ظلم مستباح 🌿
بقلمي :: غصون
عليچ الروح راحت من يردها
وگيحة وهمومي صارت من يردها
خطيه الروح ملت من يردها
لان بس الصبر يرد عليها💔
⊱━━━━⊰✾⊱━━━━⊰
تفاچأت امي من طلبهن وابتسمت بفرح توترت
حيل خفت امي توافق عليهم ما اريد اتزوج
خاف يطلع مثل صاحب يضربني ويعذبني
نفضت افكاري اسمع كلام امي
بهيه :: نتشرف بيكم ام سعد بس احنه ما نعرف
عنكم اي شي ولا نعرف عن ابنكم
ام سعد :: من حقج حبييبه
ضلت تسولف عنهم وعن ابنها هو نفسه الولد
الالتقيت بي امس عرفت هو يشتغل بمحل أبو
يصيغ ذهب عمره سبعة و عشرين سنه وعنده
اخو واحد أكبر منه اسمه سعد متزوج وطالع
بعيد عنهم واربع اخوات ثلاثة مزوجات ووحده بعدها ما مزوجه نفسها الجايه وياها
عاينت الامي فرحانه ومبين من عيونها موافقه
گملت المره كلامها وصدمتني من گالت
ام سعد :: ترا ابني حاتم هم متزوج وعنده خمس
بنات وعجبته بنيتج ورايدها مره ثانيه الي شنو
رأيج ام حمده
عاينت الامي بنظره اريدها ترفض وهي عاينتلي
وگملت گلامها
بهيه :: الزواج الثاني لاعيب ولا حرام وانه موافقه
انقهرت من امي وگمت من يمهم رحت الغرفتي
گعدت على فراشي دموعي يجرن على خدي واحجي ويه نفسي البارحة شافني ويريد يتزوجني وفوگ هذه گله متزوج وعنده خمس بنات زين ليش يگسر خاطر مرته الأولى ويتزوج عليها
بقيت بغرفتي ما طلعت لحد ما دخلت امي تعاينلي
ببتسامه وحيل فرحانه
بهيه :: الحمدلله ربي فتح قسمتج مره ثانية شلون
قسمه زينة
نزلن دموعي ورديت عليها
حمده :: يمه انه مااريده
نترت بيه بغضب
بهيه :: بگيفج انتي غصبا عليچ تأخذينه هم زين
من گلبج وباوع الوجهج وانتي مطلگه
- يمه أبوس ايديج مااريد اتزوج أضل خدامة يمج
بس مااريد اتزوج گرهت كل الزلم من بعد صاحب
خزرتني تصيح
بهيه :: رضيتي أو ما رضيتي تزوجي غصب عنج
ورديت الهم الموافقة وحددنه الخميس الچاي
عقدج
گالت آخر كلامها وطلعت من الغرفة ضليت ابجي
على حظي وعلى اسلوب امي القاسي ولا يوم
أخذت رأيي بشي يخصني
سمعت صوت الأذان رحت توضيت وفرشت سجادتي
أصلي خلصت صلاة اخذت القرآن اقرا بقيت مده
طويله اقرا قرآن
شفت الباب انفتح دخلت بگل جبروت وهي تكول
- بعد يومين العقد مالج حضري روحج وهاا عرس
ما راح يسوي وإشترى بيت بديرتنه علمود تكعدين
بي انتي ويا وين لاگيه هيج دلال
