وصفة الحب

XXVIII

-الباب ديال البالكون محلول مخلي الشميسة تدخل ومعاها نسيم ديال الهوا اللي كيلعب فوجه ليلى اللي منين جات وهي متكية على سريرها...نزهة مشات وحتى المساعدة مشات من مور ماكملات شغالها...بين يديها التقرير اللي صغير وفيه كلمة وحدة اللي كتهز الدنيا: « POSITIF »
كتشوف فالورقة ومن بعد كرشها...وتحط يديها عليها فحالا مزال مامستوعباش

ليلى(بصوت داخلي،مرتبك وضاحك):"أنا....حاملة؟أنا؟دابا هازة روح فكرشي!!

-شدات خدها بيدها...وتبدا تضحك غير راسها...ضحكة خايفة ولكن فيها واحد الدِّفئ

ليلى(شادة كرشها وبدات كتبكي):ماشي غير أنا اللي كنتسناك...راه حتى هو...حتى باباك كيتمنى هاد اللحظة

-كانت كتهضر مع كرشها حتى سمعات الباب ديال الدار تخبط على جهدو حتى قفزات من بلاصتها مخلوعة وغير سمعات [ليلىاااااا فينك؟؟]عرفات شنو كاين وخرجات عندو وهي مبتاسمة.......

___________________

-مع حوالي 15:00....

أوس خرج من الخدمة...راكب فطوموبيلتو...عيان شويا ولكن عندو واحد الحماس داخلي....بقات غير سلمى فبالو...وحتى الجوع بدا كيقرص فيه...نيشان لعندها حتى وقف قدام باب العمارة...طلع وحل الباب غير بشويا حتى ضرباتو ريحة الزعفران والدجاج كتشهي...وبان ليه طيف سلمى اللي واقفة فالكوزينة.. كانت شبه عريانة لابسة پيجامة ساتان(شورط والفوقي ديالو) شعرها جامعاه سفنجة الفوق...وكتغني بصوتها العفوي:

سلمى(كتغني وهي كتحرك فالمقلة):اش داك تمشي للزين.. ونتايا راجل مسكين

أوس(بصوت خفيف وهو داخل):وراني مسكين نييت قدام هادشي كامل اللي عندي

سلمى(شافتو وابتاسمات عينيها قبل فمها):بسم الله..شكون اللي مشا ورجع قبل الوقت؟؟ياكما نسيتي شي ضوسي اااه ولا جابك الحنين؟؟

أوس(قرب منها وباسها فحنكها):جبتيني نتي..وشميت ريحة طيابك من باب الزنقة..شنو موجدة لينا الشيف؟؟؟

سلمى:مشات عليا المفاجأة كنت بغيتك حتى تجي وتلقا الطبسيل مقاد دابا غادي تاكل وتحمد الله هههه

أوس:ههه واخا أنا نغسل يدي ونتسناك فالصالون

سلمى(كتطفي على البوطة):صافي أصلا مابقاش ليا بزااف

-مشات لسيجور وحطات ليه الطبسيل اللي كان فيه دجاج مقطع شرائح...مشوي فالفران بصلصة ديال لاكريم فريش،ثوم، ريحان طري وزعتر....مرفوق بپاستا تاغلياتي طايبة"آل دينتي" معاها سلطة ملونة فيها الطوماط شيري،الماندا،الخيار والفيتا.. وجنابها كاس عصير دالليمون بوريقات النعناع،كيبرد الجوف مع هاد الصهد.

سلمى:آجي شوف ...هاد المرة بغيت ندير شي حاجة عصرية.. قلت نجرب،إيلا عجبك غادي نزيدو فدفتر وصفاتي..إيلا ماعجبكش ...بلاش