء : صار ماماتي

اجه ابو براء : ام براء وينج
ام براء : هااا جيت خير ابو براء خو ماكو شي
ابو براء : وين الغده ترى ميتين من الجوع
ام براء: فوت غسل وتلكه الاكل صابينه
براء : بابا تعال صبينه الغده ...فدووة ماماتي مسويه برياني يخبل عاشت ايدج
ابو براء : عاشت ايدج ام براء بس لو تعلمين بنتج الطبخ هوايه احسن من الدراسه
ام براء : حجينه بهذا الموضوع هوايه اترجاك سده.....خل اكوم اصب جاي واروح اخيط

براء : بقيت ادرس الظهريه كلها والعصر كعدت نظفت البيت وغسلت الهدوم والنوب سويت العشه وغسلت المواعين ورجعت ادرس وكل يوم ينعاد نفس شي ماكو شي جديد
..........