وصفة الحب

XXXII

-دازت يوماين على حياة أبطالنا...البنات بقاو مع سلمى...ياسمين كانت كتمشي تقرا فلافاك...مريم كتمشي لخدمتها وهي باقة مرفوعة من داكشي اللي طرا ليها مي سلمى دايرة كتر من الواجب ديالها...فاروق كيعيط ليها يوميا مي مكتجاوبوش وقرر يخلي الڤول ويجي عندها حيت ماعرف عليها والو...سلمى مقلقة حيت توحشات زمانها ولكن مابخلش عليها بليزاپيل فينما يلقا شي فرصة يعيط ليها ڤيديو ويبقاو محتتين....وهاهو جا النهار اللي فيه غادي يجي،عرضات معاها حتى على ليلى وقصي اللي من النهار عرفو بالخبر وهوما حاطين الراس على بعضياتهم وجات حتى راضية تقابلها فهاد الأيام اللولة...حبسات الخدمة بمرة حيت أصلا شارطين هادشي من اللول مابغاتش ولادها يربيهم شي حد من غيرها وهادشي عااجب قصي ومخليه مهني من جيهة ولادو اللي مزال حتى ماخرج اللول(ة) فيهم هههههه

-مع 19:00 دالعشية مريم خرجات من الخدمة راجعة للدار.. لإيرپودز فودنيها...عينيها باقين كيعكسوا التعب وراسها عامر... ولكن فاش دخلات للدار عند سلمى لقات جو مختلف...الريحة زوينة ديال العشا كتعمر الدار...والضحك كيتسمع على الجهد...سلمى كتتحرك فالكوزينة وجهها منَوَّر بلا ماتحس... ياسمين وليلى معاها...الدراري كيتسمع صوتهم فالصالة كيلعبو الپلاي...غير سدات الباب لقات راضية واقفة عليها مبتاسمة استقبلاتها بتعنيقة من القلب...

راضية(كتبوس فمريم):الله دابا عاد الشمل كمل فين تعطلتي؟؟

مريم(كتضحك ليها):جيت على رجلي داكشي علاش...نهار كبيير هادا لباس عليك؟؟؟عمي عبد الرحمان جا؟؟

راضية:لا طلَّقتو جيت بلا بيه ههههه

مريم(عنقاتها):ههه يااك حتى نكون مكنعرفكش...ياله ندخلو فين هي الحاملة؟؟

راضية:رااه فالكوزينة

مريم(داخلين للكوزينة):الصلا والسلام على رسول لله.... يويويووووووي

ليلى(عنقاتها):غنولي أم زغرتو ليااا ههههههه

راضية(كتضحك معاهم):الله يمسخكم..آجي أبنتي ترتاحي ياله جيتي

مريم(جرات راضية هاربة من الشقا):ياله ياله أنا راه ياله جيت مافيا اللي يدير شي حاجة

البنات(كيتغامزوا عليها):واغييير سيري هههه

مريم(ضاحكة وبالغوات):شفتكم ساقلين راه عندنا السبوع قريب مكاين لاشطيح لارديح لاواالو؟؟

ياسين(كيطل عليها ويضحك):كنا كنتسناوك مكاينش اللي يعرف هادشي حسن منك

مريم:اش ب........السلام عليكم(جمعات الضحكة فور ماشافت فاروق گالس معاهم وكيشوف فيها...تجاهلاتو وعاودات رسمات الضحكة على وجهها وسلمات عليهم كاملين حتى وصلات ليه ومدات ليه يديها بادلها السلام عادي )

راضية(ضربات بيديها للبلاصة اللي حداها):أجي حدايا أجي

مريم:نمشي غير نبدل حوايجي وأنا معاكم غير سخنوا الطرح