وصفة الحب

XXXV

               -أصبحنا وأصبح الملك لله...فاقت مريم بكري دوشات وبدات كتوجد فالفطور...غير سالات فيقات ياسمين وفطروا بجوجهم...ناضوا جمعوا الدار وخرجوا الصيكان اللي كانوا جمعوا فيهم الحوايج البارح للصالة...حتى صونا ليها التيليفون

فاروق(كيضحك):صباح النور العودة ديالي

مريم:صباح الخير الپيلوط...كيف صبحتي

فاروق:سمعت صوتك ووليت بيخير...وجدوا راسكم غادي ندوز عليكم أنا وياسين نمشيو مجموعين حيت طوموبيلتو خاسرة

مريم:همم صاافي واخا دويتي مع أوس وقصي

فاروق:دوييت معاهم كل واحد غادي مع مرتو العقبة لينا أمو عيون

مريم:همم وااخا ياله خليني نمشي نلبس حوايجي

-دخلوا للبيت لبسوا حوايجهم...مريم لبسات كسيوة ديال le lin فالبيج كتجي نص كم ومجموعة من الخصر...دارت معاها صندالة فالقهوي وجمعات شعرها سفنجة حيت باقي فازگ... أما ياسمين لبسات أونسومبل فالليموني ومن التحت كخوب طوپ فالبلون كاسي مع صندالة فالبيج وطلقات شعرها... صوناو ليهم الدراري من مور ماوصلوا وطلع ياسين يهز ليهم الصيكان وهبطوا

                  ___________________

-عند أوس اللي كان كيقاد فالباليزات فالكوفر وسلمى طالعة القدام ديال الطوموبيل حتى كتشوف تيليفونو كيصوني.... هبطاتو ليه وجاوب

أوس:وافين العاود؟!

قصي:وافين نتا؟!هاحنا جايين عندكم باش نمشيو موانسين فالطريق ورا بعضياتنا هههه

أوس:ومالي أخويا شكيت عليك؟!ولا گالوا ليك ناسي دار بَّا هههههه

قصي(كيضحك):لا غير حسيت بييك

-ياله غادي يهضر حتى بان ليه جاي تسالموا ومشاو نيشان لصطاسيون جا فالخرجة ديال كازا لقاو فاروق وياسين والبنات كيتسناوهم...تحركوا الطوموبيلات بتلاتة تابعين بعضياتهم...ومن مور ساعة ديال الطريق بان ليهم پانو ديال "الجديدة" دخلوا وصطاسيوناو فواحد القهوة...خداو ليهم الشوا وتغداو ناضوا الدراري كل واحد شنو خلص حتى سلمى جاتها الرضَّة وناضت كتجري تبعتها مريم وياسمين وأوس اللي كان جاي وشافها هكاك....مشا تابعها مخلوع وغير وصل لقاها كترض بعد البنات عليها وبدا كيمسد ليها ضهرها

سلمى(من مور ماغسلات وجهها):مالك جاهل...صايگ طوموبيل فحالا صايگ كرويلة هانتا گلبتي لينا المصارن

أوس(خنزر فيها):جهلتي ولا مالك تاني؟؟راه گبيلا هبطتي من الطوموبيل هاد الحالة غير من داك السريط اللي درتي

سلمى:ياااك إيوا بعد مني سير فحالك ياله

أوس:يااك أبنتي؟؟

سلمى:وا مابنتكش الشريف غير سير فحالك