جوازه غصب

الجزء السادس ..

مها بصوت نايم : ايوه
محمد : ميهو لسه نايمه ياحبيبى
مها بكسل : اه
محمد : انا اتصلت الصبح عشان نرجع زى زمان انيمك واصحيكى على صوتى فاكره ...
مها بابتسامه : ودى حاجه تتنسى
محمد : هههههه طب يلا ياروحى قومى حضرى الفطار
مها : لا مش عايزه افطر دلوقتى خلينى معاك شويه
محمد : لا مش ليكى لجوزك
مها وكشرت : برده يامحمد
محمد : احنا مش اتفقنا ياحبيبتى
مها : مش هينفع كدا هو اللى فى دماغك فى دماغك
محمد : صدقينى دا الحل الوحيد وانا مش هكلمك فيه عشان ماابقاش بضغط عليكى فكرى براحتك وردى عليا
مها : اوك هقوم
محمد : ماشى ياعمرى بحبك
مها : بحبك
وفعلا قامت مها عشان تعمل الفطار لمصطفى بس دورت عليه ومالقيتهوش , اتصلت بيه
مها : الو
مصطفى : نعم
مها : انت مشيت امتى
مصطفى : اشمعنى
مها باحراج : عادى انا ملقتكش قولت اشوفك فين
مصطفى ببرود : والله يا انسه مها معتقدش يهمك ان واحد غريب عنك راح فين واللا جه منين شاكرين افضالك سعادتك
مها : طيب اللى يريحك اسفه ع السؤال سلام
وبعد ما قفل
مها ( احسن جتك القرف انا اللى غلطانه انى سألت اصلا بس ماشى مش هعبرك بعد كدا )
وعند ياسر
ياسر بحزن : خلاص بقى ياابنى وجعت قلبى
مصطفى وبيمسح دموعه : دى حتى محستش انى مروحتش البيت من امبارح
ياسر : معلش ماانا قولتلك نفذ اللى اتفقنا عليه
مصطفى : مش هينفع معاها هى مش فارق معاها اصلا
وكمان لما بكلمها ببرود انا اللى بتعب مش هى
ياسر : طب بس كمل للاخر واهى هتبقى اخر محاوله
مصطفى : عارف انا فرحت اوى لما لقيتها بتتصل فكرتها حست انى مش موجود بس وجعتنى اوى لما قالت مشيت امتى
هو انا للدرجه دى مش مهم عندها مش حاسه بوجودى ولا بغيابى
ياسر : يمكن عشان نامت يامصطفى متظلمهاش ولما صحيت اتصلت
مصطفى : هى اتصلت بس عشان تعمل الواجب مش اكتر لو كان فى نيتها غير كدا كانت صممت على سؤالها
ياسر : لا حول ولا قوه الا بالله خلاص روق بقى بذمتك احنا البنات تعمل فينا كدا
مصطفى : انا عمرى ما كنت ضعيف
غير قدامها بس معرفش ليه كدا
ياسر : انه الحب يا صديقى
مصطفى : للاسف
ياسر : خلاص فكك قوم يلا نلبس وننزل الشركه ورانا شغل كتييييييير
مصطفى : روح انت انا مش قادر
ياسر : يا اخى قوم احنا هنضيع مستقبلنا كمان يلا يلا
مصطفى : حاضر امرى لله
-----------------------------------------------------------------------
وفــى بيت اهل مهــا .............
الام بصدمه : يعنى ايه
الاب بحزن : يعنى ايامى بقت قليله
الام : بعيد الشر عنك ياحبيبى
الاب بابتسامه : هو انا لسه حبيبك حتى لما كبرنا
الام : وهتفضل طول عمرك حبيبى وجوزى وابو بنتى الوحيده انت بتقول ايه يا احمد
الاب : ماكانش نفسى اسيبكوا بس الحمد لله اهو القدر
الام : طب ما نروح لدكتور تانى
الاب : خلاص بقى يا ام مها سيبيها لله محدش عالم ,قادر على كل شئ
المهم دلوقتى انا كتبت الوصيه وظبطت كل حاجه
الام بدموع : بس بقى متقولش كدا
الاب : اول واخر مره هفتح الموضوع معاكى بس لازم اعرفك كل حاجه عشان ميحصلش لخبطه
بس انا خايف اوى
الام : من ايه ؟
الاب : خايف اموت وبنتى بتدعى عليا وزعلانه منى
بس والله مصطفى دا هيسعدها انا شوفت حب بنتى فى عينه والعين مبتكدبش
الام : متقولش كدا البت عمرها ما تكره ابوها هو الدم عمره يبقى ميه
الاب : يلا ربنا يهديها ويصلحها ويخلينى لحد ما اشوف ابنها او بنتها وبعدها مش عايز حاجه من الدنيا
الام وحضنته : ان شاء الله هتعيش وتشوف وتفرح بيهم كمان ربنا يخليك لينا
------------------------------------------------------------------------
ميار : الووو ايوه ياعم الناس لما تتجوز بتنسى
مها : هههههه لا ابدا واانا اقدر
ميار : لا انا زعلانه يعنى لو مسألتش متسألوش انتوا
مها : معلش عندى المره دى
المهم انتى اخبارك ايه واخبار أستاذ هانى
ميار : اممم ما بلاش استاذ ياستى احنا عيله واحده على العموم الحمد لله احنا بخير
واخبار حبيبى ايه ولا اقول مصطفى بقى خلاص اتجوز
مها :هههههههههه قولى اللى انتى عايزاه ما انتى اخته
ميار : مفيش غيره يعنى ماشى ماشى
انا قولت اتصل اقولكوا خبر سعيد , مصطفى عندك ولا لسه مجاش
مها : لا لسه
خير ؟
ميار : انا ياستى وبعد سنتين جوااز اخيرا حامل الحمد لله
مها : بجد الف الف مليون مبروك يا ميرو عقبال ما يجى بالسلامه وتفرحى بيه
ميار : امين يارب وعقبالكوا انتوا كمان
مها : اه اه ان شاء الله
ميار : ايه عايزين تأجلوا ولا ايه
مها بلخبطه : لا سايبينها لربنا
ميار : خير ياحبيبتى ان شاء الله نفرح بيكوا
مها : ان شاء الله
------------------------------------------------------------------
وفــى الشركه
مصطفى : هاتى ملف شركه .... وتعالى يا يسرا
يسرا : حاضر يافندم
وبعد دقايق دخلت يسرا المكتب
يسرا : اتفضل يافندم
مصطفى : شكرا
اطلبى واحد قهوه
يسرا : بس دا رابع فنجان قهوه كدا غلط
مصطفى وبصلها باستغراب
يسرا متصنعه الكسوف : اسفه يافندم اقصد ..
مصطفى وقاطعها : خلاص خلاص اعملى اللى قولتلك عليه
يسرا : اوك
مصطفى : استنى يا انسه يسرا
يسرا : نعم ؟
مصطفى : بصى يمكن انا ماليش حق فى اللى هقوله دا بس ياريت اللبس يتظبط عن كدا شويه
يسرا : يتظبط ازاى حضرتك ؟
مصطفى : يعنى بلاش جيبه قصيره وكدا زى ما انتى فاهمه الشغل مظاهر وانا مش عايز المظهر دا اللى يبقى ظاهر فى شركتى
بره الشركه انتى ملك نفسك تمام ؟
يسرا : تمام بعد اذن حضرتك
وخرجت وقابلها ياسر وهو داخل
وبعد ما دخل
ياسر : ايه ياعم مين دى وخارجه شايطه كدا ليه
مصطفى : دى السكرتيره عشان ارحمك ياسيدى زى ما قولت
معرفش شايطه ليه بس انا قولتلها تظبط لبسها دا انا مش ناقص قرف
ياسر : هههههههه تمام كنت عايزنى فى ايه بقى
مصطفى : عايزين نجهز اجتماع عشان فى صفقه مهمه للشركه وهندخل مناقصه لازم كل حاجه تبقى مظبوطه لو الصفقه دى نفعت هترفعنا كتير
ياسر : ان شاء الله خلاص انا هبلغ الناس
مصطفى : خليك انت اومال السكرتاريه بتعمل ايه انا بعرض الرأى عليك
ياسر : ههههه اه صحيح طب امتى ؟
مصطفى : ياريت النهارده عشان نكسب وقت
ياسر : وانت تعبان كدا
مصطفى بابتسامه : ما انت قولت ياصاحبى الشغل مهم
يلا بس خلينا نشوف ورانا ايه
ياسر : ماشى هيبقى بعد ساعه يكون هانى جه
مصطفى : تمام
------------------------------------------------------------------------
يسرا ( والله وعاملى فيها محترم ماشى ياسى مصطفى بس مش هتقع من ايدى ابدا انا بقى هدخلك من السكه بتاعتك غااالى والطلب رخيص)
وفى التليفون
يسرا : ايوه يا فندم
اه تمام بعد ساعه اوك هبلغ حالا
---------------------------------------------------------------------
وفـى التليفون
سالى : انا مش مطمنالك والله يا مها
مها : ههههههه ليه يابت
سالى : معرفش حاسه انك هتعملى مصيبه
اصلى حلمت حلم كدا مش عاجبنى
مها : وهو كل الاحلام حقيقه
سالى : اه انتى عارفه ان احلامى حقيقه وبالذات لو لحد قريب
مها : اممممم ماشى ياست الشيخه
سالى : مها
مها : ها ؟
سالى : ابعدى عن سكة محمد وخليكى فى بيت جوزك
مها باستغراب : عرفتى منين
سالى : مش بقولك بتعملى مصيبه
ما هو دا الحلم
مها : حاضر يا سالى
سالى : عشان خاطرى متغلطيش خليكى مها اللى احنا عارفينها متنزليش من نفسك عشان واحد ملوش لازمه
مها : يعنى اعيش مع واحد مش عيزاه
سالى : لا ياستى ماتعيشيش اطلقى زى ما اتفقتوا بس خليكى باحترامك وابعدى عن الوحش وخلاص
مها بتنهيده :ربنا يسهل ياسالى
سالى : وعد يامها ؟
مها : ربنا يسهل بقولك ايه مصطفى جه هقفل عشان احط الغدا
سالى : ماشى هنتكلم تانى مش هتخلعى منى
وبعد ما قفلت
مها : حمد الله ع السلامه
مصطفى ببرود : الله يسلمك
مها : غير هدومك وهحضرلك الغدا
مصطفى : لا انا اكلت بره هدخل انام
مها : اممم اوك اللى يريحك
مصطفى مردش وسابها ودخل اوضته
مها ( اووووووووووف بقى يارب عدى الشهرين دول بسرعه مش طايقه انا كدا )
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
فـى التليفون
محمد : خلاص ياحبيبتى هستناكى
مها : محمد حد هيبقى موجود ؟
محمد : ياحبيبتى والله لا محدش هنا اصلا كلهم مسافرين هستناكى بقى متضيعيش فرحتى
مها : لا طبعا مقدرش
محمد : ماشى هقفل انا دلوقتى
مها : ماشى سلام
------------------------------------------------------------
فـى الشركه
مصطفى : فى لسه ورق هيتمضى يا يسرا ؟
يسرا : لا يافندم كدا خلاص
مصطفى : تمام انا همشى دلوقتى لو عايزه تمشى انتى كمان اتفضلى خدى يوم راحه كدا
يسرا : متشكره جدا يافندم
استاذ ياسر كان سأل عليك وقالى لما تخلص تروحله
مصطفى : اوك اتفضلى انتى دلوقتى
وراح مصطفى لمكتب ياسر
ياسر : ايه ياعم المشغول
مصطفى : اووف الشغل كان كتير اوى النهارده
ياسر : معلش النجاح مش سهل برده
بس شكلك تعبان اوى مالك ياصاحبى
مصطفى : مش عارف شكلى داخل ع دور برد مصدع خالص
ياسر : دور برد وبس
مصطفى : متضايق شويه يا ياسر
ياسر : طيب بقولك ايه ما تيجى ننزل نتمشى شويه انا وانت وهانى اهو نغير الجو دا
مصطفى : ماشى بس فين
ياسر : فى كافيه ع النيل جديد بس حلو اوى
مصطفى : يووووه هو احنا مبقاش ورانا غير الكافيهااات
ياسر : ههههههههه ما هى دى الاماكن بتاعت المتجوزين ياعم اومال اوديك ديسكو
مصطفى :ههههههه بقى كدا ماشى
-----------------------------------------------------------------
وفـى بيت مها
وهى واقفه قدام المرايه
مها ( اووه كدا تمام بس ياترى هعجب محمد ولا لاء
مش ملاحظه ان اللى بتعمليه غلط
اوووف لا مش ملاحظه ومش عايزه اى كلام ولا تأنيب ضمير هما اللى عملوا كدا وهما اللى يشربوا مش انا
يادوب اتصل بمحمد اقوله انى جايه )
-------------------------------------------------------------------
وفـى الكافيه
هانى : يا راجل يعنى انت متعرفش
مصطفى : لا والله يابنى هعرف واسكت يعنى
هانى : ميار بتقول انها اتصلت بمراتك وقالتلها
ياسر : يمكن نسيت ياجدعان
مصطفى : المهم الف مبروك ياحبيبى ربنا يجبها بالسلامه
هانى : الله يبارك فيك ياخالو ربنا بيعوض والله
انا كنت فاكر انى مش هتعالج بس اختك جدعه ووقفت جنبى
مصطفى : ههههههههه طالعه لاخوها
ربنا يخليكوا لبعض
هانى : عقبالك انت ومها بقى شدوا حيلكوا انا حاجز البت للواد من دلوقتى
مصطفى : اه ان شاء الله
ياسر وحاول يتوه : ههههههه طب قول عقبالى انا الاول بقى
هانى : هههههههههههه والله ما انت نافع ومش هتشوف جواز
ياسر : ليه كدا بس ياعم حرام عليك
مصطفى : لا انا عندى عروسه حلوه لياسر
هانى : مين ها مين مين مين
مصطفى : ههههه ياعم اصبر
ياسر : لا ياعم خليهالك مش عايز اعرف انا ضد الجواز
مصطفى : هتعجبك اوى والله
ياسر : شكرااااا خليها لحد تانى
هانى : انا مش قولتلك انت مش نافع فى جواز لا وفقر كمان
مصطفى وحط ايده على راسه
هانى : ايه يابنى مالك
مصطفى بتعب :صداع هيموتنى مش قادر
ياسر : خلاص تعالى نوصلك تروح ترتاح
------------------------------------------------------------------
مها : ايوه ياحبيبى انا جاهزه خلاص ونازله اهو
محمد : تمام وانا مستنى
مها : حاضر
وقفلت الموبايل ولسه بتفتح الباب
مها : ايه دا انت جيت
مصطفى : شايفه ايه يعنى
مها : لا ابدا حمد الله ع السلامه
مصطفى : لو خارجه اتفضلى شوفى هتروحى فين بس متتأخريش والسواق لسه تحت
مها بلخبطه : لا لا خلاص انا هنا اهو
احضرلك الاكل ؟
مصطفى : لا انا تعبان هنام
مها : سلامتك مالك
مصطفى : الله يسلمك مفيش تعبان وخلاص
وسابها ودخل اوضته
مها ( اوووووووف بقى مش هعرف انزل كدا
اما اتصل بمحمد اقوله )
مها : ايوه يامحمد
محمد : ايه انتى فين
مها : معلش ياحبيبى مش هعرف اجى
محمد : ليه بقى
مها : اصل مصطفى جه ودخل نام
محمد بعصبيه : طيب دخل نام ما تنزلى عادى ايه المشكله
مها : مش عارفه بيقول اخد السواق معايا
محمد : اوووووووووووووف اقفلى دلوقتى يا مها
وقفل فى وشها
( يووووه هو انا ناقصه
طب هدخل اشوف مصطفى نام ولا لسه )
-----------------------------------------------------------------------
وبعد شويه عند محمد
محمد : ايوه جاى ياللى ع الباب
ميين ؟
محمود : مين ايه ياعم انا محمود
وفتحله الباب
محمد : اوووف يخربيتك وقعت قلبى
محمود : ااممم بدل ما وقعت قلبك يبقى بتعمل مصيبه
محمد : هههههههههه ادخل ادخل
محمود : ايه ياعم
محمد وطلع الشيشه والبيره
محمود : ايه انت قلبتها قهوه
محمد : ههههههه لا كنت بعمل مزاج بس
محمود : ايه مستنى مزه ولا ايه
محمد : اه كنت مستنى مها
محمود بصدمه : مها !
محمد : ايوه ومالك اتصدمت كدا
محمود : هى بتجيلك الشقه
محمد : لا دى اول مره ومعرفتش تيجى
محمود : اكيد موافقتش
محمد : لا ياعم وافقت ولبست كمان
محمود : كمان طب ومجتش ليه
محمد : جوزها جه ومعرفتش تنزل
محمود : امممم مش قولتلك سيبها ف حالها ياعم
محمد : ياصاحبى قولتلك دى لقطه
محمود : طب فهمنى ايه ف دماغك
محمد : اممم طيب مع انى مبحبش اقول غير لما انفذ بس ماشى
ياسيدى انا بقولك لقطه عشان متجوزه يعنى هعرف اخد اللى انا عاوزه من غير وجع دماغ ممكن تعمله اي بنت فهمت
محمود : يخربيت شيطانك وانت هتعمل معاها كدا
محمد : ايون بالظبط كدا
محمود : وهى عارفه
محمد بنظرة شر : هههههههههههه لا لسه هتعرف دى المفاجأه بقى
------------------------------------------------------------------------
ودخلت مها الاوضه
مها ( شكله نايم هخرج واهو كدا كدا كان عارف )
وفجاه وهى خارجه سمعت صوت
مصطفى بصوت ضعيف : مها مها مها
مها اتخضت : ايوه يا مصطفى فى حاجه ؟
مصطفى مردش واستمر على حالته
مها : مصطفى ؟ انت سامعنى
وقربت منه
مها : مصطفى مالك فى ايه
وحطيت ايدها ع راسه
مها : ياااه دا انت سخن اوى
وراحت مها جابت كمادات ميه سقعه وفضلت جنبه
مها ( ياه يامصطفى للدرجه دى بتحبنى بتقول اسمى حتى وانت نايم يا ما نفسى كنت ابقى بحبك اوى )
-----------------------------------------------------------------------
ميار : مش عارفه ليه ياهانى قلقانه على مصطفى
هانى : هو كان تعبان شويه النهارده بس ارهاق يعنى مش حاجه
ميار : لا انا بقالى فتره مش مطمنه حاسه ان فيه حاجه
هانى : حاجه ايه يعنى ؟
ميار : مش عارفه يمكن حاجه بينه وبين مها
هانى : ياشيخه حرام عليكى دول لسه عرسان
ميار : مش عارفه بقى مش مطمنه وخلاص
هانى : يمكن احساسك مش صح
ميار : يارب فعلا ميبقاش صح بس عايزه اقولك ان التوأم بيحسوا ببعض حتى وهما بعيد
هانى : يا واد يا حساس انت
ميار : هههههههه ييوووه بقى يا هانى مفيش مره اتكلم معاك بجد ومتقلبهاش هزار
هانى : اعملك ايه ما انتى اللى شاغله نفسك , بكره ان شاء الله ابقى كلميه وشوفى
ميار : ماشى ماشى هقوم اعملك العشا
هانى : لا لا تعالى هنا مش عايز عشا
ميار : اومال عايز ايه
هانى : ما تيجى اقولك كلمه سر
ميار : ههههه يووه دا وقته خلينى اعمل الاكل يا هانى
هانى : والله هقولك كلمه سر انت اللى دماغك بتروح لبعيد كبسه
ميار : ههههههههههههه ياباى عليك رخم مش هسمع بقى
خلينى اقوم اتصل بمصطفى
هانى : هتلاقيه نايم دلوقتى اتصلى بكره براحتك ياستى
-----------------------------------------------------------------
مها : ايوه يا ماما
الام بخضه : ايه يابنتى فيه حاجه
مها : معلش بتصل متأخر مصطفى بس سخن شويه وعملت كمادات بس مفيش تاثير
مفيش دوا معين اجيبه ؟
الام : هو بقاله قد ايه سخن
مها : من زمان من ساعة ما رجع من الشغل واحنا الساعه 12 دلوقتى ومفيش تحسن
الام : طيب انزلى اى صيدليه جنبك هاتى حقنه تخفيض حراره عشان كدا خطر عليه وحطيله تلج كتير
مها : حاضر يلا سلام دلوقتى
الام : مها ابقى طمنينى يا بنتى
وقفلت مها ونزلت اقرب صيدليه وجابت الدكتور معاها عشان الحقنه
مها : شكرا يادكتور
الدكتور : العفو اى خدمه بصى انا جيبتلك الدوا دا معايا كمان عشان البرد الشديد
مها : هى مفعول الحقنه هيتأخر
الدكتور : لا ان شاء الله ساعه بالكتير والحراره هتنزل بس انتى استمرى بالتلج والكمادات
مها : ان شاء الله
------------------------------------------------------------------
وتانى يوم ف الجامعه
محمود : ياعم افهم بقولك والله كان حاطط كاميرات ف الشقه عشان يصورها
احمد : يانهار اسود كمان !
محمود : اه والله انا عارف القذاره اللى بيعملها
احمد : طيب وبعدين
محمود : انا لازم اوصل لمها
احمد : ازاى وهتعمل مشاكل لنفسك
محمود : مش مهم ياابنى دى اعراض ناس والبت غلبانه فاكره انه بيحبها
احمد : بصراحه يامحمود مستغرب انك بتعمل كدا
محمود : ليه عشان انا بتاع بنات يعنى ؟ انا ممكن احب كتير واكلم بنات اكتر بس مأذيش بنت ف سمعتها ابدا مش للدرجه دى يعنى
احمد : خلاص بدام نيتك سليمه انا عندى فكره
توصلنا ليها
محمود : ايه هى .......................
................
تفتكرو ايه هى فكره احمد
وموقف مها هيكون ايه ؟؟
انتظرووو ❤