وصفة الحب

XXXXXI

             
           _الجو توتر بوجودو هو اللي مني دخل هو وخوه  بانت ليه مريم كتسلم على راضية وكتضحك...تصدم؟!لا كان متأكد غادي تكون وداير بحساب هادشي...واش حس بشي حاجة؟!أه شحال ماشافها كيحس بالرعدة فذاتو قلبو كيقول ليه سير مي عقلو كيحبسو خصوصا فاش شافها تحركات من قدامو... تبعها حتى گلسات حدا مروان وشدات ليه فيدو...مروان اللي كانت عينو غير على فاروق حتى حس بيد مريم...دار عندها وكانت كتشوف فيه مبتاسمة بمعنى{تهدن}...حس بالراحة والبرودة سرات فلحمو فحالا ماشي غير دابا كان غادي يتفرگع بالعصاب....هاد المرة داك الإحساس حس بيه فاروق اللي جمع  يدو وعض على سنانو....هادشي لاحظو قصي اللي كان حداه مشا لجنبو باش مايدير حتى شي ردة فعل ودخلوا متاجهين لحدا أوس ...الناس اللي معارفينش ماحسوا بوالو ولكن اللي عارفين القصة حسوا بالتيار اللي كيدور وسطهم بلا صوت غير بالنظرات القاتلة بين فاروق ومروان.....

مريم(بهمس):صافي ماتبقاش تشوف فيه

مروان(حول أنظارو ليها):راه هو كيشوف فيك

مريم(بنظرات حب):مدام عيني فيك ماتديهاش فالعينين اللي عليا حيت مغاديش نتسوق ليهم

-مروان فلتات ابتسامة من فمو وحتى هي كذلك وفنفس اللحظة كان دخل ياسين ومعاه عائلتو اللي فاش خبرهم باللي وصل خرجوا باش يدخلوا الدفوع مجموعين مع الدقة المراكشية... كلشي ناض يشطح ويصفق بفرحة....سلمى وأوس كيشطحوا بجوج وحتى ليلى وقصي...العائلة كاملة باينة عليها الفرحة

راضية(كتجر مريم):نوضي تگعدي شطحي شفتك گالسة

مريم(شافت فمروان اللي عطاها الموافقة):هاني جااية

-ناضت مريم وبدات كتسخن الطرح من مور ماسلمات على ياسين وباركات ليه عاد مشات لجيهة راضية والبنات...كانت كتتحرك بكل نعومة وأنوثة لكن بجرأتها خصوصا فالشطيح اللي بالنسبة ليها المكان فين كتحس براسها حرة...هي الوسط ودايرين بيها العيالات كيصفقوا...گاع العينين عليها وأولهم فاروق اللي واقف بعيد مربع يديه وكيشوف فيها بغصة عكس مروان اللي كان متكي شويا على الكرسي وابتسامة شاقة جنب فمو وفخاطرو كيقول غير{الله يخليها ليا}...باقي على داك الحال حتى حس بمُّو جراتو من دراعو وهمسات فودنيه:

فاطنة(ضاحكة):ههه شفتيها الحبيبة ديالي تقول معاشت والو هاد البنت عندها واحد الصبر سبحان الله عليه

مروان(عينيه على مريم وهو مبتاسم):هي من هاد النوع كتضحك ديما تكون خايبة ولا زوينة الضحكة مرسومة على وجهها... اللي فالداخل ديالها كتخليه تما وتخرج للناس فرحانة وهادشي مخليني هايْم فيها بدلاتني بلا مانحس وليت مروان فبلاصة رويحة بلا ماتدير حتى شي مجهود....

فاطنة(ساهية فولدها وفرحانة):بصح ولاهيلا بصح تبدلتي غير مني وليتي تدوي هاكا وتصارحني راك تبدلتي