لا أستطيع العيش بدونك

لقاء غير متوقع

رايح منير الفرح مع خطيبته هايدى وبيتكلموا مع بعض فى الطريق.
هايدى: عقبال فرحنا يا حبيبى، دا أنا هكون أسعد إنسانة فى الدنيا.
منير بيحاول يغطى على الكلام: طيب بسرعة يا أسعد إنسانة علشان كده هنتأخر على الفرح.
هايدى بدأت تاخد بالها إن منير بيحاول يتجنب الكلام معاها لكن هي مش قادرة تشك فيه لأنها لسه معرفتهوش وهي فاكره إنه لما بيتجنب الكلام معاها يبقى مكسوف منها ،علشان كده هي مش بتشك فيه.
وصل منير وهايدى فرح صاحبهم وقعدوا مع حسام بيهزروا وبيتكلموا فى مواضيع مختلفة.
وهما قاعدين لقوا سما جاية عليهم مع خطيبها الجديد عمرو.
سما: هاى يا شباب ازيكوا.
حسام: ازيك يا سما مش بنشوفك ليه.
سما: سورى يا حسام غصب عنى أصل أنا وعمرو كل يوم فى مكان مختلف مش بنقعد فى مكان محدد يعنى يوم تلاقينا فى اسكندرية يوم في الغردقة يوم فى شرم الشيخ، عايشين حياتنا يعنى.
حسام: أهاا ربنا يوفققوا.
منير بخباثة: اتفضلي اقعدى يا سما.
سما تقعد هي وخطيبها عمرو
منير: سما أعرفك بهايدى خطيبتى ،هايدى أعرفك بسما صاحبتى.
سما إتفاجأت لما منير قال إنها مجرد صاحبته وإتضايقت من منير. سما: سورى يا منير نسيت أعرفك بالبشمهندس عمرو خطيبى.
منير: تشرفنا يا فندم.
عمرو: الشرف ليا يا أستاذ منير.
------------------------------------------------------
عمرو/ خطيب سما
مهندس معمارى غنى جدا
يتمتع بقدر من الوسامة والجاذبية
شغال فى دولة من دول الخليج
بيسافر كتيير ومشغول دايما
------------------------------------------------------
هايدى تهمس فى أذن منير: مين دى يا منير.
منير: هكلمك عنها بعدين يا حبيبتى.
الشلة كلها بتتكلم مع بعضها ومنير لوحده فى عالم تانى لأنه مكنش متوقع إنه هيقابل سما ،وكمان نظراتها ليه وهي بتعرفه بخطيبها وكأنها بتقوله ده أحسن منك لأنه غنى ، وصعبت عليه نفسه بجد لما افتكر انه كان بيحبها من قلبه وحبه ليها كان حب حقيقى مش حب مصلحة.
سما: ياااه يا جماعة دا الوقت عدا بسرعة معاكوا إحنا هنستأذن بقا عشان البشمهندس عنده شغل من بدرى. وعلى فكره يا منير خطيبتك دى ظريفة أوى وإنت وهي لايقين على بعض أوى.
سما قالت الكلام ده بنبرة فيها شئ من الإستفزاز والإحتقار.
وهايدي ومنير وحسام حسوا بكده. هايدى: بليز يا منير يلا نمشى أنا خلاص مش قادره أستحمل.
منير: أوك يلا بينا ،سلام يا حسام.
حسام: معلش يا هايدى هي سما كده بتحب الهزار.
هايدى بتحاول تكتم الدموع: لا لا عادى عادى مفيش مشكلة.
حسام: طيب مع السلامة.
هايدى فى الطريق طلبت من منير انه يقولها مين سما وعلاقته بيها.
هايدى: ممكن يا منير تعرفنى مين اللى اسمها سما دى وعلاقتك بيها ايه.
منير: سما دى كانت خطيبتى وسبنا بعض.
هايدى: وسبتها ليه يا منير.
منير: بصراحة هي اللي سابتنى مش أنا، سابتنى علشان أنا حالتى المادية متوسطة ،خلتنى أندم على كل لحظة قضتها معاها، بعد سنتين من الخطوبة سابتنى علشان الفلوس، تعرفى يا هايدى إن كان باقى على فرحنا شهرين بس ،لكن النصيب، والحمد لله على كل حال.
هايدى: بصراحة أنا بعد كلامى معاها وكلامها معايا النهارده أقولك يا منير إن ربنا رحمك من العيشة معاها.
منير: الحمد لله، بس مش عاوز تزعلى من الموقف اللى فى الفرح، هي أكيد كانت زعلانة لما شافتك.
هايدى: طالما إنت معايا يا منير أنا دايما فرحانة ومش هتكمل فرحتى غير لما تبقى ليا وأبقى ليك.
منير حاول يعمل نفسه مش واخد باله ،وفضلوا يتكلموا مع بعض لما منير وصل هايدى لبيتها.
منير: تصبحى على خير يا هايدى.
هايدى: تصبح على خير يا حبيبى ،مع السلامه.
البارت الجاى مميز لأن منير هيتجوز هايدى وهتبدأ تظهر مشكلاتهم الزوجية وعدم تفهمهم لبعض.