جوازه غصب

صدمه

تانى يوم الصبح
مصطفى بصوت واطى : مها مها ...
مها مفزوعه : ايه فى ايه
مصطفى : بسم الله الرحمن الرحيم ايه ياحبيبتى انا اسف
مها وشدت الغطا على نفسها : فى حاجه يامصطفى
مصطفى : انا نازل الشغل مش عايزه حاجه
مها : استنى مجهزتش الفطار اسفه راحت عليا نومه
مصطفى : ولا يهمك ياحبيبتى انا فطرت خلاص ريحى انتى وكملى نومك
مها : اوك بالسلامه
مصطفى وباسها ع جيبنها : هتوحشينى لحد ما اجى
----------------------------------------------------------------------
سالى : الو
سلمى : ايوه مين
سالى : يالهوى مش عارفه صوتى
سلمى : مين يعنى ع الصبح
سالى : يخربيتك هضيعك انا ستك سالى يابت
سلمى : يابنت الايييييييييه جيتى امتى ؟
سالى : ههههههههههه امبارح بس قولت اتصل عليكى الصبح
انتى معرفتيش صوتى يابت ...
سلمى : لا استغربت اصل الرقم مصرى
كدا يا وحشه ومتقوليش
ساالى : قولت اعملها مفاجأه
سلمى : وبعدين انتى مش قولتى نازله ع الامتحانات
ساالى : اه ياستى بس جوزى جاله شغل ف مصر كام شهر كدا قالى ننزل وبالمره تمتحنى
سلمى بفرحه : بجد يعنى مش هتسافرى تانى
سالى : لا ياموكوسه الشغل تبع شركته اللى هناك هيخلص ويرجع
سلمى :اوووووف وانا اللى قولت هنتجمع تانى
سالى : ما احنا هنتجمع ان شاء الله اومال انا هنا بعمل ايه
سلمى : ههههههههههه قشطه يا ريس
سالى : هى البت مها نزلت الكليه ولا لسه
سلمى : لا نزلت امبارح
سالى : اممم ومش نازله النهارده طبعا
سلمى :اكيد لا ماهيا مقالتش لجوزها خليها بكره وننزل كلنا مع بعض
سالى : تمام مقتوليلهاش بقى خلينا نعملها مفاجأه بكره
سلمى : قشطه ياكبير وحشتنى مقالبك والله
سالى : ههههههههههههههه وانتى اكتر
-----------------------------------------------------------------------
وفى شركه مصطفى
هانى : اتفضل ياسيدى ادينى لقيتلك سكرتيره
مصطفى : هى فين دى
هانى : بره
مصطفى : وكويسه ؟
هانى : عيييييييب دا انا عملتلك انتر فيو و دنيا انت مستقل بيا ولا ايه يا استاااذ
مصطفى : هههههههههه ماشى ياسيدى
هانى : هقوم انا بقى وابعتهالك بالمره
مصطفى : استنى
هانى : ايه ؟
مصطفى : مشوفتش ياسر بقاله كام يوم مختفى و مش بيرد ع الموبايل
هانى : لا والله انا استغربت برده بس فكرته اخد منك اجازه ولا حاجه
مصطفى : بدأت اقلق خلاص نفوت عليه بعد الشغل
هانى : خلاص تمام
انا هروح مكتبى بقى وهبعتلك السكرتيره
مصطفى : اوك
-----------------------------------------------------------------
مها : الحمد لله ياماما وانتى
الام : كويسين يا حبيبتى
اومال فين مصطفى
مها : نزل الشغل
الام : هو لحق دا انتوا عرسان
مها : مش فاضى بقى عنده شغل
الام : طيب يابنتى
بقولك انتوا معزومين عندنا بكره ان شاء الله
مها : لالالا كفايه عزومات انا زهقت
الام : دى اوامر عليا من ابوكى
مها : ههههههه ياستى اخلعى منه والنبى كفايه كدا
الام : معلش ما انتوا عرسان بقى لازم العزومات وكدا
مها :بلا عرسان بلا قرف
الام : ليه كدا يا بنتى هو حصل حاجه
مها بضيق : مفيش
الام : بصى يامها انا عارفه انك مغصوبه ع الجوازه بس بكره تعرفى ان ابوكى عنده حق
مها : يوووه هنفتح ف الحوار دا تانى
الام : انا بقولك اللى يريح ضميرى
مها : ماشى ياستى متشكرين
الام : متتأخروش بكره بقى
مها : هقول لمصطفى واكلمكوا
---------------------------------------------------------------
وفـى مكتب مصطفى دخلت السكرتيره
يسرا ( ياااه االمكتب تحفه ايه دا كل دا مكتب وورد ولا المز دا هشتغل معاه ازاى طلع عندك حق يا بت يا الاء شكلها هتلعب معانا )
يسرا : احم السلام عليكم
مصطفى وبص على يسرا
اللى كانت لابسه جيب قصيره شويه وعليها جاكت نص كم
: وعليكم السلام اتفضلى يا انسه
يسرا وحطت ورق ع المكتب : دا السى فى
مصطفى وبص فيه : يسرا صح
يسرا ( ايه الذكاء دا اومال مكتوب سنيه مثلا ) : اه يا فندم
مصطفى : طيب مكتوب خريجه تجاره ايه علاقه التجاره بالسكرتاريه
يسرا : احم الحقيقه انا دخلت الكليه غصب ومش بحب مجالها لما اتخرجت اخدت دبلومه علاقات عامه
مصطفى : تمام انتى هتقعدى مع انسه الاء وهى هتفهمك كل حاجه
يسرا : ان شاء الله اكون عند حسن ظنك يافندم
مصطفى ( لبسك مش مبشر بس ماشى ) : ان شاء الله اتفضلى انتى
وبعد ما مشيت
مصطفى مسك التليفون : ايوه ياهانى هخرب بيتك ان شاء الله
هانى : ههههههههههههه ليه بس ياعم عملتلك ايه
مصطفى : هى دى السكرتيره منك لله مش قولنا عايزها محجبه
هانى : ياعم انا عرفت انها شاطره وكويسه اللبس مش مشكله
مصطفى : لا طبعا مشكله , المظهرالعام مهم عندى
هانى : اممم خلاص ياسيدى نبه عليها لبسها ميبقاش خارج والحجاب ملناش دعوه بيه
مصطفى : طيب تمام خلصت ولا لسه
هانى : قربت اهو
مصطفى : اوك عشان نشوف ياسر بقى
هانى : تمام
-----------------------------------------------------------------------
وبعد يوم طووويل
فـى البيت
مها : حمد الله ع السلامه كل دا ؟
مصطفى : حبيبتى انا اسف والله كنت عند ياسر صحبى واتأخرنا
مها : طب منا اتصلت كتير كان مقفول
مصطفى : الموبايل فصل شحن
مها : اوك هحضرلك الغدا
مصطفى : لا ياحبيبتى انا اكلت خلاص هناك
اصل ياسر كان تعبان بقاله كام يوم ومحدش معاه ف شقته جبناله اكل انا وهانى واكلنا كلنا
مها : ليه هو مش متجوز
مصطفى : لا عازب وباباه متوفى وامه مسافره لاخته برا مصر
مها : اه سلامته
مصطفى : الله يسلمك ياحبيبتى انا اسف متزعليش الظروف جت كدا
مها : ولا يهمك
مصطفى : وحشتينى اوى
مها : تسلم
مصطفى : امممم طب ما تيجى ننام
مها : اوك انا هدخل انام تصبح ع خير
وراحت ع الاوضه اللى جنب اوضة نومهم زى كل يوم
مصطفى شدها من ايديها : رايحه فين بقولك وحشتينى تسيبينى وتمشى
مها : فى ايه
مصطفى ومتكلمش وشالها
مها : مصطفى نزلنى انت بتهزر !
مصطفى : لا مبهزرش مراتى وانا حر فيها يا ستى مالك انتى
وخدها اوضتهم
وطبعا مها وشها جاب كل الالوان شويه كسوف على خوف ع رفض
مها : ممكن تنزلنى بقى
مصطفى : لا هيه بقى
مها بعصبيه : يوووه نزلنى بقى
مصطفى ونزلها : طب من غير عصبيه انا بهزر معاكى
مها ومردتش
مصطفى : مها ممكن نتكلم شويه بصراحه
مها وبدأت تقلق : اوك اتفضل
مصطفى : انتى ليه كل ما اقرب منك تعملى كدا
مها : كدا ازاى يعنى
مصطفى : يعنى تزعقى وتبعدى عنى
مها : عادى
وسابته ومشيت
مصطفى وشدها من ايدها : لما اكون بكلمك متسبينيش وتمشى
مها : انت بتكلمنى كدا ليه سيب ايدى
مصطفى : لما اكون بكلمك متسبنيش وتمشى يا مها تمام ؟
مصطفى : ردى عليا انتى بتعملى كدا ليه
مها بعصبيه : عشان مش عايزاك
مصطفى بصدمه : عشان مش عايزاك !
طب لو مش عايزانى وافقتى عليا ليه ؟
ليه فرحتينى وانتى مش عايزانى
مها وسكتت
مصطفى وبدأ يزعق : ردى عليا ليه بتعملى فيا كدا
كل دا عشان حبيتك طول عمرى
حرام عليكى بجد هو انا ضعيف اوى كدا فى نظرك تلعبى بيا ...
مها : ملعبتش بحد ومش ضعيف
مصطفى : اومال ايه ردى عليا وفهمينى
مها : بابا بس اللى كان موافق وانا موافقتش على حد
مصطفى انا اسفه غصب عنى بس انا مش قادره اتأقلم و ......
وقاطعها مصطفى : خلاص خلاص فهمت
عايزه تطلقى يعنى
بس انا لو طلقتك قبل شهر جواز الناس هتفهم غلط وهتبوظ سمعتك وانا ابوكى ربانى ومرضاش على بنت الراجل اللى ربانى كدا
مها وحاولت تتكلم : مصط
مصطفى : مش عايز اسمع منك كلام اللى انتى عايزاه هيتنفذ بس قدامنا شهرين او تلاته بالكتير ويتم الطلاق ونفكر فى حجه ساعتها
البيت مفتوح وهتفضلى موجوده لحد ماتروحى بيت اهلك معززه مكرمه وانا مش هتعرضلك تانى فى اى حاجه
وسابها وخرج من الاوضه .
------------------------------------------------------------
سالى بصدمه : انتى بتستهبلى ازاى تعملى كدا
مها : هعمله ايه يعنى انتى كمان
سلمى : والله ما شفت فى برودك ياشيخه ونازله الجامعه عادى
مها : ايه هو انا جايه هنا عشان كل واحده فيكوا تشتم فيا شويه
سالى : اصلنا شايفينك بتستهبلى
مها : لا بستهبل ولا حاجه انا حذرت بابا وهو اللى صمم خلاص اشربوا بقى
سلمى : محدش هيشرب غيرك انتى يا مها والله
سالى : ايوه بالظبط كدا وجوزك دا نعمه مش سهل تلاقى حد بيحبك كدا وانتى بترفضى النعمه بايديك
مها : خلاص بقى ياجماعه انا جايه افك مش تقفلونى اكتر
سلمى : دا على اساس انه فارق مع سيادتك يعنى بقى عندك دم فجأه
مها بضيق : سلمى اسكتى بقى والله همشى
سالى : خلاص ياجماعه اهدوا
الحق علينا خايفين عليكى انتى حره
مها : ماشى هى الساعه كام ؟
سالى : الساعه 1
مها : اوك لما تيجى الساعه 2 الا ربع كدا قولوا
سلمى : اشمعنى ؟
مها : مفيش ورايا مشوار
------------------------------------------------------------------------
وفـى مكتب مصطفى .......
الاء : يسرا بطلى هبل دكتور مصطفى دا محترم جدا ومالوش فى كدا
يسرا : مفيش راجل مالوش فى كدا ياهبله كلهم صنف واحد
الاء : هتعملي ايه يعنى
يسرا : انا ليا طرقى الخاصه
الاء : قصدك ايه ؟
يسرا : مش قصدى بس اتفرجى عليا وانتى تعرفى
الاء : ايه هتضحكى عليه وتتجوزيه وجو الافلام العربى دا ؟
يسرا : هههههههههه حبيبتى الافلام العربى دى من الواااقع وبعدين ملكيش دعوه خليكى ف حالك
الاء : تصدقى انا غلطانه انى جبتك هنا
يسرا وبنظره غريبه : احلى غلطه عملتيها فى حياتك
الاء ولسه هتتكلم
يسرا : هششش اهو جه قومى انتى بقى
ودخل مصطفى على مكتبه من غير حتى ما يقول سلام
يسرا : ودا ماله دا مش فى بنى ادمين قاعدين
الاء : ههههههههههههه قولتلك مش زيهم مفيش فايده انا هقوم اشوف شغلى
ورن التليفون
يسرا : ايوه يافندم
مصطفى : شوفى استاذ ياسر جه ولا لسه ولو كان موجود خليه ييجى
يسرا : اوك يا فندم
يسرا ( شكلك صعب فعلا بس على ميين مش هتاخد فى ايدي حاجه )
------------------------------------------------------------------------
وفـى كافيه عـلى النيل
راحت مها عشان تقابل محمد , وقفت تدور عالترابيزة و اخيرا لقيته ...
محمد : مش مصدق انك جيتى
مها : انت عايز ايه منى
محمد : اهدى بس واقعدى نتكلم
مها وقعدت : اتفضل ادينى قعدت ها
محمد : وحشتينى اوى والله
مها سكتت
محمد : انتى بقيتى بتسكتى ليه انا عارف انى كمان وحشك ولسه بتحبينى
مها : وجايب الثقه دى منين
محمد : مها حبيبتى بلاش نضيع وقت انا اكتر واحد فاهمك وعارفك
تعالى نشوف حل
مها بضيق : لا ياراجل بعد ما اتجوزت جاى تقولى نشوف حل
حل ايه اللى هنشوفه
محمد بزعل : هو انتى كل شويه هتفكرينى يا مها حرام عليكى بقى
مها وحنت : خلاص ياحــ اقصد يامحمد هسكت
محمد : قوليها يامها وحشتنى منك قولى ياحبيبى هو اانا مش حبيبك ؟
مها : ايوه يامحمد انت حبيبى وكل حاجه بس انا دلوقتى متجوزه واللى بعمله دا غلط
محمد : مش قدامنا غيره
مها : لا قدامنا
محمد : ايه اللى قدامنا
مها : انا قولت لمصطفى انى مش عايزاه وهيطلقنى قريب
محمد بخضه : ايه انتى اتجننتى
مها باستغراب : ومالك اتخضيت كدا هو انت اللى هتطلق
محمد بلخبطه : لا لا ابدا بس الموقف صعب
مينفعش تطلقى
مها : اومال هنرجع لبعض ازاى وانا متجوزه !
------------------------------------------------------------------------
و ف الشركة ....
ياسر بصدمه : ايه اللى بتقوله دا
مصطفى : وطى صوتك يا ياسر بقولك عايز الكلام بينى وبينك تزعق
ياسر : انا اسف معلش اتصدمت
مصطفى بحزن : اومال انا اعمل ايه بس
ياسر : معلش ياصاحبى اهو نصيب ولا يهمك بكره نشوفلك الاحسن
مصطفى : يعنى انا بحكليك عشان تقولى كدا ماانا كان قدامى الاحسن ياياسر بس انا عايز دى انا بحبها بجنون والله ماحبيت غيرها
ياسر : اهدى بس ليها حل
مصطفى : هو فين دا انا مش شايف اى حلول هى مش عايزانى اجبرها تعيش معايا يعنى
ياسر : لا ياصاحبى فى حاجات تانيه
مصطفى : زى ايه !
------------------------------------------------------------------------
وفــى الجامعه
محمود ( صاحب محمد ) : بس ياسيدى هى دى كل الحكايه
احمد (صاحب محمود) : طب وانت مالك يا اخى هى تفرق معاك فى ايه
محمود : ياابنى خلى عندك دم يعنى دى لو اختك كنت هترضى عليها كدا ؟
احمد : اكيد لاء بس هى متقربلكش بحاجه
محمود : على الاقل الزماله وبعدين دى مها انت مش فاكرها
البنت العسوله البيضه اللى عيونها عسلى دى وكانت دايما تقعد مع محمد وانت تتراخم عليها
احمد : ما محمد بيقعد مع بنات كتير هفتكر مين ولا مين
محمود : على رأيك بس دى تختلف
احمد : اشمعنى ياخويا
محمود : البنت دى محترمه طول عمرها حتى لما كانت بتكلم محمد كان كل الكلام باحترام وحدود وانا طول عمرى بقدرها وبحترمها
احمد : طب بدام انت عارف من الاول انه مش بيحبها مقولتش ليه
محمود : كنت فاكر انه هيتعدل بس مفيش فايده
احمد : امممم والمطلوب ؟
محمود : فكر معايا فى حل انا لازم افهمها الموقف
احمد : يا سيدى هى لو محترمه اصلا ماكانتش تكلمه تانى خصوصا بعد ما اتجوزت
محمود : انت عارف الحب ممكن يخليك تغلط غصب عنك وعشان كدا انا عايز اكلمها
احمد : بصراحه ماانصحكش ياصاحبى هتعمل مشاكل وهى مش هتصدقك انا من رأيى تبعد عنهم هما الاتنين ياما قولتلك محمد دا مش زينا ولا شكلنا بس انت مفيش فايده
محمود : اووف جبتك ياعبد المعين ماشى ياسيدى
------------------------------------------------------------------------
وفـى بيت مهـا
الام : انتوا ليه مجيتوش مع بعض
مصطفى : معلش بقى ياحماتى بنتك مجتهده ونزلت الجامعه ومعرفتش افوت عليها موبايلها كان مقفول قولت يبقى اكيد سبقتنى على هنا
الام : ههههههههههههههه وماله ياخويا بس بلاش حماتى دى انا ماما يا واد واللا نسيت
مصطفى : طبعا طبعا
الام : طيب انا هقوم احضر الغدا
وبعد ما مشت
مها بصدمه : انت عرفت منين اننا معزومين
مصطفى : عادى عمو اتصل بيا بالصدفه عشان يأكد عليا
مها : اه اه شكرا
مصطفى ببرود : شكرا ع ايه انا مش هكسف الناس اللى ربونى
وكمان مبحبش شكلى يبقى وحش
مها : اوك يا مصطفى
مصطفى : يلا بقى مثلى انى جوزك وانك فرحانه وكدا
مها بابتسامه : وماله من عنيا
ودخل عليهم ابو مها
الاب : اهلا اهلا بالعرسان منورين
مصطفى : دا نورك يا بابا
الاب : عاملين ايه ؟
مها : الحمد لله
انا هقوم اجهز الاكل مع ماما
مصطفى : ماشى ياحبيبتى
الاب : يلا يا مصطفى شد حيلك عايز بابا دى تبقى جدو
مصطفى بصعوبه : اه اه طبعا وهتبقى احلى جدو كمان
الاب : يا رب يابنى اشوفلكوا عيل قبل ما اموت
مصطفى : بعيد الشر ياحاج ان شاء الله هتعيش وتشوف
وحاول يتوه على الموضوع
مصطفى : ايه يا مهاااا فين الاكل انا عصافير بطنى بتصوصو
وفـى المطبخ
الام : ايه الاخبار يا مها
مها باستعباط : اخبار ايه
الام : اخبارك مع جوزك
مها : الحمد لله ماشى الحال
الام : يارب دايما يابنتى ربنا يهدى سركوا
مصطفى طيب وابن حلال وبيحبك
مها : يارب
يلا بينا مصطفى بينادى
------------------------------------------------------------------------
و
بعـد ما روحوا
مصطفى : على فكره من الاحترام انك لما تبقى نازله تقولى انا نازله انتى قاعده فى بيت راجل مش تكيه هى
مها واتصدمت من الكلام : اه اانا اسفه اصل...
مصطفى وقاطعها : لا اصل ولا فصل مش عايز اسمع اعذار اخر مره تتكرر وعندك رقم السواق اتصلى بيه يجيلك فى اى وقت
انا برده راجل ومحبش مراتى تتبهدل فى الموصلات حتى لو هطلقها
وسابها وخرج
مها ورنت كلمه طلاق فى ودنها ( يااااااااه مين كان يصدق انى اوصل للمرحله دى اتجوز واطلق كدا عادى
مش انتى اللى عايزه كدا اشربى
يعنى كنت هعمل ايه اعيش مع واحد مش طايقاه
وهو اى واحد دا جوزك وكمان بيحبك
يووووه يادى الكلمه اللى عماله تتكرر كتير
خلاص خليكى مع اللى بتحبيه لحد ما يوديكى فى داهيه بس مترجعيش تعيطى )
ورن الموبايل
مها : الو
محمد : ايوه ياروحى
مها : انا لسه مفكرتش يامحمد
محمد : ومين قالك انى متصل عشان اعرف رأيك انا مش هسيبك تنامى لوحدك
مها : بجد
محمد : طبعا ياحبيبتى مش احنا زمان كنا بنام كدا
بحبك اوى ياميهو
مها وضعفت : وانا كمان بحبك اوى
-----------------------------------
ابو ام الحب الي يعمل ف صاحبه كدا اجدعان :\

بكره نشوف ايه الي هيحصل ;)
،،،،،،،،،،،،،،،،،،،،،،،،،،،،،،،،،،،،،،،،،،،،،،،،

معلش امبارح حصلت ظروف ومقدرتش انزل القصه اسفه :(