غرباء في بيت العمده(مكتمله)

الفصل الرابع

الشهر عدي
في الليله قبل السفر كل واحد قاعد في اوضته بيبص للشنط الي فيها حاجتهم
نادر ممدت علي السرير بيفكر في الحياه الجديده الي هتبدا و بيفكر ازاي يخلي باله من أمه و اخواته و الأهم ازاي هيتعامل من ابوه الي مشفوش من يوم ما اتولد
نائل قاعد في البلكونه بتاعته اوضته شايل هم امه و اخواته و مش عارف المفروض يتكلم مع الراجل ده في ايه و خايف علي ماسه و من عصبيتها
نديم نايم بس واخد لؤلؤ في حضنه و كانت مبطلتش عياط و قططتها لوزه و بندق نايمين تحت السرير
ماسه قاعده علي السرير مضايقه و مخنوقه مش عايزه تروح و لا عايزه تشوف ابوها قططتها نايمين في حضنها
ليلي في الاوضه بتعيط و هي بتكلم نوح في التليفون

ليلي بعياط: حاسه إني أنانيه و أنا جيباهم غصب عنهم

نوح: يا حبيبتي انتي مش أنانيه انتي عايزه ليهم الأحسن

ليلي: نوح اوعدني انك تستحمل اسلوبهم خصوصا ماسه
هي لسانها طويل....ابوس ايدك يا نوح لو هي غلطت سيبني انا اتعامل معاها اتعامل انت معاها من بعيد ماسه لو نفسيتها تعبت العيال كلهم هيقلبوا علينا و نائل هيصمم نمشي

نوح: بس لو اتعدت حدودها

ليلي تقاطعه: أنا هتصرف هتتقبل مني أي حاجه انا

نوح: ماشي...بطلي عياط و نامي دلوقتي السواق هيرن عليكي لما يوصل

ليلي: ماشي تصبح علي خير

نوح: و أنتي بخير

يقفلوا التليفون و ليلي تنام علي السرير و تفضل تبص للسقف
النهار طلع
التلت أولاد بينزلوا الشنط مع السواقين بس محدش بيكلم التاني
لؤلؤ قاعده جمب امها و حاطه القطط في الشنط بتاعتهم و معاها شنطه صغيره حاطه فيها حاجات ليهم و ليها
ماسه في اوضتها قاعده علي السرير مش راضيه تخرج
بره نزلوا الشنط كلها

نائل: ماسه فين

ليلي: في اوضتها روحتلها انا و لؤلؤ كذا مره زعقت و طردتنا

نائل: طب انزلوا انا هجيبها و ننزل هقفل الشقه انا

ليلي: اقفلها كويس

نائل: حاضر

نادر: يلا يا ماما يلا يا لولي

نادر ياخد الشنطه بتاعت مامته و نديم ياخد شنطه القطط
عند اوضه ماسه

نائل بيخبط: ماستي ممكن ادخل

ماسه من جوه: أدخل

يدخل يلاقيها علي السرير زي ما هي
يروح يشيل القطط يحطهم في شنطهم و يجهز شنطه صغيره ل ماسه

نائل: يلا

ماسه: مش عايزه

يمسكها من فوق المعصم بشويه علشان يقومها بس هي بتتألم