غرباء في بيت العمده(مكتمله)

الفصل السادس

الفجر نادر يصحي يخش الحمام الي في اوضته يتوضي و يخرج يخبط علي اوض اخواته واحد واحد و يقولهم انهم هيصلوا في اوضته
يرجع اوضته و يستني اخواته
الباب يخبط و يقوم يفتح يلاقي ابوه

نوح يبتسم بتوتر: صباح الخير

نادر: صباح النور...في حاجه

نوح: لا بس كنت عايز اعرف هتصلوا العيد ولا لا...قولت أسألك شكلك انت بتسيطر عليهم

نادر يبتسم و يدخل يقعد: ولا سيطره ولا حاجه هما الي بيسمعوا كلامي

نوح: يعني هتصلوا ولا لا

نادر: هشوفهم و اقولك....ممكن أسألك سؤال

نوح يدخل يقعد جمبه: أسأل

نادر: ليه سبتنا

نوح يتنهد: لإني لو كنت فضلت وقتها كنتوا هتكبروا و تكرهوني اكتر...رجال مش متعلم مش معاه مليم واحد ولا حتي حته ارض يستر بيها نفسه و يستر عيلته....ابويا قالي لو مطلقتش الست دي و رجعت لمراتك نرجس هيرمي نرجس و سراج و عبد الرحمن بره و هيتبري مني و ساعتها كنت هبقي مسؤول عن سبع أطفال و اتنين ستات كنت عايزني اعمل ايه...لو كنت فضلت مكنتش هتبقي مهندس و لا نائل دكتور و لا نديم بقي كاتب حتي لؤلؤ و ماسه مكنوش هيعيشوا في المستوي ده انا فضلت تعيشوا بعيد و تكرهوني بس تحققوا احلامكوا احسن ما تعيشوا جمبي مكسورين

نادر: بس كنا محتاجين حضنك...كنا محتاجينك لما ماسه اتخطفت

نوح بصدمه: ايه

نادر يستغرب: مكنتش تعرف

نوح: لا....امك عمرها ما اتصلت بيا

نادر: كان عندنا سبع سنين و اتخطفت هي و واحده صاحبتها بس هي هربت و محكتش حاجه و احنا مكناش نعرف اهل البنت علشان نسأل ايه الي حصل بعد كده و ماما مكنتش عايزه تدخل في سين و جيم

نوح بعصبيه: ليه متصلتش بيا تقولي

نادر: معرفش...بس ماسه وقتها سألت عنك

نائل من علي باب الاوضه: ممكن نقفل الموضوع ده و ياريت محدش يتكلم فيه مع ماسه...ارجوكوا

نوح: بس انا من حقي كنت اعرف

نائل: اتناقش مع ماما في ده و مش قدام ماسه

نديم جه: هو ايه الي مش قدام ماسه

نائل: ولا حاجه

لؤلؤ تيجي لابسه علشان الصلاه

لؤلؤ: صباح الخير

نوح يبتسم: صباح النور يا حبيبتي

لؤلؤ تبتسم بتوتر

ماسه جايه: يلا علشان اروح اكمل نوم حاسه ان....

تسكت لما تشوف ابوها