لا أستطيع العيش بدونك

فرح منير وهايدى

منير روح البيت ونام على السرير وبدأ يفكر فى سما، وفى شعوره لما شافها. يترى لسه بيحبها، ولو بيحبها هل يقدر يرتبط بيها تانى بعد اللى عملته معاه. بس ازاى يكون بيحبها وهى أصلا مش بتحبه، طيب وهايدى إيه ذنبها معاه ،ليه هو مش راضى يفهم إنها ملهاش أى ذنب فى لعبتهم هو وحسام ضد سما.
خصوصا إن فرحه هو وهايدى خلاص قرب وفاضل عليه مده صغيرة هل هيقدر يغير الموقف في صالحه.
------------------------------
مرت الأيام وعلاقة منير وهايدى بدأت تاخد نوع من الجدية فى التعامل ،وهايدى بدأت تستوعب إن منير مش بيحبها. بس خلاص الأمر تم حسمه. الفرح بعد أسبوع.
منير: ألو يا هايدى عامله ايه يا حبيبتى.
هايدى: هاى منير انا كويسة وحشتنى.
منير: بجد يا هايدى ،هايدى ممكن أسألك سؤال.
هايدى: اتفضل يا منير.
منير: انتى بتحبينى يا هايدى.
هايدى: على فكرة يا منير السؤال ده غلط ، المفروض أنا أقولك انت بتحبنى يا منير.
منير: بصى يا هايدى بصراحة أنا مش عارف.
هايدى: لكن أنا بحبك يا منير ،ليه بتعمل معايا كده.
منير: هايدى أنا لازم أقفل دلوقت.
يقفل منير الخط ريفكر فى كلام هايدى.
ويمر الأسبوع والنهارده يوم الفرح.
والدة منير بتصحيه الصبح: يلا يا عريس قوم ألف مبروك.
منير يقوم على صوت زغاريد وطبل فى البيت.
منير: صباح الخير يا ماما الله يبارك فيكى يا حبيبتى.
منير يمسك موبايله ويكلم حسام.
منير: ألو أيوه يا حسام ،أنا عايزك ضرورى.
حسام: مبروك يا عريس الليلة ليلتك و.......
منير: حسام حسام مش وقته يا حسام الكلام ده بقولك عايزك ضرورى.
حسام: أوك مسافة السكة هكون عندك. سلام.
يوصل حسام عند بيت منير ويدخل يسلم عليه ومنير يدخله أوضته ويقفل الباب.
منير: أنا مش عارف يا حسام أعمل إيه فى الكارثة دى.
حسام: ايه يا منير فى ايه.
منير: مش بحبها يا حسام وانت عارف كده، وارتباطى بيها كان لمجرد إنى أحرق قلب سما مش أكتر.
حسام: أنا قلتلك من الأول يا منير متعملش كده. بس مسمعتش كلامى، ثم ايه ذنبها يا منير، انت اللى فكرت بأنانية ومراعتش ظروفها ومشاعرها ، جاى النهارده يوم فرحكوا وتقول كده.
منير: مكنتش أتوقع إنها توصل لدرجة الجواز يا حسام أنا كنت فاكر إنها هتبقى لعبه على السريع كده وهتخلص، أنا بفكر أهرب النهارده يا حسام ومش أروح الفرح.
حسام: منير منير استهدى بالله كده وشيل الأفكار دى من دماغك، انت هتحضر الفرح يا منير والمشكلة دى هنحلها بعد الفرح.
منير: أنا مش عارف مرة واحدة الدنيا اتقلبت معايا كده ومبقتش عارف اعمل ايه.
حسام: استهدى بالله بس وعدىداليوم دا على خير علشان كلام الناس.
منير بيهدا وبيوافق انه يحضر الفرح.
أما فى بيت هايدى كانت الأمور مختلفة تماما.
والدة هايدى: ألف مبروك يا حبيبتى أخيرا هتتجوزى وهفرح بيكى.
هايدى: الله يبارك فيكى يا ماما، وعقبال يارب متفرحي بولادى.
والدة هايدى: آمين يا رب.
دخلت هايدى تغير هدومها علشان منير يعدى عليها يوصلها للكوافير.
هايدى بتكلم نفسها: يا ترى يا منير انت بتحبنى ولا لأ، ويا ترى حياتنا بعد الجواز هتبقى عاملة إزاى، هل هنرتاح مع بعض، يارب يا منير يا حبيبى تتغير بعد الجواز.
يروح منير لبيت هايدى عشان يوديها الكوافير. وبتكلموا مع بعض فالطريق.
هايدى: مبروك يا حبيبى.
منير: الله يبارك فيكى يا هايدى إن شاء الله اليوم يعدى على خير النهارده.
هايدى: إن شاء الله هيعدى على خير بس إضحك انت بس.
منير: معلش يا هايدى أنا زهقان شوية.
منير وصل هايدى للكوافير واستناها لما خلصت، وركبوا العربية وراحو على الفرح.
منير حس انه سطحى شوية فى التعامل مع هايدى فحب يفرحها شويه.
منير: بس تصدقى يا هايدى إنت من غير الميك اب أحسن بكتير.
هايدى: بجد يا منير ميرسى.
منير: هههههههه إنت صدقتى ولا ايه دا أنا بضحك معاكى.
هايدى: هههههههه تصدق إنت بارد ياواد انت أنا غلطانة انى صدقتك.
هايدى تحط راسها علي صدر منير وتقوله: أخيرا يا منير أخيرا هتبقى مع بعض.
منير بيبعد عنها: بليز يا هايدى بلاش كده ممكن تبعدى عنى عشان خاطرى.
هايدى نيتها صافيه فكرته مكسوف منها فضحكت وبعدت عنه.
وصلوا الفرح وسلموا على المعازيم ورقصوا السلو مع بعض وطول الرقصة منير باصص فى الأرض وهايدى مستنياه يبص فى عنيها ، راحت همست فى ودنه.
هايدى: بحبك يا منير.
اكتفى منير بالابتسامة وبص فى وش هايدى وبيفكر ويقول لنفسه: أنا آسف يا هايدى حسادكان عنده حق لما قالى انك ملكيش ذنب أظلمك معايا كان عنده حق بس أنا كنت أعمى ساعتها، سامحينى يا هايدى.
منير قال الكلام ده لنفسه وهو باصص فى عنين هايدى ،وحس بشئ من احتقار النفس لما بدأ يستوعب إنها ملهاش ذنب.
المهم الفرح خلص والعروسين روحوا بيتهم.
فى البارت الجاى إنشاء الله هنشوف جوانب من حياتهم مع بعض من أول ليلة.