وصفة الحب

XXXXIX

           -دازت جوج سيمانات على حياة أبطالنا اللي كانت مليئة بالحركة.....سلمى اللي كانت كتخرج مع مها وختها ياله يوجدوا للخطبة....ياسين حتى هو كذلك مع راضية وليلى اللي فارعين ليه راسو كل مرة فين يديهم بحكم جات العطلة وهو اللي مسالي.....أوس وقصي مقابلين خدمتهم ودايرين فوق جهدهم مع عيالاتهم اللي هرموناتهم مخربقين....فاروق بدا كيتخطى وبدا يعيش حياتو ورجع يتجمع مع العائلة من مور مافهم بلي مريم مابقاتش ديالو وقرر يخليها تعيش مرتاحة....مروان اللي كيجري على لاصال والفراش ديال الدار بطبيعة الحال حتى كياخد الرأي ديال مريم وفاطنة.....أما هاد الجوجات يمكن فهاد جوج سيمانات خيطوا كازا كاملة بالدوران هاهوما عند الدهايبي هاهوما عند الخياطة والنگافة والتريتور وهاكا غادا.... أما دابا راهوم فالدار كيوجدوا راسهم

فاطنة(مدات الشال لمريم):هاكي قادي ليا الله يرضي عليك

مريم(كتصايبو ليها):همممم هانا عليك أفيطينة جيتي كتحمقي

فاطنة(بابتسامة):كون تشوفي نتي يابنتي ماتخرجي حتى نرقيك نخاف عليك من العين

مريم(كتقاد ليها الشال من الجناب):وايلي حتى نتي أنا گاعما كنآمن بداكشي

فاطنة:ماتگوليش هاكا العين علينا حق ونتي راك جيتي كتحمقي أبنتي

مريم(باست ليها راسها):عوينااتك الزين عويناتك....قادي ليا المضمة

فاطنة(كتزيرها ليها):قولي ليا غادي يكون داك كحل العفطة؟؟

مريم(كتضحك):ههه إيوا راه ولد خالتو غادي يكون وسمعيني أخالتي أنا دابا فعيني غير مروان مانشوفش هداك واخا يكون گالس فوق رموش عيني

فاطنة(بخوف):نخاف لامروان يدير شي حاجة

مريم(ضارت عندها):ماتخافيش أنا مغادي نخليه حتى دقيقة

فاطنة(جمعات ليها وجهها بين يديها):الله يرضي عليك الگميلة

مريم(بطنز):واهانا على الگميلة تاني عرفتي شحال ماسمعتها

فاطنة(سمعات الدقان):هاهو جااا حلي حلي نمشي نجيب صباطي ونسد البوطة....لاهيه لايبدا يغوت راه تعطلنا عليه

-مشات فاطنة كتجري وخلات مريم اللي تاجهات للباب تحل ليه ..أما عندو هو اللي ياله دور وجهو باش يبدا حتى ضرباتو الساكتة...لا لا ماشي الساكتة هادي ضربة الطيحة اللي ماعقلش شحال من مرة ولكن فكل مرة كيشوف وجهها كيزيد يطيح على زنافرو....خصوصا هاد مريم اللي عمرو كتاب ليه يشوفها بالبلدي حتى لليوما.....كانت فحال شي لوحة مرسومة بإتقان لابسة قفيطين فاخر بالغوز فاتح مزين بتطيرزات كثيفة بالذهبي على الصدر والكمام...إضافة إلى اللمعة اللي جاية من الأحجار الملونة اللي مرصعين فالقفطان....ماكياجها كان جد متقون وبلمسة ناعمة...برزات فيه عينيها أكثر بالكحل والشفار اللي طلعاتهم مزياان وبذلك دارت گلوس خفيف بالنيود على شفايفها اللي غير تزادوا جاذبية أكثر....من اللخر كانت جامعة بين الأصالة والأنوثة الطاغية....باقة مبتاسمة ليه شحال جوج ولا خمسة الدقايق وهو مفيكسي تما وهي كتشير ليه حتى حركاتو وأخيرا فاق من سهوتو حال فمو نسا ماسدهم