وصفة الحب

XXXXV

                    -نهار جديد وهاد النهار كيفما كان زوين عند شي ناس كيفما كان خاايب ومضلم على ناس آخرين....كانت مريم كتتقلب فبلاصتها الليل كامل مانعساتش ولا شافتو.... راسها كيضرها وقلبها مزموط عليها....استغفرات الله وناضت دخلات للدوش شعلاش الشوفاج ومشات تطلق الما فالسطل.... عمر كولو وياله حيدات حوايجها ومدات يديها تتحسس الما حتى لقاتو بااارد....قررات تهبط تجيب البوطة....لبسات جلابة خفيفة وجمعات شعرها بمقبط مخلية شي زغيبات هابطين بإهمال.... الجو سخون مي هي كتحس بالبرد بزااف....كتحس بگاع عضامها تقال عليها وهي هابطة من الدروج...وصلت للحانوت ولكن قبل ماتوقف عندو بدات كتحس بالدوخة والدنيا كتدور بيها.... الصوت بدا كيبعد وضو عينيها بدا كيضلام....بغات تسند بالحيط ولكن خواو بيها رجليها الشيء اللي خلاها تطيح على وقفتها....مول الحانوت والعيالات اللي كانت منهم فاطنة كلهم جرَّاو عندها مخلوعين عليها

فاطنة(كتعيط لواحد الولد صغير):عيط..عيط على مروان يجي دغيا

الولد(غادي كيجري):واخا أخالتي

-عند مروان اللي كان گالس فالبيرو فلاصال طالق موسيقى وحاضي مع الدراري اللي كيترينيو....اللي محتاج شي مساعدة ولا اللي باقي جديد كيعاونوا حتى شاف البرهوش داخل كيجري وينهج

الولد(بصوت متقطع):ر..رويحة عتق....مريم سخفات وخالتي فاطنة.......

-بلا ماتسناه يكمل هضرتو كان طار لجيهة دار مريم حتى كتبان ليه الجوقة حدا الحانوت والناس على فمهم غير {لاحول ولاقوة إلا بالله....هاد البنت مسيكينة من النهار بقات غير بوحدها وهي تتبدل}دفعهم كااملين من عليها...ووأخيرا بانت ليه...شاف وجهها صفر والجلابة بدات كتطلع ليها...هبط لعندها ساترها وهزها بين يديه

فاطنة(مخلوعة):ديها....ديها أوليدي للدار عندنا حتى نشوفوا مالها

-امتاتل لهضرة مو وداها نيشان لدارهم....دخلها للصالة وحطها فوق السداري وخرَّج أي وحدة ولا واحد زايد عليه هو ومُّو

رويحة(بخوف وكيترعد):مالها؟؟شنو عندها؟

فاطنة(كتحيد زيفها):جيب جيب ليا بطلة وموس سربي

-طار رويحة للكوزينة جاب داكشي علاش وصاتو مُّو ووقف كيشوف ردة الفعل ديالها....بانت ليه بدات كتتحرك وتنفس براحة كتر مني شافها بدات كتحل عينيها وتكحب من ريحة البصلة اللي مجهدة

فاطنة(كتبعد خصلات شعرها من وجهها):بسم الله عليك أبنيتي مالكي ياك لباس؟؟

مريم(ناضت دايخة):ش...شنو وقع ليا؟؟

فاطنة(كتمسح يديها):يابنيتي كنت كنشوف فيك فالحانوت جاية دايخة حتى طحتي على وقفتك وجبتك لهنا نشوف مالك

مريم(بابتسامة جانبية):ربي يخليك أفيطينة ماعليكش ههه

رويحة(بتساؤل):مالكي شنو عندك؟؟مريضة كتضرك شي حاجة؟؟