وصفة الحب

XXXXI

              -أصبحنا وأصبح الملك لله.....نهار جديد وشوهة جديدة....سلمى خلات أوس حتى خرج للخدمة وهي تنوض تلبس حوايجها....لبسات كسيوة طويلة مع شالها...ولبسات سبرديلة ناوية تعلق هاد النهار....وهي كتصايب فزيفها صونا ليها التيليفون جاوبات وهبطات من مور ماخلات مها نااعسة ماهياش فهاد العالم....هبطات ولقات ليلى كتتسناها طلعات معاها ومشاو نيشان لعند مريم....لقاوها ياله فاقت وكتتفرج بلا صوت التلفازة خدامة صورة مي الصوت راه كيدور ليها فراسها بلا ماتخدم صوت التلفازة...غير سمعات الصونيت وهي تنوض حلات الباب وبانوا ليها البنات....فرحاات واستقبلاتهم مي قلبها مامريحهاش

سلمى(كتنش بشالها):فيك ماتتضاربي؟؟

مريم(كتضحك ومفاهماش):هههه كيفاش؟؟

ليلى(كتشرب الما):تعقلي على داك خينا اللي عاودات لينا عليه ياسمين صورهم وشوههم فلافاك؟؟سلمى ياله تفكرات وگالت نمشيو ليه

سلمى(كتغوت):ومالي غادي ندوزها ليه؟؟ودابا مشهية نضارب أختي وبانت ليا فيه غير هو

مريم(مربعة يديها وهي كتضحك):عرفتي إيلا ساقوا ليكم أوس وقصي الخبار شنو يديروا ليكم ولا لا؟؟راكم حاملات الدريات مابقيتوش مسؤولين غير على ريوسكم باش تديرو كيف بغيتو...راكم هازين روح فكرشكم خاصكم تفكروا قبل أي حركة غادي تديروا

سلمى(وهي مخنزرة):هاد الهضرة ديريها فخبيز وكوليها الزين دابا واش غادا ولا لا

مريم(مشات للبيت وهي معاجبها حال):تسناو تسناو تمشي توقع ليكم شي حاجة نصدق رادا لراسي اللومة نتوما راه حمقات وغادي تحمقوني معاكم

ليلى(كتغوت باش تسمع):نسييتي ياماتك العفريتة غير بلاتي

-دازت 15دقيقة بالحساب وكانت عندهم لابسة كسوة مع سبرديلة،شعرها جمعاتو ضفيرة من الفوق...رشات پاغفان وهزات صاكها وخرجوا مجموعين....مسافة طريق وكانوا قدام الباب ديال لافاك

مريم(ضربات كتف سلمى):إيوا الشريفة عارفة هاد الدري كيف داير؟فين غنلقاوه ولا غير جاية؟؟؟

سلمى(دارت عندها وهي حالة الباب):عاارفة غير ياله

ليلى(سدات الطوموبيل مور ماهبطوا كاملين):فين غادي نمشيو دابا؟؟

سلمى(متقدماهم):غادي نلقاوه ف buvette

مريم(حطات يديها على قلبها):أويلي واش عارفة شحال كتكون عامرة ولا لا؟؟وشكون كيكون تما راه غير الشماكرية

ليلى(ضارت عندها تسكتها):صافي سكتي أمريم الله يخرج هاد النهار على خير وصافي

مريم(كتدور راسها):اه اه غاادي يخرج شوفي كيفاش غادا نيشان كيف شي تران هادشي غير حاملة وبالتوام من الفوق

سلمى(دارت عندها): بغيتي نبدا بيك لا؟! وا زيدي گدامي وسكتي ونتي كتر فيك النگيير ياربي السلامة