وصفة الحب

XXXXVI

-مروان(حل ليها الباب):مريم دخلي للدار

مريم(شدات ليه يديه):مروان بلا صداع دخل فحالك خليه تما

فاروق(قرب ليهم):صافي لقيتي فين تشدي تاني؟؟لاعبة ماتش تخرجي واحد تدخلي رومپلاسمون!!!

مروان(جمع يديه على شكل كروشية):غادي تجمع فمك ولا غادي نخليك تحسب سنانك هنا

فاروق(عينيه على مريم):شنو غادي يعطيك هادا،هاه؟؟ باينة عزيزة عليه السلعة الرخيصة اللي كتتفرق بالزربة

مروان(دفعو حتى جا على الحيط):تفرق عليها حسن ليك وعرف شنو كتخرج من فمك بزااف عليك هادي اللي كتحل عليها فمك الشماتة

مريم(جرات مروان عندها):أجي دخل ماتوسخش فيه يديك صافي خليه

فاروق(بابتسامة جانبية):راه ديجا موسخها بيك....صافي وليتي داخلة معاه لدار وحدة...كنتي دايرة فيها شريفة عفيفة معايا ونتي مخبية العجب شكون گال بلي حتى نتي كنتي كتغدريني معاه

مروان(تلاح عليه قاجو للأرض):مريم شرَفْ من الشرف الكلب وتجي نتا تقول عليها فحال هاكا....الدرب كاامل مكيقدر يقول عليها حتى كلمة ناقصة ولا غير شوفة ونتا الشماتة تخرج هاد الهضرة....مريم باغي غير نعاونها الحيوان هادشي ماتعرفش ليه نتا

فاروق(كيكحب ومبتاسم):باغي تعاونها ومدخلها للدار واش كتحماق عليا ولا شنو؟؟

مروان(ضربو لوجهو حتى دورو للحيهة لاخرا):شوف كيف كتدوي عليها واش باغي تمشي فمك مرَيَّبْ ولا شنو...مريم مگالساش معايا گالسة مع مِّي...نبات فالزنقة ومانقربش ليها فهمتي دابا

مريم(كتجر مروان عليه):نوض علاش كتشرح ليه خليه يفهم كيف بغا ويقول اللي بغا...القرد فاش مكيوصلش للحاجة كيقول عليها خايبة

مروان(ناض وضار عندها):ماطرا لك والو نتي بيخير؟؟

مريم(بابتسامة):بيخير بيخير ياله دخل ماتديهاش فيه

مروان(دار عندو كيتحلف عليه):اللي كيلعب بالنعمة كيتحرم منها....ماتستاهلهاش الشماتة ودابا والله وباقي نشوفك كتدور بمريم حتى نش/قك ياله حيد من هنا

-دخلوا للدار مخليين فاروق گالس فوق التروتوار وجامع رجليه عندو....دقائق وجمع شويا دالكرامة اللي بقات عندو ومشا لطوموبيلتو....ماديماراش بدا كيرجع السينتة لأي كلمة قالها مروان ودافع بيها على مريم قدامو....هو عارفها كيف دايرة وأصلا كان كيسمع عليها من الدراري قبل ولكن الغيرة اللي خلاتو يقول ديك الهضرة....واش نادم؟؟ااه حتى النخاع كيحس بيه كيفتت أطرافو....شاف بلي ولا ليها سند وراجل محتارمها.... كان بإمكانو يكون هو فبلاصة مروان ولكن هو اللي ختار هادشي الأنانية ديالو خلاتو يندم ندم حياتو.... مجاتوش ساهلة يشوفها نساتو بسرعة واخا دار فيها العجب ولكن مجاهش سبب كافي علاش لا وهو ديجا موالف يخون والبنات يبقاو معاه إلا مريم اللي ختارت كرامتها وخلاتو.... مابغاهاش تكون فرحانة مع غيرو ولا تكون قريبة ليه وهاد القرب اللي شافوا اليوما موحالش واش يدوز عادي ليه....بعد تفكير طوييل ديمارا وتحرك من تما طااير