لا أستطيع العيش بدونك

مكيدة سما وتغير رأى منير

يسافر منير لمدة 60 يوم فى الإمارات، ومن ساعة ماطلع من البيت وهايدى ماسكة موبايلها ومستنية منير يتصل بيها، بس إظاهر إن منير مش بيفكر فى هايدى ونسى إنه كان قايلها إنه أول مايوصل هيتصل بيها علشان يطمنها، فتقرر هايدى تتصل بيه من كتر خوفها عليه.
هايدى: ألو يا منير طمنى عليك يا حبيبى إنت كويس.
منير: آسف يا هايدى نسيت أتصل عليكى إنتي عارفة إنى مشغول بدور على فندق أستنى فيه لغاية ماأستلم الشغل.
هايدى: ولا يهمك يا حبيبى المهم عندى إنك تكون كويس.
منير: الحمد لله يا هايدى أنا كويس ومتقلقيش عليا، وأنا كل يوم هتصل بيكى مرتين مره الصبح ومرة بليل.
هايدى: أوك يا حبيبى مع السلامة.
تقفل هايدى الخط تلاقى باب البيت بيخبط، تروح تفتح الباب.
هايدى: ازيك يا حسام اتفضل ادخل.
حسام: معلش يا هايدى مش ينفع أدخل ،أنا كنت عاوز أتكلم معاكى شوية ، بصى هستناكى تحت وإبقى تعالى.
هايدى: خلاص ماشى 5 دقايق وأنزلك.
حسام ينزل يستنى هايدى فى الشارع، وهايدى تنزل.
هايدى: خير يا حسام فيه حاجه.
حسام: أبدا يا هايدى بس كنت عاوز أتكلم معاكى شوية بخصوص منير.
هايدى: اتفضل اتكلم.
حسام: طبعا منير حكالك على كل حاجه.
هايدى بتبص فى الأرض: آه حكالى.
حسام: طيب بصى يا هايدى أنا عاوزك تستحملى منير على قد متقدرى وتحاولى على قد متقدرى إنك تشيلى فكرة الانفصال دى من دماغه، إنتى متعرفيش منير ياهايدى، منير دا حد غلبان جدا وطيب جدا ومتواضع جدا ،لكن تجربته مع سما خلاته مش بيثق فى حد، وأنا متأكد إنه هيتخطى التجربة دى، ومتأكد كمان إنه هيعيش عمره كله يندم لو إنفصل عنك، علشان كده أنا جاى أقولك الكلمتين دول وأمشى.
هايدى: عارف يا حسام أنا لما حبيت منير كنت بقول لنفسى إن مهما الدنيا عملت فينا احنا الاتنين عمري ما أسيبه ولا استغنى عنه، تعرف لما حكالى على سبب ارتباطه بيا أنا صحيح زعلت منه وصحيح لسه زعلانه منه لكن قولت لنفسى أنا حبيته من قلبى ومش مستعده أخسره وعمرى ماأغير طريقة معاملتى ليه ولا حبى ليه، قولى يا حسام هو لسه بيحب سما.
حسام: بصراحة يا هايدى أنا كذا مرة أسأله السؤال ده وبيكون رده مش عارف يمكن أكون لسه متعلق بيها لكن مش بحبها.
هايدى: على العموم شكرا يا حسام انت اثبتلى قد ايه انت بتحب منير وقد ايه انت خايف على مصلحتى أنا وهو.
حسام: متقوليش كدا يا هايدى إنتى ومنير ربنا وحده يعلم مكانتكم فى قلبى، والله بعتبركم أكتر من إخوات.
بيمشى حسام وهايدى بتطلع تغير هدومها وتنام.
--فى الإمارات:
منير لما قفل السكة مع هايدى وخارج من المطار شاف واحدة مستنياه ومعاها ورقة مكتوب عليها اسمه.
منير: صباح الخير يا فندم أنا منير محمود.
الشابة: أهلا بحضرتك يا أستاذ منير وحمد الله على سلامتك أنا مى سكرتيرة مدير الشركة والمرشدة بتاعت حضرتك، احنا دلوقت هنروح الفندق اللى حضرتك هتقعد فيه4 أيام لغاية متستلم الشغل.
منير: أوك يلا بينا.
------------------------------------------------------------
مى/ سكرتيرة مدير الشركة
ومرشدة منير فى الإمارات.
22 سنة ، جيبة فوق الركبة ،وشعر أصفر واصل لتحت كتفها ، كعب عالى وبدى مفتوح من منطقة الصدر.
ولها دور مهم فى القصة.
******************************************************************
بيوصل منير ومى للفندق ومى بتعرف منير بأوضته.
مى: دى أوضة حضرتك، وأنا ساكنه فى نفس الدور بس فى الأول ،لو احتجت أى حاجه دا رقمى.
منير: شكرا يا أستاذه مى.
بتمشى مى وتروح تفتح باب أوضتها تلاقى سما وعمرو هناك.
سما: ازيك يا مى.
مى: انتى مين وبتعملى ايه هنا.
سما: ارتفضلى استريحى وهنعرفك بكل المطلوب منك.
بتقعد مى وتسمع من سما
سما: طبعا انتى قابلتى منير النهارده.
مى: آه قابلته أستاذ منير حد محترم جدا.
سما: طيب أنا بعرض عليكى مية ألف جنية مقابل إنك تحاولى تغريه بجسمك وهتكون فيه كاميرات بتصوركوا ، قولتى ايه.
مى: وليه السبب.
سما: بصراحة انتى ملكيش إنك تعرفى ،لكن أنا هقولك، بصى يا ستى أولا علشان أستفزه بيها وثانيا علشان أوريها لمراته ،من الآخر كده فيه مشاكل بينى وبينه وكنت عاوزه حاجه ألوى بيها دراعه. ها قولتى إيه
مى: موافقة بس مية ألف جنية مبلغ صغير خليهم مية وخمسين ،قولتى ايه.
سما: اتفقنا ، بس الأول اسمعى منى الخطة، طبعا منير هيستلم الشغل بعد 4 أيام واحنا هنضطر اننا نستنى لمدة 4 ايام وأول ما يطلع من الفندق انتى هتدخلى ومعاكى اتنين عمال هيركبوا كاميرات فى الصالة وأوضة النوم ، اتفقنا.
مى: أوك ماشى.
فى الوقت ده كان منير نايم على السرير وبيفكر فى هايدى.
منير بيكلم نفسه: أنا ظلمتها كتير وهيا بتقابل معاملتى الوحشة بالحب، أنا إيه اللى خلانى أعمل معاها كده دى مش أخلاقى ومش دا اللى أهلى ربونى عليه، ثم إنها بتحبنى ليه أنا بعاملها وحش ،لالا ﻻلا أنا لازم أغير أسلوبى معاها.
وبيمسك منير موبايله وبيكلم هايدى.
منير: هايدى ازيك عامله ايه طمنينى عليكى.
هايدى: هاي منير كنت مستنية مكالمتك ،أنا كويسة الحمد لله، ها لقيت فندق قريب من الشغل.
منير: آه الحمد لله وهستلم الشغل بعد 4 أيام.
هايدى: وحشنى صوتك فى البيت أوى يا منير.
منير: وإنتى وحشتنى إنتى كمان أوى يا هايدى.
هايدى: خلى بالك من نفسك يا حبيبى وإوعى تجوز هناك وتسبنى.
منير: ههههههههه تصدقى منكتش بفكر فكدا بس إنتى فكرتينى.
هايدى: هههههههههههه إنت حر أنا حذرتك.
منير: هايدى مش عاوزك تزعلى منى على كل لحظة زعلتك فيها وأوعدك أول ما أرجع هنعيش أحلا حياة مع بعض.
هايدى: ربنا يوفقك يا حبيبى وترجعلى بالسلامة يارب.
***** ***** *****
البارت الجاى/
مى بتنفذ خطة سما.
هل منير هيبلع الطعم خصوصا وإن مى مثيرة جدا.
============
أتشرف برأى حضراتكم فى الروايه وهل أكمل ولا لأ.