وصفة الحب

XXVII

-دوزات مريم الدوش كاامل وهي كتغني واخا صوتها على قد الحال الشيء اللي خلا ياسمين تفيق واخا مباغاش.. مشات وقفات حدا الدوش حتى بانت ليها خارجة بپينوار وفوطة على راسها

مريم(مفزوعة):عععع الله ياختي ومالكييي؟؟طيرتيها مني خلعة

ياسمين(مربعة يديها):اش مفيقك فهاد الساعة ونتي نهار الروپو ديالك كتعلمينا بيه فاش كتبداي الخدمة باش حتى حد مايبرزطك شفتك اليوما مبكرة؟!!!

مريم(هزات كتافها ومشات لبيتها وهي كتضحك):همم معروضة أالزين ديالي داكشي علاش

ياسمين(خرجات عينيها وتبعاتها):شنو شنو؟؟كيفاش معروضة؟ قولي ليا شكون اللي عرضك وفين وكيفاش؟؟؟

مريم(ركبات الپريز للسوشوار باش تنشف شعرها):فاروق هو اللي عارضني وغادي ندوزوا النهار برا حيت بالليل مسافر

ياسمين(كتضحك):داوية منيتك؟؟؟نتي وفاروق؟؟لااااا كتضحكي

مريم(كتدي وتجيب فشعرها):لا والله مكنضحك هو اللي عيط ليا الصباح وقال ليا وجدي راسك غادي ندوز موراك

ياسمين:بلاتي بلاتي كيفاش ياك غير البارح كنتو مضاربين؟؟

مريم(حدرات راسها حشمانة):ايوا راه تصالحنا وواقيلا حتى ولينا مع بعضياتنا

ياسمين(ناضت عندها وعنقاتها):الصلا والسلام على رسول الله يويويووووووووي على سلامتنا اختي مغاديش تبقاي بوحدك

مريم(معنقاها حتى هي):بغيت نعطيه فرصة وصافي أما أنا گاعما مرتاحة بهادشي..كنت هانية راسي وخايفة بزاف لايغدرني ولا يضرني ماعندي جهد لشي حاجة خرا

ياسمين:ديري النية أحبيبة وان شاء الله مغادي تكون حتى حاجة...عرفتي شنو غادي تلبسي بعدا؟؟

مريم(سالات شعرها):لا مزال ماشفت حتى حاجة بعدا نشفت شعري حتى نلبس وندوز عليه

ياسمين(مشات للماريو تشوف الحوايج وجبدات واحد الكسوة):همممم شوفي هادي؟؟

مريم(شافت الكسوة زوينة اه طويلة ولكن كتجي مزيرة):مزيرة أصاحبتي هادي

ياسمين:ولمن شارياها للمريو يلبسها؟؟؟ كنا كنفهموك مني كنتي كتگولي ماتقدريش تخرجي بيها على حساب الدرب أما دابا مغاديش يشوفوك راك غادي تطلعي للطوموبيل وتبقاي معاه

مريم:م..ماعرفتش الصراحة غادي تجي زوينة؟؟

ياسمين(باستها فحنكها):اويلي على الحمقة بطبيعة الحال غتجيك فننننة

مريم(خداتها من عندها):صافي ياله انا غادي نلبسها

ياسمين(خرجة من البيت):وأنا غادي نمشي نغسل كمارتي نشوف شنو ندير اليوما

مريم:أجي شفتك مابقيتيش كتمشي للافاك!!

ياسمين(حطات راسها على الكادر دالباب):مافياش والله..عييت