وصفة الحب

XXXX

-فنفس النهار كانت مريم ناعسة بحكم خدات كونجي ديالها دابا واخا ماشي وقيتو ولكن مستنزفة داخليا وخارجيا مافيها اللي يتلاقا بالناس وباغا غير تبقى بوحدها... مضلمة البيت عليها...متكية على كرشها ومسرحة فالسرير غير كتدور على جنبها مرة ليمن مرة ليسر فحالا مامرتاحاش وكيفاش غادي تكون العكس؟؟؟التيليفون كيصوني وهي كتحس بعضامها تقال عليها باش تجبد يديها للطابل دونوي اللي حداها مي فاللخر هزاتو وجاوبات

مريم(بصوت تقيل وناعس):آاالو سلمى لباس عليك؟؟

سلمى(كتحرك فالمقلة وتهضر):لباس نتي اللي واش لباس...الصباح خرجنا خليناك ناعسة مابغيناش نفيقوك

مريم(ناضت گلسات وهي كتهبط شعرها اللي واقف):لا راه فقت بالحس ديالكم جيت نيت لبيتي راني باقا فيه

سلمى:صافي راه ياسمين عندي حيت ماما جات تبقى معايا شويا وياسمين حتى هي....جي عندنا ماتبقايش بوحدك

مريم(ناضت للكوزينة دارت الما يطيب):لا لا بغيت نبقا غير راسي ولكن غادي ندوز نشوف خالتي سميرة

سلمى(مقلقة):ماتبقايش هاكدا أصحيبتي عفااك غادي نبقا مشطونة عليك

مريم(كتضحك باش تهدنها):لا لا ماعندك علاش تشطني راك عارفاني وقيتة ودايزة....حگا خديت كونجي وغالبا غادي ننزل لأزمور السيمانة الجاية

سلمى(قطبات حجبانها):وعلاشش؟؟

مريم:إيوا راك عارفة ماما حاملة وقريبة تولد ياله نمشي نصايب ليها سلُّو والحلوى للناس باش حتى إيلا بديت الخدمة ماتهزش الهم

سلمى(بقات فيها صاحبتها):ولكن عنداك تقول ليك شي حاجة فاش تسولك على داك الشماتة وتعاودي ليها

مريم(كتضحك):لا أويلي راها ماما أصاحبتي ماعندها ماتقول ليا غير مني عرفتو قبل مانتزرف راه لباس

سلمى(مبتاسمة):إيوا نتي تعرفي إيلا بغيتي شي حاجة قوليها ليا فأي وقيتة

مريم:صاافي الزين ديالي أنا غادي ندوز عندكم قبل مانمشي لأزمور

سلمى:صافي الدار دارك ياله تهلاي فراسك

مريم(كتضحك):حتى نتي تهلاي فراسك وفالتوام ههههه

سلمى:واخا واخا هههه

-قطعوا مع بعضياتهم....دخلات للدوش غسلات وجهها وخرجات عمرات ليها أتاي وگلسات تفطر.....جمعات الدار ودخلات لبيتها تلبس....لبسات جوگينگ فالكحل وتيشورت فالگري مع سبرديلة بيضة وخلات شعرها مطلوق....هزات تيليفونها والسوارت وخرجات مرفوعة.....

___________________

-عند مروان اللي كان ياله دوز واحد السيونس ديال الضهر ياسلام....خدا ليه دوش وبدا تياكل الروپا ديالو....حتى كتبان ليه من الزاج.....غادا ساهية وباينة فيها دايخة غير من مشيتها اللي كتتمايل بيها....شافها غادا جيهة الطوبيس اللي كيدي للبحر وهو عارفها كتر من راسها....دونك قشرها بلي غادا للبحر....لاح عليه قبية وتحرك من تما مخلي الدري صاحبو يحضي ليه لاصال...هز الموطور وتبع الطوبيس حتى بانت ليه نزلات فالمحطة اللي مقابلة مع البحر....خلا الموطور فالپاركينغ وتبعها من اللور حتى شافها مشات گلسات فالصخر.... الشمس عليها وكتحرق خصوصا شهر 8 هادا مي هي كتحس بسخونية قلبها كتر جاتها ديال الشمس عادية.... بوحدها تما وهو كيشوف فيها من بعيد حتى بداو الدموع كينزلوا وهي كتشهق الشهقة اللي كانت باينة ليه ولكن مكيسمعهاش بحكم بعيد شويا....غير شافها هكاك هبط للرملة مشا خدا پاراصول من عند الدراري مور ماخلصهم ومشا جيهتها....أه كان قال بلي مابقاش غادي يدور بيها...مغاديش يتطفل عليها.... مغاديش يبزز راسو عليها ولكن هادشي حاجة ودموعها حاجة خرا....مافكر فحتى حاجة مني شافهم حتى وصل عندها وقاد الپاراصول فوق راسها....جمعات بكيتها وطلعات راسها غير شافتو تصدمات أما هو ماهضر ماتكلم حدُّو گلس حداها جامع رجليه وحاط يديه فوق منهم وعينيه على المواج اللي كيتحركوا.....

مريم(كتمسح دموعها):مروان؟؟شنو كتدير هنا؟

مروان(بلا مايشوف فيها):شفتك ماشي هي هاديك فالدرب وگلت نتبعك لاتوقع شي حاجة

مريم(مصغرة فيه عينيها):كيفاش؟؟كيفاش تقدر تبغي شي واحد آداك فحياتك؟؟

مروان(رما ليها نظرة ورجع عينيه للبحر):ماشي ساهلة... القلب ماشي هو العقل....القلب ماشي دفتر وماشي محكمة...القلب كيتعلق وفاش كيتعلق واخا يتآذى كيبقا يدق لنفس الشخص... وهادشي كيوقع للناس اللي كيبغيو من نيتهم...للناس اللي كيهبطوا السلاح قدام شخص حسو معاه بالأمان أو كان باغي يلقا عندو شي حنان خاص

مريم(الدمعة على خدها):وإيلا خلا فيك شي أثر عمرو مايحيد...راه ماشي تقول واخا هكاك "أنا باغي نبقا مع داك الشخص"

مروان(شاد الحجر كيلعب بيه بين يديه وعينيه على البحر): يمكن تبقاي تبغي واخا نتي ماشي مع داك الإنسان..خاص غير مانرخصوش ريوسنا باش نرضيو قلبنا...اللي كيبغيك بصح غادي يحتارمك،غادي يكون ليك أمان...اختيار ديال كل نهار ماشي غير شعور كيشدك وكيخليك تبكي

مريم(كتمسح دموعها):ونتا؟؟

مروان(مد ليها كلينيكس وبقا كيشوف فيها):أنا واخا معرت شنو تديري ليا ماعنديش كيفاش نحيدك من بالي...أنا ماشي غير نواسيك فالحاجة الخايبة اللي تطرا ليك أنا نعيشها معاك وماعنديش مشكيل...ندفع عمري كلو باش مانشوفش دمعة من عينيك...ولكن ماتفهميش غلط مكنگولش ليك هاد الهضرة باش نبقا فيك حاشا واش نرضاها لراسي ولكن هادي حقيقة واللي كاين كنگولو مكنخافش من باش كنحس

مريم(كتلعب بكلينيكس فيديها):مابقيتش نقدر نتيق...مروان كنحس بواحد التقل فقلبي عالم بيه غير الله ماكرهتش كون تلاحيت فهاد البحر وغير نعوم فينما داني نمشي على الله يخوي اللي لداخل ديالي

مروان(وهو ساهي فيها):واخا معرت شنو تديري ايلا مداويتيش راسك براسك عمرك مغادي تقدري تعيشي مرتاحة غادي تبقاي ديما خايفة ومخلوعة...بغي راسك وقدريه عرفي قيمتك وبلي راه قلال البنات فحالك

مريم(كتبتاسم):معرفتش شنو درت فحياتي زوين اللي فينما كنطيح فشي حاجة خايبة كنلقاك نتا واش أنا اللي مزهارة ولا نتا اللي ماعندك زهر

مروان(كيضحك):الله أودي حنا هنا فأي وقيتة...شويا دابا؟؟

مريم(كتحرك ليه راسها):أه الحمد لله شكرا بزااف..غير سير لخدمتك غادي تكون خليتي لاصال بوحدو أنا شويا ونمشي

مروان(وقف من بلاصتو):صافي واخا ردي البال لراسك

مريم:صافي واخا

-بقات مريم بلا ماتتحرك...كتسمع خطواتو كيمشي ويبعد... شدات راسها بيديها دازت جوج سوايع وهي على هاد الحال....مابقاتش قادرة تبكي ولا تهضر...طاقتها استنزفات فالبكا بلا قياس...وقفت بشويا شيرات للدري باش يجي يحيد الپاراصول من تما...تمشات وهي كتمسح وجهها فحالا باغا تحيدو من بلاصتو...تمشات حتى وصلات للطوبيس وقفات كتشوف فيه جاي من بعيد...غير وقف وهي تطلع خلصاتو ومشات وهي حادرة راسها مابغاتش تشوف بنادم...وصلات للدرب ونزلات كتجر فرجليها ...الشمس بدات كتغرب دخلات للدار ومشات نيشان لبيتها تكات فالضلام...ماباغا تاكل ماباغا تهضر....بغات غير تنعس...حطات يديها على قلبها وخرجات تنهيدة حارة وصلات عمق الجرح ديالها...هزات راسها للسقف وقالت{ياربي راني كنحس بالعافية هنا بردها وستر ضرِّي راه عينيها كيبوحوا وأنا كنكره هادشي}

الحبيييبة دقلبي واش دار فيها داك الزهواني🥹🥹فنضركم غادي تبقا هاكدا ولا غادي توگض؟؟