وصفة الحب

XXXI

              -فالزنقة كانت كتتمشى بالزربة...باقي فيها الآثار ديال الدموع على وجهها...عينيها كيبانوا هازين الجبال..بان ليها أول دري فراس دالدرب واقف...داير فحال الكاميرا حاضي الداخل والخارج

مريم(وقفات عليه كتسولو بالتخنرير):هيه نتا بان ليك رويحة؟؟

سفيان(بلا مايفكر):رويحة بان ليا مشا للقهيوة اللي عند القنطرة

مريم(عطاتو بالضهر):صافي الله يحفضك

-القهوة مكانتش بعيدة ولكن حسات بيها طويييلة...معارفاش راسها شنو غادي تقول بالضبط...ولكن خاصها تهضر وتفهم شنو وقع بلا خبارها...وصلات للقهوة اللي كانت عامرة بالرجال..شي مجمَّعْ مع صحابو..شي كيتفرج فالماتش ديال البارح اللي معاود..شي شاد تيليفونو حال الفايسبوك وطالق لڤيديوات على الجهد...دورات عينيها عليهم كاملين حتى جات عينيها عليه كان لابس قبية فعز الصهد وزايدها بالقب فوق راسو..كيجغم قهوتو وهو ساهي..عينيه حمريين وغادي يخرجوا من بلاصتهم..شدات جلايلها ومشات قاصداه مراداش البال لگاع دوك الرجال اللي تلفتوا ليها نصهم جاتهم زعامة تدخل لقهوة دالرجال والنص متبعها هي على قبلها...وقفات حدا الطبلة وقالت بصوت مسموع

مريم:بغيت نهضر معاك

رويحة(هز عينيه فيها وهو مصدوم مي محافض على برودة تعابيرو،جغم قهوتو وقال):هادي ماشي بلاصة الهضرة..سيري حتى نتلاقاو فشي بلاصة خرا

مريم(بالغوات):أنا باغا نعرف الحقيقة،هنا ولا بلاصة خرا..شنو درتي على ودٍّي؟؟ومالي أنا فهادشي؟؟

رويحة(وقف وحط الفلوس فوق الطبلة وزاد):تبعيني

-مشاو بجوج لواحد البلاصة خاوية هي ماعقلاتش عليها ولكن هو عاقل على كل بلاصة فيها...مكانتش بعيدة على الدرب غير قريبة...الريح كتدوز عليه خفيفة مع شويا ديال شوم الشمس فحالا كتقول ليه عندك شلاَّاااا مايتگال واللي خبيتي سحال هادي اليوم غادي يتعرف.....

مريم(وقفات مقابلاه وعينيها شاعلين):جاوبني أرويحة...واش بصح دخلتي للحبس على قبلي؟؟وشنو درتي مافهمتش!!

رويحة(كيشوف فيها وهو يطلق واحد التنهيدة بورشاتها):آه... دخلت للحبس على قبلك

مريم(قطبات حجبانها):وعلاش؟؟وكيفاش؟؟؟؟

رويحة(نعت بصبعو للبلاصة):ماعقلتيش على هاد البلاصة؟؟

مريم(كتحاول تتفكر):لا ماعقلتش عليها مالها؟؟؟

رويحة(ضحك باستهزاء):هاد البلاصة هي فين كان تلقَّا ليك داك خينا اللي كان كيتبعك فاللول

مريم(هزات حجبانها بمعنى عقلات):اه داك الحمار الله يلگيها ليه...ولكن نتا؟كيفاش عرفتي؟؟؟

رويحة(كيشوف فيها بشوفات مامفهومينش):داك النهار كنت خدام فالمحل حتى كيبان ليا تابعك وعرفتو ماناوي على خير حيت داك النهار نيت كنت تبرِّيت فيه حيت سمعتو كيعاود عليك للدراري ديال الدرب...دخلت علمت المعلم وتبعتكم الوقت اللي وصلت لقيتو مضروب غير فهمت شنو كاين وانا نكمل عليه حتى وقفوا عليا مالين الوقت وهادا هو السباب ديالي فالحبس